[1] Ӧксьӧм отирыслӧ баитӧм бӧрын Исусыс пырис Капернаум карӧ.
[2] Сэтӧн олӧм сё воинӧн веськӧтлісь, кӧдалӧн кысъялісьыс шогалӧм, вӧлӧм кулан дорын ни. Веськӧтлісьыслӧ сія вӧлӧм ӧддьӧн дона.
[3] Веськӧтлісьыс кылӧм Исусыс йылісь, Сы дынӧ ыстӧм иудейезлісь бӧрйӧм пӧриссесӧ. Сія тшӧктӧм корны Исуссӧ, медбы локтіс да веськӧтіс кысъялісьсӧ.
[4] Ыстӧммес локтісӧ да ӧддьӧн корисӧ Исуссӧ локны. Нія висьталісӧ: «Сія бур мортыс, веськӧт сылісь кысъялісьсӧ.
[5] Сія радейтӧ миянлісь отирсӧ, миянлӧ лэбтіс синагога».
[6] Исусыс муніс ныкӧт. Сія сибӧтчис веськӧтлісьыс горт дынӧ. Сэк веськӧтлісьыс ыстӧм паныт ассис ёрттэсӧ. Сія тшӧктӧм висьтавны: «Дӧсвидзись, эн мыдзӧт Асьтӧ! Кин ме сэтшӧмыс, медбы Тэ пырин менам керкуӧ?
[7] Ме абу сэтшӧм туяна морт, сійӧн и эг мун Тэ дынӧ ачым. Висьтав дзир кыв, и менам кысъялісьӧ веськалас.
[8] Ме вылын эмӧсь юраліссез. Сідз и ме кипод увтын воиннэз. Ӧтіклӧ висьтала: "Мун", и сія мунӧ. Мӧдіклӧ висьтала: "Лок", и сія локтӧ. Кысъялісьлӧ висьтала, мый керны, и сія керӧ».
[9] Сэтшӧмсӧ кылӧмсянь Исуссӧ диво кутіс. Сы сьӧрын локтісь отирлӧ Сія висьталіс: «Тіянлӧ баита: нельки Израиляс Ме эг адззыв сэтшӧм веритӧмсӧ».
[10] Паныт вовліссес бертісӧ керкуас. Нія казялӧмась: кысъялісьыс веськалӧм.
[11] Сыбӧрын Исусыс муніс Наин карӧ. Сыкӧт мунісӧ Сылӧн велӧтчиссес да уна мӧдік отир.
[12] Сія сибӧтчис карас пыран ыбӧссэз дынӧ. Сэтӧн пантасисӧ уна отир, кӧдна петкӧтӧны вӧлі дӧвалісь кулӧм зонсӧ. Сія дӧваыслӧн вӧлӧм ӧтнас.
[13] Дӧвасӧ казялікӧ Дӧсвидзисьыслӧ жаль лоис сійӧ. Сія инькаыслӧ висьталіс: «Эн горзы».
[14] Исусыс сибӧтчис да павкӧтчис зонкалӧн шой куйланін бердӧ. Нӧбӧтіссес сувтчисӧ. Сія висьталіс: «Зонка! Тэныт шуа, чеччы!»
[15] Кулӧмыс пуксис да пондіс баитны. Исусыс сійӧ сетіс мамыслӧ.
[16] Быдӧнныс повзисӧ, Енсӧ ошкӧмӧн баитісӧ: «Вынася-вына Енсянь юӧртісь сувтіс миян коласын! Еныс вовліс Аслас отир дынӧ!»
[17] Исус йылісь сэтшӧм юӧрыс паськаліс Иудеяын да сы гӧгӧр муэзын.
[18] Иоаныслӧн велӧтчиссес быдӧс юӧртӧмась сылӧ.
[19] Иоаныс корӧм кык велӧтчисьӧс. Нійӧ иньдӧм юасьны Исусыслісь: «Былись я Тэ Сія, Кинлӧ колӧ локны? Поди, мӧдікӧс видзчисьны миянлӧ?»
[20] Нія локтісӧ Исусыс дынӧ да висьталісӧ: «Пыртісь Иоан ыстіс миянӧс Тэ дынӧ юавны: "Сія я Тэ, Кинлӧ колӧ локны? Поди, мӧдікӧс миянлӧ видзчисьны?"»
[21] Сія кадӧ Исусыс унаӧс веськӧтіс висяннэзісь, шогӧттэзісь, унаись вашӧтіс сэрпӧсь ловвесӧ да уна синтӧмлісь осьтіс синнэсӧ.
[22] Исусыс нылӧ висьталіс: «Мунӧ да висьталӧ Иоаныслӧ быдӧс адззылӧмнытӧ да кылӧмнытӧ: ─ Синтӧммез адззӧны, чотіссез ветлӧтӧны, проказаӧн шогаліссез сӧстӧммӧны, пельтӧммез кылӧны, кулӧммез ловзьӧны, кориссезлӧ Бур Юӧр висьтасьӧны.
[23] Шуда мортыс, кӧда оз дугды Меным веритны».
[24] Иоаныссянь вовліссес мунісӧ. Сэк отирыслӧ Исусыс пондіс баитны Иоаныс йылісь: «Мый видзӧтны тійӧ ветліт кушмуас? Поди, тӧлӧн оклалӧм шать?
[25] Мый видзӧтны ветліт? Дона да басӧк паськӧмӧ пасьтасьӧм мортӧс? Дона паськӧмаэс олӧны-гажӧтчӧны ӧксу керкуэзын.
[26] Мый нӧ видзӧтны тійӧ ветліт? Енсянь юӧртісьӧс? Висьтала тіянлӧ: сідз и эм, Енсянь юӧртісься ыджытжыкӧс эд адззыліт.
[27] Сы йылісь гижӧмась этна кыввес: ─ Тэ одзын ыста Ассим юӧртісьӧс. Сія лӧсьӧтас Тэныт туйсӧ.
[28] Висьтала тіянлӧ: инькаэзӧн вайӧммез коласын абу ӧтік Енсянь юӧртісь ыджытжык Пыртісь Иоанся. Но Енлӧн Юраланінын учӧтжыкыс сысся ыджытжык».
[29] Сійӧ кывзісь отирыс, нельки вот ӧктіссес, Енсӧ шуисӧ веськыта Керисьӧн. И нія быдӧнныс пыртчисӧ Иоаныс пыртӧмӧн.
[30] Фарисейес да Туйдӧтӧ велӧтіссес эзӧ кывзӧ Енлісь тшӧктӧммесӧ ас йывсиныс. Нія эзӧ пыртчӧ Иоаныс пыртӧмӧн.
[31] Сэк Исусыс висьталіс: «Кин кодьӧсь ӧння кадӧ олісь отирыс? Кин вылӧ нія вачкисьӧны?
[32] Нія ӧтӧрын пукалісь челядь кодьӧсь. Ӧтамӧднысӧ кытсӧвтӧмӧн нія шуӧны: "Мийӧ орсім тіянлӧ пӧлянӧн, а тійӧ эдӧ йӧктӧ. Мийӧ тіянлӧ норӧн сьылім, а тійӧ эдӧ горзӧ".
[33] Локтіс Пыртісь Иоан. Сія нянь оз сёй, вина оз ю. Тійӧ тай баитат, сы пытшкын пӧ сэрпӧсь лов.
[34] Локтіс Морт Зон, сёйӧ-юӧ. Тійӧ тай баитат: "Эта мортыс радейтӧ сёйны да вина юны. Сія ёртасьӧ вот ӧктіссезкӧт да умӧльсӧ кериссезкӧт".
[35] Но Мывкыдлӧн челядь сьӧрті тыдалӧ: Мывкыдыс ─ бур».
[36] Ӧтік фарисей корис Исуссӧ гортас сёйны. Сія пырис фарисей керкуӧ да пуксис.
[37] Эта йылісь кылӧм карсис ӧтік умӧльсӧ керись инька. Сія вайис алебастр дозын чӧскыт руа ви.
[38] Исуслӧн коккез дынӧ сувтӧмӧн инькаыс горзіс, кисьтіс синвасӧ Сы коккез вылӧ да чышкис аслас юрсиӧн. Сія окаліс Исуслісь коккесӧ да мавтіс чӧскыт руа винас.
[39] Сійӧ быдӧс адззыліс гортас корись фарисейыс. Сія аслыс висьталӧм: «Вӧлі бы Сія Енсянь юӧртісь, сэк тӧдіс бы, кытшӧм инька Сы бердӧ павкӧтчӧ. Инькаыс эд умӧльсӧ керись».
[40] Фарисейланьӧ бергӧтчӧмӧн Исусыс горӧтчис: «Симон! Меным колӧ мыйкӧ тэныт висьтавны». Сія шуис: «Висьтав, Велӧтісь».
[41] Исусыс висьталіс: «Одзӧсӧ сеталісьлӧн вӧлісӧ кык одзӧсалісь. Ӧтыс одзӧстіс витсё динарий. Мӧдыс ─ витдас.
[42] Нылӧ кыкнанныслӧ немӧн вӧлі вештісьны. Сія кыкнаннысӧ эз тшӧкты вештісьны, нійӧ проститіс. Висьтав, кӧда ны коласісь пондас ӧддьӧнжык радейтны сійӧ?»
[43] Симоныс шуис: «Ме шуа дак, кӧдалӧн одзӧсыс вӧлі унажык». Исусыс сылӧ висьталіс: «Бура тэ висьталін».
[44] Инькаыслань бергӧтчӧмӧн Симоныслӧ висьталіс: «Адззан инькасӧ? Керкуат локтӧмӧ коста тэ васӧ эн сет миссьӧтны коккезӧс. Сія жӧ синванас киськаліс Менчим коккезӧс, аслас юрсиӧн чышкис.
[45] Тэ эн окав Менӧ. Сія Менам локтӧмсянь эз на дугдыв окавны Менчим коккезӧс.
[46] Тэ Менчим юрӧс эн мавт винас. Сія чӧскыт руа виӧн мавтіс Менчим коккезӧс.
[47] Сійӧн висьтала тэныт, мыля сія ёна радейтӧ: сылӧн эд уна умӧль керӧм проститӧм. Кинлӧ эд етша проститӧны, сія етша и радейтӧ».
[48] А инькаыслӧ висьталіс: «Тэнат умӧль керӧммет проститӧмӧсь».
[49] Сыкӧт ӧтлаын пукаліссес баитісӧ ас коласаныс: «Кин Сія, нельки проститӧ умӧль керӧммез?»
[50] Исусыс инькаыслӧ висьталіс: «Веритӧмыт тэнӧ мездіс, мун лӧнь сьӧлӧмӧн».