[1] Воддза небöгас, дона Феофил, ме гижи тэныд ставсö, мый Исус вöчис да мыйö велöдiс водзысяньыс
[2] сiйö лунöдзыс, кор кыпöдчис енэжö. Кыпöдчытöдзыс на Сiйö Вежа Ловсянь сетiс Аслас бöрйöм апостолъяслы тшöктöмъяс.
[3] Сьöкыда кулöм бöрас Сiйö уна эскöданторйöн петкöдлiс налы, мый Сiйö ловзис. Нелямын лун чöж Сiйö петкöдчывлiс да висьтавлiс Енлöн Юралöм йылысь.
[4] Апостолъяскöд öтлаын сёйигöн Исус шуис: «Ерусалимысь энö мунöй. Виччысьöй Батьлысь кöсйысьöмасö, мый йылысь Ме висьтавлi тiянлы.
[5] Иоан пыртiс ваöн, но кымынкö лун мысти тiянöс лоö пыртöма Вежа Лолöн».
[6] Чукöртчöмаяс юалiсны Исуслысь: «Господьöй, он-ö тайö кадö Тэ бöр сувтöд Израильлы юралöмсö?»
[7] Сiйö вочавидзис: «Абу тiян мог тöдны кадъяс йылысь, Бать индö кадъяссö.
[8] Но кор лэччас тiян вылö Вежа Лов, тiянлы лоö сетöма вын. Сэки понданныд висьтавлыны Ме йылысь Ерусалимын, став Юдеяын, Самарияын да став му пасьталаыс».
[9] Тайöс висьталöм бöрын налöн син водзын Исус кыпöдчис енэжö, да кымöрыс вевттис Сiйöс.
[10] Найö синнысö эз лэдзлыны енэжысь, пыр видзöдiсны Сылысь ылыстчöмсö. Виччысьтöг на водзö сувтiсны еджыд паськöма кык морт.
[11] Найö шуисны: «Галилея войтыр, мый тi сулаланныд да видзöданныд енэжас? Тi асланыд синмöн аддзылiнныд Исуслысь енэжö кыпöдчöмсö, тадзикöн Сiйö бöр локтас».
[12] Сэсся найö бöр мунiсны Ерусалимö Олив керöсысь, тайö керöсыс вöлi верст ылнаын Ерусалимсянь.
[13] Локтöм бöраныс найö пырисны керкаö да кольччисны сэнi вылыс судтаас. Тайö вöлiны: Петыр, Яков, Иоан, Öндрей, Филип, Фома, Варфоломей, Матвей, Алфей Яков, Симон Зилот да Яков Иуда.
[14] Найö ставныс аньяскöд, Исуслöн вокъяскöд да Сылöн Мария мамыскöд öти сьöлöмöн дугдывтöг кевмысисны.
[15] Сiйö лунъясö чукöртчис сё кызь гöгöр велöдчысь. На шöрö сувтöмöн Петыр шуис:
[16] «Вокъясöй, Гижöдыслы колö вöлi инны. Öд Давид пыр на Вежа Лов висьтавлiс Иуда йылысь, кодi вайöдiс Исус дiнö Сiйöс босьтысьясöс.
[17] Иуда вöлi миян пиысь öти, сiйöс миянöс моз тшöтш вöлi бöрйöма кесъявны.
[18] Лёк уджсьыс босьтöм сьöм вылас сiйö ньöбис му. Сэнi лёк ногöн уси, кынöмыс потi, весиг гырк пытшкöсыс ортсö петiс.
[19] Та йылысь тöдмалiс став Ерусалимыс. Та вöсна муыслы сетiсны Акелдама ним, мый лоö: вир му.
[20] Псалом небöгын гижöма: "Сылöн оланiныс мед кушмас, мед оз ло сэнi олысьыс". Нöшта гижöма: "Сылысь кесъялöмсö мед босьтас мöд".
[21] Та вöсна миянлы колö бöрйыны öтиöс на пиысь, кодъяс вöлiны миянкöд да Господь Исускöд
[22] Иоанлöн пыртöмсянь Исуслöн енэжö кыпöдчытöдзыс. Мед тайö мортыс сэсся миянкöд тшöтш висьталас Исуслöн ловзьöм йылысь».
[23] Сэки вöзйисны кыкöс: Öсип-Варсаваöс, кодöс шуисны Юстöн, да Матфийöс.
[24] Кевмысиганыс шуисны: «Господьöй, Тэ быдöнлысь тöдан сьöлöм. Инды тайö кык пытшсьыс Ассьыд бöрйöматö,
[25] медым сiйö тшöтш кесъялiс да вöчис апостоллысь уджсö, öд Иуда кежис таысь да мунiс сэтчö, кöнi сылы колö лонысö».
[26] Сэсся пудъясисны на вöсна. Пудйыс уси Матфийлы, сiйöс и индiсны дас кыкöд апостолнас.