[1] Вит лун мысти локтiсны Ананий аркирей да пöрысьяс. Накöд тшöтш локтiс Тертул нима налöн дорйысь. Локтысьяс асланыс мыжалöмъясöн шыöдчисны юралысь дiнö.
[2] Павелöс вайöдöм бöрын Тертул сувтiс мыжавны:
[3] «Пыдди пуктана Феликс! Быд кадö да быдлаын ми бур ногöн казьтылам тэнö. Ми уджйöзаöсь тэныд миян лöньлуна олöмысь, тэнад тöждысьöмысь да войтырлысь олöмсö бурмöдöмысь.
[4] Ог кöсйы ёна сьöктöдны тэнö, кора сöмын лоны бур сьöлöмаöн да дженьыдика кывзыштны миянöс.
[5] Ми аддзылiм: тайö мортыс пежалö гöгöр да став му пасьтала шызьöдö юдей войтырöс. Сiйö назаретса велöдöмö кутчысьысьяслöн веськöдлысь.
[6] Сiйö кöсйис пежавны крамнымöс, таысь ми и босьтiм сiйöс да кöсйим мыждыны Индöдным серти.
[7] Но локтiс сюрсöн веськöдлысь Лисий шыпуртаяскöд да мырддьöмöн-мырддис сiйöс миян киысь, сэсся мöдöдiс тэ дiнö.
[8] Тшöтш миянлы, сiйöс мыжалысьяслы, тшöктiс локны татчö. Тэ верман ачыд бура тöдмавны ставсö, мыйысь ми мыжалам сiйöс».
[9] Юдейяс сэнi тшöтш шуисны, дзик тадзи пö ставыс вöлi.
[10] Кор Феликс сетiс кыв Павеллы, Павел воча шуис: «Ме тöда, тэ уна во чöж нин веськыда мыждан тайö муын олысьясöс. Та вöсна меным кокньыд танi дорйысьнысö.
[11] Тэ верман ачыд тöдмавны, мый дас кык лун сайын ме локтi Ерусалимö, мед юрбитны Енлы.
[12] Найö эз вермыны аддзывнысö, мед ме крамын вензи, синагогаын либö карын шызьöдi йöзсö,
[13] та вöсна оз вермыны подулавны ассьыныс мыжалöмъяссö.
[14] Но веськыда висьтала тэныд: ме кутчыся тайö велöдöмас, мый найö шуöны пöръясьöмöн, тадзи кесъяла миян батьяслöн Енлы. Ме эска ставас, мый гижöма Индöдын да пророк гижöдъясын.
[15] Танi пукалысь юдейяс моз ме тшöтш лача кута Ен вылö, эска, мый лоö ловзьöмыс, ловзясны веськыда олысьяс и лёк нога олысьяс. Менö мыжалысьяс öд тшöтш тайöс виччысьöны.
[16] Ме век зiля овны Ен водзын да йöз водзын сöстöм сьöлöмöн.
[17] Уна во бöрын ме локтi Ерусалимö, медым ас войтырлы сетны чукöртöм сьöм да вайны Енлы вись.
[18] Менö аддзылiсны крамысь сöстöммöдчöм бöрын. Йöз чукöрыс да шызьöмыс сэнi матö эз вöв.
[19] Сэнi вöлiны Асияысь кодсюрö юдейяс. Налы эськö колö вöлi сувтны тэ водзö да мыжавны менö, дерт, вöлi кö мыйысь?
[20] Тайö йöзыс мед асьныс висьталасны, кутшöм мыж найö аддзисны менсьым, кор ме сулалi веськöдлан котыр водзын.
[21] Ме сэнi шуи налы: "Тi талун мыжаланныд менö сыысь, мый ме эска кулöмаяслöн ловзьöмö". Гашкö, тайö шуöмсьыс ме мыжми на водзын».
[22] Феликс бура тöдiс "Господь туй" йылысь велöдöмсö. Ставсö кывзöм бöрын сёрнисö тупкис да шуис: «Кор сюрсöн веськöдлысь Лисий локтас, сэки шуа бöръя кывсö».
[23] Сёöн веськöдлысьлы тшöктiс нуöдны Павелöс дзескыдiнö да видзны сiйöс дзескöдтöг, лэдзны ёртъясыслы видлавны сiйöс да тöждысьны сы вöсна.
[24] Кымынкö лун мысти Феликс локтiс Друзилла гöтырыскöд. Сылöн гöтырыс вöлi юдей войтырысь. Феликс тшöктiс вайöдны Павелöс, медым кывзыны Исус Кристослы эскöм йылысь.
[25] Но кор Павел висьталiс веськыда олöм, асьтö кутöм да локтана мыждöм йылысь, Феликсöс полöм босьтiс. Сiйö шуис: «Öнi мун. Кад кö лоö, корла на».
[26] Сiйö виччысис Павелсянь, гашкö, сетас сьöм, мед лэдзасны сiйöс. Та вöсна тшöкыда корлывлiс Павелöс да сёрнитлiс сыкöд.
[27] Кык во мысти Феликс пыдди юралысьö пуксис Порций Фест. И медым шогмыны юдейяслы, Феликс колис Павелöс дзескыдiнö.