[1] Ерусалимлань матыстчигöн Исус велöдчысьясыскöд воис Олив керöсын сулалысь Виффагия да Вифания сиктъяс дорö. Ассьыс кык велöдчысьсö мöдöдiгöн
[2] Исус шуис: «Мунöй тайö сиктас. Сэтчö пыриганыд аддзанныд домалöм том осёлöс, сы вылö некод на эз пуксьыв. Разьöй сiйöс да вайöдöй татчö.
[3] Юаласны кö, мыйла тайöс вöчанныд, вочавидзöй, мый сiйö колö Господьлы, и дзик пыр мöдöдасны осёлсö татчö».
[4] Мöдöдöмаяс мунiсны, аддзисны дзиръя дорö домалöм том осёлöс да разисны сiйöс.
[5] Кодсюрö сэнi сулалысьяс пиысь юалiсны: «Мый вöчанныд? Мыйла разянныд осёлсö?»
[6] Велöдчысьяс вочавидзисны, кыдзи Исус тшöктiс. Сэки лэдзисны босьтны осёлöс.
[7] Том осёлöс вайöдiсны Исус дiнö. Шлапкисны осёл вылö паськöмнысö, сэсся Исус пуксис сы вылö.
[8] Унаöн вольсавлiсны ассьыныс паськöмнысö туй вылас, мукöдыс чегъялiсны туй бокысь пу вожъяс да тшöтш пукталiсны туй вылас.
[9] Водзас да бöрас мунысьяс горзiсны: – Осанна! Бурсиöма Господь нимöн Локтысьöс!
[10] Бурсиöма Господь нимöн миян Давид батьлысь локтан юралöмсö! Ошкöм Медвылыссалы!
[11] Ерусалимö воöм мысти Исус пырис крамö. Ставсö видзöдалöм бöрын сёр рытнас мунiс дас кыкнан велöдчысьыскöд Вифанияö.
[12] Мöд луннас Вифанияысь мунiгас Исуслöн кынöмыс пондiс сюмавны.
[13] Ылысянь Сiйö аддзис коръя инжир пу да мунiс видзöдлыны, оз-ö сюр сэтысь тусьтор. Матыстчис пу дiнас да аддзис сöмын коръяссö, öд эз на во тусь гöрддзасян кадыс.
[14] Исус шуис пуыслы: «Öнiсянь оз пондыны сёйны тэнсьыд вотöстö». Велöдчысьясыс кывлiсны тайöс.
[15] Сэсся найö локтiсны Ерусалимö. Крамö пырöм бöрын Исус пондiс вöтлавны сэтысь вузасьысь-ньöбасьысьясöс. Пöрлöдлiс сьöм вежысьяслысь пызанъяссö да гулюöн вузасьысьяслысь пуклöсъяссö,
[16] эз лэдз крам пырыс нуны нинöмтор.
[17] Сiйö велöдiс найöс шуалöмöн: «Абу-ö гижöма, мый "Менам керкаöй быд кыла войтырлы кевмысян керка лоö"? А тi сыысь вöчинныд лёк вöчысьяслы дзебсянiн».
[18] Аркирейяс Индöдö велöдысьяскöд кывлiсны тайöс да кутiсны мöвпавны, кыдзи эськö вины Исусöс. Найö полiсны Сыысь, öд став йöзыс шензисны Сылöн велöдöмысь.
[19] Рытнас Исус петiс карсьыс.
[20] Асывводзнас инжир пу дiнтi мунiгöн аддзисны: сiйö вужйöдзыс косьмöма.
[21] Петырлы тöд вылас уси Исуслöн шуöмыс. Сiйö шуис Исуслы: «Велöдысьöй, видзöдлы! Инжир пуыд, кодöс Тэ ёрин, косьмöма».
[22] Исус шуис налы:
[23] «Эскöй Енлы. Веськыда висьтала тiянлы: шуас кö кодкö тайö керöсыслы: "Кыпöдчы да шыбитчы саридзас", лоö тадзи. Сöмын мед став сьöлöмнас майшасьтöг эскас, мый шуöмыс инас.
[24] Та вöсна висьтала тiянлы: мый коранныд кевмысигад, эскöй, мый сiйö лоö тiянлы, и лоö тадзи.
[25] Кевмысьны сувтiганыд прöститöй тiян водзын мыжмöмаöс, медым енэжвыв Батьныд прöститас тiянлысь мыжъястö.
[26] Онö кö прöститöй, сэки енэжвыв Батьныд тiянлысь мыжъястö оз прöстит».
[27] Найö бара локтiсны Ерусалимö. Кор Исус ветлöдлiс крамöд, Сы дiнö матыстчисны аркирейяс, Индöдö велöдысьяс да пöрысьяс.
[28] Найö юалiсны: «Кутшöм вынöн Тэ ставсö тайöс вöчан? Кодi Тэнö пуктiс тайöс вöчнысö?»
[29] Исус воча шуис: «Ме тшöтш тiянлысь öтитор юала. Вочавидзанныд кö, висьтала, кутшöм вынöн ставсö тайöс вöча.
[30] Иоанлöн пыртöмыс вöлi Енсянь али мортсянь? Вочавидзöй Меным».
[31] Найö ас костаныс сёрнитiсны: «Шуам кö: "Енсянь", Сiйö шуас: "Мыйла сылы энö эскöй?"
[32] Шуам-ö: "Мортсянь"?» Но найö полiсны йöзсьыс, öд Иоанöс ставныс збыльысь пуктiсны пророкö.
[33] Найö вочавидзисны: «Огö тöдöй». Сэки Исус шуис: «Сiдзкö, Ме тшöтш ог висьтав, кутшöм вынöн ставсö тайöс вöча».