[1] Сибалісӧ Шӧмтӧм нянь сёян луннэз. Мӧднёж кӧ шуны, сія вежалуныс ─ Ыджыт лун.
[2] Аркирейес Туйдӧтӧ велӧтіссескӧт Исуссӧ мӧдісӧ вийны, да эзӧ тӧдӧ, кыдз сійӧ керны. Нія полісӧ отирсис.
[3] Даскык велӧтчись коласісь ӧтікыс пытшкӧ пырӧм сотана. Сійӧ велӧтчисьсӧ шуисӧ Искариот Иуда.
[4] Сія локтӧм аркирейез дынӧ да Вежа Керку сьӧрын видзӧтіссезлӧн веськӧтліссез дынӧ. Сія баитчӧм ныкӧт Исуссӧ вузалӧм йылісь.
[5] Мӧддэс гажмӧмась. Нія кӧсйӧмась сылӧ сетны сьӧм.
[6] Иуда нылӧ кӧсйисьӧм, сэсся пондӧм видзӧтчыны, кӧр лоас буржык отиртӧг вузавны Исуссӧ.
[7] Локтіс Шӧмтӧм нянь сёян лун. Сэк коліс начкывны Ыджыт лунся дзельӧс.
[8] Петрасӧ да Иоансӧ ыстікӧ Исусыс висьталіс: «Мунӧ, лӧсьӧтӧ миянлӧ Ыджыт лунся сёянсӧ».
[9] Мӧддэс юалісӧ: «Кытӧн тшӧктан лӧсьӧтны?»
[10] Исусыс нылӧ висьталіс: «Мунӧ карас, тіянлӧ пантасяс гырничын ва нуӧтісь морт. Тійӧ мунӧ сы бӧрсянь.
[11] Керкуас, кытчӧ сія пырас, сэтісь кӧзяиныслісь юалӧ: "Велӧтісьным юалӧ: Кӧда жырын Ме Аслам велӧтчиссезкӧт верма сёйны Ыджыт лунся дзельсӧ?"
[12] Сія мыччалас тіянлӧ ыджыт вылісь жыр, сія лӧсьӧтӧм ни. Сэтчин и лӧсьӧтӧ Ыджыт лунся сёянсӧ».
[13] Петраыс да Иоаныс мунісӧ да казялісӧ: быдӧс петіс Исуслӧн висьталӧм сьӧрті. Нія лӧсьӧтісӧ Ыджыт лунся сёянсӧ.
[14] Колан кадӧ Исусыс даскык апостолкӧт пуксис пызан сайӧ.
[15] Нылӧ висьталіс: «Ме ӧддьӧн видзчиси сёйны тіянкӧт Ыджыт лунся сёянсӧ Аслам пессьӧм-мырсьӧмӧдз.
[16] Висьтала тіянлӧ: ог ни понды Ыджыт лунся сёянсӧ сёйны Енлӧн Юралӧм локтытӧдз».
[17] Исусыс босьтіс юан доз, буркывтіс Енсӧ да висьталіс: «Босьтӧ, эстісь юӧ быдӧнныт.
[18] Висьтала тіянлӧ: ог ни понды юны виноград ягӧдсис юансӧ Енлӧн Юралӧм локтытӧдз».
[19] Сэсся босьтіс нянь, буркывтіс Енсӧ, чегис да велӧтчиссеслӧ сетікӧ шуис: «Эта Менам Вывтырӧ. Сія лоас сетӧм тіян понда. Сідз керӧ Менӧ тӧдвыланыт видзӧм могись».
[20] Сёйӧм бӧрас босьтіс юан доз да висьталіс: «Дозас ─ Енкӧт Виль Йитӧт, керӧм Менам Вирын. Сія киссьӧ тіян понда.
[21] То, Менӧ вузалісьлӧн киыс Мекӧт ӧтік пызан сайын.
[22] Висьтавны кӧ веськыта, Морт Зонкӧт лоас сідз, кыдз вӧлі одззасянь ни лӧсьӧтӧм. Но ӧддьӧн умӧль лоас Сійӧ вузалісь мортлӧ!»
[23] Нія пондісӧ юасьны ӧтамӧдныслісь, ны коласісь кин вермас сійӧ керны?
[24] Велӧтчиссес ас коласаныс пондісӧ етшасьны: кинӧс ны коласісь позьӧ пуктыны ыджытжыкнас.
[25] Исусыс нылӧ висьталіс: «Ӧксуэз ыждалӧны отир вылын. Юраліссезныс асьнысӧ пуктӧны бурсӧ кериссезӧ.
[26] Но тійӧ ны моз эд керӧ. Тіян коласын ыджытжыкыс ло учӧтжык кодь. Юралісьыс ─ кысъялісь кодь.
[27] Кин ыджытжык: пызан саяс пукалісьыс али сылӧ кысъялісьыс? Абу разь пукалісьыс? Ме эд тіян коласын кысъялісь кодь.
[28] Сьӧкыт кадӧ тійӧ пыр вӧліт Мекӧт.
[29] Меным Айӧ сетіс ӧксулісь юралан вын. Сійӧ юралан вынсӧ Ме сета тіянлӧ.
[30] Менам Юраланінын пондат сёйны-юны Мекӧт ӧтік пызан сайын. Юралан пукӧссэз вывсянь пондат суд вылас бӧрйисьны Израильлӧн даскык увтырись отиркӧт».
[31] Сэтӧн Исусыс висьталіс: «Симон! Симон! Сотанаыс корис тіянӧс тӧлӧтны шогдіӧс моз.
[32] Ме кейми тэ понда, медбы эн ӧшты веритӧмтӧ. Кӧр бӧр бертан, вынсьӧт ассит воннэтӧ».
[33] Петраыс висьталіс Сылӧ: «Дӧсвидзисьӧ! Тэкӧт ме и пуксьыны, и кувны муна».
[34] Исусыс сылӧ висьталіс: «Петра, висьтала тэныт: талун петукыс китсӧвттӧдз тэ куимись суськисян Менӧ тӧдӧмись».
[35] Исусыс нылӧ висьталіс: «Тіянӧс Ме ыстывлі сьӧмтӧг, кӧзичатӧг, кӧмтӧг. Коліс я сэк мыйкӧ тіянлӧ?» Нія шуисӧ: «Нем эз ков».
[36] Сэк Исусыс нылӧ висьталіс: «Ӧні кинлӧн эм кӧ сьӧм, кӧзича, босьтӧ нійӧ. Кинлӧн абу сьӧм, вузав ассит паськӧмтӧ да неб шыпурт.
[37] Тіянлӧ висьтала: Ме вылын керсясӧ Вежа Гижӧтас и эна висьталӧм кыввес: "Сійӧ лёк керисьӧ пуктісӧ". Ме йылісь гижӧмыс ӧні керсиссьӧ».
[38] Мӧддэс висьталісӧ: «Дӧсвидзись! Эстӧн кык шыпурт». Исусыс висьталіс: «Тырмасӧ».
[39] Карсис петӧм бӧрын Исусыс одззамоз кайис Виягӧд керӧс вылӧ. Сы бӧрсянь кайисӧ Сылӧн велӧтчиссес.
[40] Сэтчӧ локтӧм бӧрын нылӧ висьталіс: «Кеймӧ, медбы эд ылалӧ».
[41] Ачыс муніс ны дынісь шупкӧм из ылынаӧ, сувтіс пидзӧс вылас да пондіс кеймисьны:
[42] «Айӧ, колӧ кӧ Тэныт, нуӧт Ме дынісь сійӧ дозсӧ. Но ась оз ло Ме сьӧрті. Кер, кыдз Тэныт колӧ».
[43] Сэк енӧжсянь локтіс ангел да вынсьӧтіс Исуссӧ.
[44] Исусыслӧн сьӧлӧмыс пессис. Сысянь Сія ӧддьӧнжык кеймис. Сы коста Сылӧн ньылӧмыс вотяліс му вылас вир воттезӧн.
[45] Кеймӧмыс бӧрсянь Сія чеччис, локтіс велӧтчиссес дынӧ. Сія казяліс, тӧждісьӧмсяняс нылӧн садьныс бырӧм, и нія онмӧссьӧмась.
[46] Нылӧ висьталіс: «Мый тійӧ узят? Чеччӧ, кеймӧ, медбы эд ылалӧ».
[47] Исуслӧн баитӧм коста мыччисисӧ отир. Ны одзын оськаліс даскык коласісь Иуда нима велӧтчись. Сія сибӧтчис окыштны Исуссӧ. Иудаыс отирыслӧ висьталӧм, кӧдӧ пӧ ме окышта, Сія и эм Исусыс.
[48] Исусыс сылӧ висьталіс: «Иуда! Окалӧмнат вузалан Морт Зонсӧ?»
[49] Исускӧт сулаліссес лоӧмсӧ казялікӧ Сылӧ висьталісӧ: «Дӧсвидзись, поди, сӧтам шыпуртнас?»
[50] Ны коласісь ӧтік сӧтіс аркирей раблӧ да орӧтіс сылісь веськыт пельсӧ.
[51] Сэк Исусыс висьталіс: «Дугдӧ, тырмас!» Сія рабыслӧ павкӧтчис пель бердас да сійӧ веськӧтіс.
[52] Исуссӧ кутны ӧксьӧмась аркирейез, Вежа Керку сьӧрын видзӧтіссезлӧн веськӧтліссез, бӧрйӧм пӧриссез. Сія нылӧ висьталіс: «Шыпурттэзӧн да беддезӧн тійӧ петіт кутны Менӧ, кыдз лёк керисьӧс.
[53] Быд лун Ме тіянкӧт вӧлі Вежа Керкуын. Сэк тійӧ Менӧ эдӧ вӧрӧтӧ. Но ӧні тіян кадныт, пемытлӧн ыждалӧмыс».
[54] Исуссӧ нуӧтісӧ. Сійӧ вайӧтісӧ аркирей керкуӧ. Ылынкодя ны бӧрсянь муніс Петра.
[55] Йӧр шӧрас керисӧ би, отирыс пуксисӧ сы гӧгӧрӧ. Петраыс пуксис ны коласӧ.
[56] Ӧтік кысъялісь нывка би дынас пукавтӧн видзӧтӧв-керис Петраыс вылӧ да висьталіс: «И сія Сыкӧт вӧлі».
[57] Петраыс суськисис Исуссӧ тӧдӧмись. Сія шуис: «Инька, ме Сійӧ ог тӧд».
[58] Чожа мыйись сійӧ казяліс мӧдік да горӧтчис: «Тэ ны коласісь». Петраыс мортыслӧ висьталіс: «Абу!»
[59] Час гӧгӧр чулалӧм бӧрын кинкӧ тӧдӧмӧн моз висьталіс: «Вӧлі, даки, сія Сыкӧт, сія эд Галилеяись».
[60] Петраыс мортыслӧ висьталіс: «Ог вежӧрт, мый йылісь тэ баитан». Сы коста китсӧвтіс петук.
[61] Сэк Исусыс бергӧтчыштіс да видзӧтіс Петра вылӧ. Петраыслӧ усисӧ тӧдвылас Велӧтісьлӧн висьталӧм кыввес: «Петук китсӧвтӧмӧдз куимись суськисян Менӧ тӧдӧмись».
[62] Петраыс сэтісь петіс да пондіс горзыны курыт синваӧн.
[63] Исуссӧ видзись отирыс Сійӧ вартлісӧ, сералісӧ Сы вылын.
[64] Синнэсӧ вевттьӧмӧн нія сӧталісӧ Сылӧ чужӧмас да юасисӧ: «Енсянь юӧртісь, висьтав, кин Тэныт сӧтіс?»
[65] Уна умӧль кывсӧ висьтавлісӧ Сылӧ.
[66] Асъяпоннас ӧксьӧм судитан чукӧрыс: бӧрйӧм пӧриссес, аркирейес да Туйдӧтӧ велӧтіссес. Ны одзӧ вайӧтісӧ Исуссӧ.
[67] Нія юалісӧ: «Висьтав миянлӧ: Тэ я Кристос-Мездӧтісьыс?» Сія шуис: «Висьтала кӧ, одӧ веритӧ.
[68] Юала кӧ, Меным коланасӧ одӧ висьталӧ. Менӧ одӧ лэдзӧ.
[69] Ӧнісянь Морт Зон пуксяс вына Енкӧт веськыт ладорас».
[70] Быдӧнныс юалісӧ: «Сідзкӧ, Тэ Енлӧн Зон?» Сія шуис: «Тійӧ шуат, Ме пӧ».
[71] Мӧддэс висьталісӧ: «Кытшӧм сэсся висьталӧм миянлӧ колӧ? Мийӧ эд асьным кылім Сы ӧмись петӧм висьталӧмсӧ».