[1] Rato Hiram dhari nagara Tirus ngerem ta-dhutana ka Daud epangeba kaju comara Libanon, ban kang-tokang kaju sarta tokang bato kaangguy kaparlowan se maddegga karaton.
[2] Daddi Daud arassa yakin PANGERAN makoko salerana menangka rato Isra'il, sarta makoko karaja'anna kaangguy kaparlowanna ommadda PANGERAN.
[3] E Yerusalim Daud araji pole pan-barampan kale, sarta pas kaagungan tra-pottra pole.
[4] Tra-pottrana se lahir e Yerusalim iya areya: Syamuwa, Sobab, Natan, Sulaiman,
[5] Yibhar, Elisua, Elpelet,
[6] Nogah, Nefeg, Yafiya,
[7] Elisama, Be'elyada ban Elifelet.
[8] E bakto oreng Filistin ngedhing ja' Daud la epajumenneng rato saantero Isra'il, oreng Filistin laju entar mega'a Daud. Daud kalowar merrangana reng-oreng jareya.
[9] Sabatara jareya oreng Filistin la napa' ka Cora Refa'im sarta arampok e kennengngan jareya.
[10] E bakto meyarsa parkara jareya Daud mator ka Allah, “Guste, ponapa abdidalem kodu nyerrang reng-oreng Filistin ka'dhinto? Ponapa abdidalem eparengngana kamennangan sareng Junandalem?” “Iya, mara serrang!” dhabuna PANGERAN. “Bi' Sengko' ba'na epamennanga!”
[11] Daddi Daud ban pasukanna alorok reng-oreng Filistin jareya e Ba'al-Perasim; oreng Filistin epakala. Dhabuna Daud, “Allah la ngagem sengko' eparobak partahananna moso akantha banjir se arobak apa'a bai e dhalem saparngedep.” Lantaran jareya kennengngan buru enyamae Ba'al-Perasim.
[12] E bakto pasukan Filistin buru, ta' sempat ngeba ca-arcana brahalana. Daud makon oreng ngobbar ca-arca jareya.
[13] Ta' saapa abidda dhari jareya oreng Filistin dhateng pole arampok pole Cora Refa'im.
[14] Daud nyo'on petodu sakaleyan aggi' ka Allah, ban Allah adhabu, “Ba'na ja' alorok mosona jareya dhari dhinna', tape kassa' ajalan moter, pas serrang mosona jareya dhari penggir dhissa', e seddi'na ka-bungkana morbei.
[15] Mon ba'na ngedhing monye akantha garadabba sokona oreng abaris e konco'na ka'-bungka'an jareya, pas maju, sabab Sengko' ajalana e adha'na ba'na makala'a oreng Filistin.”
[16] Pa-apa se edhabuwagi Allah jareya bi' Daud elampa'agi kabbi. Tantara Filistin epakala bi' Daud ban pasukanna sampe' nyorot molae dhari Gibeyon sampe' ka Gezer.
[17] Daddi asmana Daud kalonta ka man-dhimman, ban sa-bangsa bi' PANGERAN epatako' kabbi ka Daud.