[1] Gayus ya bolingo, yamba mbote euti na ngai, mbuta-muntu ya Eklezya. Ya solo, nalingaka yo mingi.
[2] Ndeko ya bolingo, nasengi Nzambe 'tè ózalaka malamu penza pe nzoto makasi, ndenge bondimi na yo ezali makasi.
[3] Nazalaki na esengo mingi, tango bandeko mosusu bayaki koyebisa ngai 'tè omipesá mobimba na Nzambe pe ozali kaka kolanda makambo ya solo.
[4] Soki nayoki 'tè bana na ngai balandaka makambo ya solo, yango esepelisaka ngai mingi koleka.
[5] Ndeko ya bolingo, omipesaka na motema moko po na kosalisa bandeko, ézala kutu bapaya.
[6] Bango bayebisaki bandimi ya Eklezya ya awa, ndenge olakisaki bango bolingo. Salisaka bango kaka na ndenge esepelisaka Nzambe, po básilisa mobembo na bango malamu.
[7] Pamba té bazali kosala mobembo yango po na kosakola sango ya Kristo, pe bazwaka lisalisi moko té epai ya bato oyo bayebi Nzambe té.
[8] Yango wana biso nyonso tosengeli kosalisa bandeko ya ndenge wana, boye tokozala kosangana na bango po na mosala ya koyebisa makambo ya solo.
[9] Nakòmelaki Eklezya na bino mwa-mokanda, kasi Diotrefes aboyaka maloba na ngai; ye alingaka komitia liboso ya bato nyonso.
[10] Yango wana, tango nakoya, nakoyebisa mabe nyonso oyo ye asalaka: tango nyonso akoselaka biso makambo; kasi lisusu soki bandeko bayei kotala bino, ayambaka bango té; kutu soki bato balingi koyamba bango, apekisaka bango pe abenganaka bango na Eklezya.
[11] Ndeko ya bolingo, kolanda makambo ya mabe té, kasi landa makambo ya malamu. Moto oyo asalaka malamu azali moto ya Nzambe; oyo asalaka mabe, nanu amoná Nzambe té.
[12] Bato nyonso bazali kokumisa Demetrius; pe maloba ya Nzambe oyo ye asakolaka ezali kosala ndenge moko. Ngai pe nazali kokumisa ye, pe oyebi ’tè nalobaka kaka makambo ya solo.
[13] Nazali na makambo mosusu mingi ya koyebisa yo, kasi nalingi kokòma yango na mokanda té.
[14] Natie motema 'tè sima ya mwa-tango moke nakoya kotala yo po tósolola.
[15] Boboto ézala na yo! Baninga na yo batindeli yo mbote. Pesa pe mbote na baninga na biso moko moko.