[1] Сэтысь Исус мунiс Йöрдан ю мöдлапöлöд Юдея муö. Сы дiнö бара чукöртчис уна йöз. Сiйö велöдiс найöс, кыдзи пыр вöчлiс.
[2] Исус дiнö матыстчисны фарисейяс да Сiйöс кыйöм могысь юалiсны: «Позьö-ö верöслы юксьыны гöтырыскöд?»
[3] Исус воча шуис: «Мый тiянлы гижöма Мöисей?»
[4] Найö вочавидзисны: «Мöисей лэдзис верöслы эновтны гöтырсö, сöмын верöсыслы колö вöлi сетны гöтырыслы торйöдчан гижöд».
[5] Исус шуис налы: «Тiян чорыд сьöлöмныд вöсна Мöисей гижис тайö тшöктöмсö.
[6] Му пуксьöмсяньыс Ен вöчис аймортöс да аньöс.
[7] "Та вöсна морт кольö бать-мамсö да öтлаасьö гöтырыскöд,
[8] и тайö кыкыс лоöны öти вир-яйöн". Сiдзкö, найö абу нин кык, а öти вир-яй.
[9] Мый йитöма Енмыс, морт мед оз торйöд».
[10] Керкаö пырöм бöрын велöдчысьяс та йылысь юалiсны Исуслысь.
[11] Исус шуис налы: «Верöсыс кö эновтö гöтырсö да гöтрасьö мöдкöд, сiйö гозъя олöм пежалö.
[12] Гöтырыс кö юксьö верöсыскöд да мунö мöд сайö, сiйö тшöтш гозъя олöм пежалö».
[13] Исус дiнö вайöдiсны челядьöс, медым Сiйö инмöдчылiс на дiнö. Велöдчысьяс шуасисны вайöдысьяс вылö.
[14] Исус казялiс тайöс да чорыда шуис налы: «Лэдзöй челядьсö локны Ме дiнö. Энö кутöй найöс. Енлысь Юраланiнсö öд на коддьöмлы лöсьöдöма.
[15] Веськыда висьтала тiянлы: кодi оз сибöд Енлысь Юралöмсö кага моз, сiйö оз пыр Енлöн Юраланiнö».
[16] Исус кутыштлiс челядьöс да кисö пуктылöмöм бурсиис найöс.
[17] Туйö петiгас Исус дiнö котöрöн локтiс öти морт да Исус водзö пидзöс вылас сувтöмöн юалiс: «Бур Велöдысьöй, мый меным колö вöчны, мед вичмис меным помтöм олöм?»
[18] Исус вочавидзис: «Мыйла тэ шуан Менö бурöн? Некод абу бурыс, сöмын Енмыс бур.
[19] Тэ öд тöдан тшöктöмъяссö: гозъя олöмтö эн пежав, эн ви, эн гусясь, эн пöръясь, эн мырддьы мукöдлысь, пыдди пукты ассьыд бать-мамтö».
[20] Сiйö шуис: «Велöдысьöй, том кадсянь ме ола тайö тшöктöмъяс сертиыс».
[21] Исус видзöдлiс сы вылö мусапырысь да шуис: «Öтитор оз тырмы тэныд: мун, вузав ставсö, мый тэнад эм, да сьöмсö сет гöльяслы. Сэки тэныд енэжын озырлуныс вичмас. Сэсся босьт кресттö да лок Ме бöрся».
[22] Исуслöн кывъясыс шöйöвоштiсны морттö. Сiйö жугыля мунiс, öд сылöн озырлуныс вöлi уна.
[23] Исус видзöдлiс велöдчысьясыс вылö да шуис налы: «Кутшöм сьöкыд озырлы пырны Енлöн Юраланiнö!»
[24] Велöдчысьяс чуймисны Сылöн кывъясысь. Исус выльысь шуис: «Челядь, кутшöм сьöкыд пырны Енлöн Юраланiнö сылы, кодi озырлун вылö лачаöн олö!
[25] Озырлы Енлöн Юраланiнö пырöм дорысь верблюдлы кокньыдджык пырны ем пысöд».
[26] Велöдчысьяс ёнджыка на чуймисны, юасисны öта-мöдныслысь: «Кодi нö вермас мездмынысö?»
[27] На вылö видзöдлöмöн Исус шуис: «Мортлы тайö вермытöмтор, но абу Енлы. Енмыслы ставыс вермана».
[28] Петыр шуис Исуслы: «Ми ставсö эновтiм да мунiм Тэ бöрся».
[29] Исус шуис: «Веськыда висьтала тiянлы: кодi Ме вöсна да Евангелльö вöсна коляс керкасö, чой-воксö, бать-мамсö, гöтырсö, ныв-писö, видз-мусö,
[30] сылы тайö олöмас на вöтлöмъяс дырйи керкаыс, чой-вокыс, мамыс, ныв-пиыс да видз-муыс сё пöвстöн бöр воас, нöшта локтан нэмас сылы помтöм олöм вичмас.
[31] Воддзаясысь унаöн лоöны бöръяöн, бöръяясысь – воддзаöн».
[32] Ерусалимö кайигöн Исус мунiс водзвыланыс. Велöдчысьяс шензисны, а мукöдыслöн, Исус бöрся мунысьяслöн, вöлi полöм. Исус корис Ас дiнас дас кык велöдчысьсö да пондiс висьтавны, мый Сiйöс виччысьö:
[33] «Öнi ми мунам Ерусалимö. Сэнi Морт Пиöс сетасны аркирейяслы да Индöдö велöдысьяслы. Найö шуасны вины Сiйöс, сетасны ентöдтöмъяс киö.
[34] Найö сераласны Сiйöс, сьöлаласны да чорыда нöйтасны, сэсся виасны. Но коймöд луннас Сiйö ловзяс».
[35] Исус дiнö матыстчисны Зеведейлöн Яков да Иоан пияныс. Найö шуисны: «Велöдысь, миян эм корöм Тэ дiнö».
[36] Исус юалiс: «Мый тi кöсъянныд?»
[37] Найö вочавидзисны: «Пуксьöд миянöс Аскöдыд Юраланiнад, öтинымöс веськыдладорад, мöднымöс шуйгаладорад».
[38] Исус шуис налы: «Онö тöдöй, мый коранныд. Верманныд-ö юны Менсьым чашасö да Менам пыртчöмöн пыртчыны?»
[39] Найö вочавидзисны: «Вермам». Исус шуис: «Менсьым чашасö понданныд юны да Менам пыртчöмöн понданныд пыртчыны.
[40] Но мед пуксьöдны веськыдладорам да шуйгаладорам – тайö абу Ме сайын. Сэтчö пуксясны найö, кодлы лöсьöдöма».
[41] Яковлöн да Иоанлöн сёрниыс дöзмöдiс мукöд дас велöдчысьсö.
[42] Исус корис велöдчысьяссö да шуис: «Тi тöданныд, мый юралысьяс ыджыдалöны йöз вылын, да веськöдлысьяс кипод улас кутöны йöзöс.
[43] Но тi тадзи энö вöчöй. Кöсъян кö ыджыдö пуксьыны – кесъяв,
[44] кöсъян кö юралысьö пуксьыны – ло кесйöг туйын.
[45] Öд Морт Пи эз лок, медым Сылы кесъялiсны. Сiйö локтiс кесъявны да сетны Ассьыс олöмсö унаöс ньöбöм могысь».
[46] Исус велöдчысьясыскöд воис Ерикон карö. Карысь петiганыс накöд вöлi уна йöз. Туй дорас пукалiс синтöм корысь Вартимей, Тимейлöн пиыс.
[47] Сiйö кылiс, Назаретса Исус пö локтö, да пондiс горöдны: «Исус, Давид Пи! Ло бур сьöлöма ме дiнö!»
[48] Унаöн öлöдiсны сiйöс горзöмсьыс, но сiйö ёнджыка на пондiс горзыны: «Давид Пи, ло бур сьöлöма!»
[49] Исус сувтiс да шуис: «Корöй сiйöс». Синтöмöс корисны, шуисны сылы: «Эн пов, чеччы. Исус корö тэнö».
[50] Сiйö шыбитiс ассьыс вылыс паськöмсö, чеччис да локтiс Исус дiнö.
[51] Исус юалiс: «Мый тэ кöсъян?» Синтöм вочавидзис: «Велöдысьöй, кöсъя аддзыны».
[52] Исус шуис: «Мун, эскöмыд мездiс тэнö». Синтöм дзик пыр кутiс аддзыны да мунiс Исус бöрся.