[1] Кор Исус вöлi петö крамсьыс, öти велöдчысь шуис: «Велöдысьöй, видзöдлы, кутшöм изъясысь тэчöма керкаяссö!»
[2] Исус шуис: «Аддзан тайö ыджыд керкаяссö? Татчö из вылö из оз коль, ставсö жугöдасны».
[3] Кор Исус вöлi пукалö Олив керöсын, крамлы паныд, Петыр, Яков, Иоан да Öндрей ас кежаныс юалiсны Сылысь:
[4] «Висьтав, кор ставыс тайö лоас? Мый серти ми тöдмалам сiйö кадсö?»
[5] Исус шуис: «Видзчысьöй, мед эз ылöдны тiянöс.
[6] Унаöн Менам нимöн локтасны да шуасны, ме пö Сiйö, да унаöс ылöдасны.
[7] Кор кыланныд тыш мунöмъяс да тыш йылысь юöръяс, энö полöй. Тайö ставыслы колö лонысö, сöмын тайö абу на пом.
[8] Войтыр войтырлы паныд сувтас, муяс öта-мöдныслы паныд кыпöдчасны. Уналаын лоас му вöрöм, тшыгъялöм да шызьöм. Но тайö ставыс чужтöм водзвывса дойяс на.
[9] Видзöдöй ас бöрсяныд. Тiянöс кыскасны ёрдö да нöйтасны синагогаясын. Ме вöсна нуöдасны тiянöс юралысьяс да öксыяс водзö, медым найö тöдiсны Ме йылысь.
[10] Помыс вотöдз Евангелльöсö колö висьтавны быд кыла войтырлы.
[11] Кор нуöдасны тiянöс ёрдö, водзвыв энö майшасьöй, мый шуны. Висьталöй сiйö, мый лоö сетöма тiянлы сiйö кадас, öд Вежа Лов пондас сёрнитны, онö тi.
[12] Вокыс воксö сетас вины, батьыс – писö. Ныв-пи сувтасны бать-мамыслы паныд да виасны найöс.
[13] Менам ним вöсна унаöн мустöмтасны тiянöс, но сьöкыдсö помöдз нуысь мездмас».
[14] «Кор тi аддзанныд пеж зывöксö сэтысь, кöнi сылы оз позь лоны, – та йылысь Даниил пророк на висьтавлiс; лыддьысьысь мед гöгöрвоö – сэки Юдея муын олысьяс мед пышъясны керöсъясö.
[15] Кодi лоас керка вылас, мед оз пыр керкаас босьтны мыйкö.
[16] Кодi лоас видз-му вылас, мед оз кос гортас паськöмысла.
[17] Сiйö лунъясö ёна сьöкыд лоö нöбасьысьяслы да нёньöдчысьяслы.
[18] Кевмысьöй, мед эз ковмы пышйынытö тöлын.
[19] Сiйö лунъясö ыджыд шог суас йöзсö, татшöмыс Енмöн муюгыдсö вöчöмсянь эз на вöвлы да оз нин ло.
[20] Господь кö тайö кадсö эз дженьдöд, ловъя морт эськö эз коль. Но Аслас бöрйöмаяс вöсна Сiйö дженьдöдiс тайö кадсö.
[21] Сэки шуасны кö тiянлы: "Кристос танi", либö шуасны: "Кристос сэнi", энö эскöй.
[22] Öд ылöгкристосъяс да ылöгпророкъяс локтасны да пондасны вöчны шензьöданаторъяс, медым ылöдны, позяс кö, весиг бöрйöмаясöс.
[23] Видзчысьöй наысь. Ме тiянлы ставсö водзвыв висьталi».
[24] «Сiйö лунъясö, тайö шог бöрас, шондiыс пемдас, тöлысьыс кусас,
[25] енэжысь кодзувъяс усясны, енэжвыв вынъяс вöрзясны.
[26] Сэки аддзасны кымöръяс вылын ыджыд вынöн да дзирдлунöн локтысь Морт Пиöс.
[27] Сiйö мöдöдас анделъяссö нёльнан му вежтасас да чукöртас Ассьыс бöрйöмаяссö став му пельöссьыс.
[28] Инжир пу вылö кö видзöдам, аддзам: вожъясыс кö ловзьöны да коръясыс потöны, сiдзкö, гожöмыс матын.
[29] Тадзи, ставсö тайöс аддзигöн тöдöй: сiйö кадыс матын, öдзöс дорад нин.
[30] Веськыда висьтала тiянлы: ставыс тайö лоас öнiя олысьяс дырйи на.
[31] Енэжыс да муыс бырас, а Менам кывъясöй оз бырны.
[32] Сiйö лунсö да сiйö кадсö некод оз тöд. Анделъяс оз тöдны, весиг Пиыс оз тöд, сöмын Батьыс тöдö.
[33] Видзчысьöй, мед энö унмовсьöй, да пыр кевмысьöй, öд онö тöдöй, кор сiйö кадыс воас.
[34] Тайöс позьö öткодявны морткöд, кодi гортсьыс мунiгöн кольö ассьыс керкасö кесйöгъяслы да быдöнлы сетö удж, а керкасö видзысьлы тшöктö лоны дасьöн.
[35] Сiдзкö, лоöй дасьöсь, öд онö тöдöй, рытын-ö, вой шöрын-ö, петук чуксасигöн-ö, асывводзын-ö локтас керка кутысь.
[36] Мед эз су тiянöс узьöмöн тöдлытöг локтöмнас!
[37] Мый висьтала тiянлы, висьтала быдöнлы: лоöй дасьöсь».