[1] Ӧтпыр Исусыс сулаліс Генисарет ты дорын. Отирыс дзескӧтчисӧ Сы гӧгӧрын. Нія локтісӧ кывзыны Енлісь кывсӧ.
[2] Сія казяліс ты дорсис кык пыж. Чери кыйиссес пыжжезсиныс петӧмась ни да миссьӧтісӧ кыяннэзнысӧ.
[3] Исусыс пырис Симон пыжӧ. Тшӧктіс пыжсӧ тойыштны ва дорсис. Исусыс велӧтіс отирсӧ пыжас пуксьӧмӧн.
[4] Велӧтны дугдӧм бӧрын Исусыс Симоныслӧ висьталіс: «Веськӧт пыдынінас. Ӧні вӧтьӧ ассиныт кыяннэзнытӧ ваас».
[5] Симоныс горӧтчис: «Велӧтісь! Мийӧ ойбыт уджалім да нем эг кыйӧ. Тэнат висьталӧм сьӧрті нӧ, вӧтя».
[6] Нія вӧтисӧ кыяннысӧ да кыйисӧ ӧддьӧн уна чери. Нельки кыяныс нылӧн пондіс орласьны.
[7] Киэзнаныс мыччалӧмӧн мӧд пыжсис ёрттэзнысӧ корисӧ локны отсавны. Нія локтісӧ, черинас тыртісӧ кыкнан пыжсӧ. Нія нельки пондісӧ вӧйны.
[8] Сэтшӧмсӧ казялӧмсянь Симон-Петраыс уськӧтчис Исусыс коккез дынӧ да висьталіс: «Велӧтісь, пет ме дынісь, ме эд умӧльсӧ керись морт».
[9] Сэтшӧм уна шедӧм черисяняс сія мӧддэскӧт ӧддьӧн повзис.
[10] Сэтӧн вӧлісӧ Симонлӧн ёрттэз, Зеведейлӧн Яков да Иоан зоннэз. Симоныслӧ Исусыс висьталіс: «Эн пов, ӧнісянь пондан кыйны отирӧс».
[11] Нія кыкнан пыжсӧ кыскисӧ му вылас. Быдӧс колисӧ да мунісӧ Исусыс сьӧрӧ.
[12] Кыдзкӧ Исусыс вӧлі ӧтік карын. Сэтчӧ локтіс проказаӧн шогалісь морт, кӧда Исуссӧ казялікӧ кыминь уськӧтчис Сы одзӧ му вылас. Сія кеймисьӧмӧн висьталіс: «Дӧсвидзисьӧ! Колӧ кӧ Тэныт, верман менӧ сӧстӧмтны».
[13] Исусыс нюжӧтіс кисӧ, павкӧтчис сы бердӧ да висьталіс: «Меным колӧ, сӧстӧммы». Сэк жӧ проказа шогӧтыс сылӧн чулаліс.
[14] Исусыс веськалӧм мортлӧ висьталіс: «Некинлӧ эн висьтась, кыдз веськалін. Мун мыччась вежауджалісьлӧ. Моисейыс тшӧктӧм сьӧрті аслат сӧстӧмсялӧм понда вай езъялан козин. Сідз пондасӧ тӧдны веськалӧмыт йылісь».
[15] Перыта паськаліс Исусыс йылісь юӧрыс. Сійӧ кывзыны да веськӧтчыны асланыс шогӧттэзісь Сы дынӧ ӧксьывлісӧ ӧддьӧн уна отир.
[16] Ачыс Исусыс кеймыны ветлывліс овтӧминнэзӧ.
[17] Ӧтік лунӧ Исусыс велӧтіс. Сэтӧн пукалісӧ и фарисейез Туйдӧтӧ велӧтіссезкӧт. Нія кывзыны локтӧмась Галилея да Иудея муэзісь быдласянь да Ерусалимись. Дӧсвидзись Ен вынӧн Исусыс веськӧтіс шогаліссесӧ.
[18] Ӧтіккез вайӧтісӧ ольпась вылын параличӧн личкӧм мортӧс. Нія пондылісӧ сійӧ пыртны керкуас, мӧдісӧ пуктыны Исусыс одзӧ,
[19] но эзӧ вермӧ пыртны, отирыс вӧлі уна да. Сэк нія кайисӧ керку вевдӧрас, разисӧ керку вевттянсӧ да сэті ольпасьнас лэдзисӧ шогалісьсӧ керку шӧрас Исусыс одзӧ.
[20] Веритӧмнысӧ адззикӧ Исусыс висьталіс: «Мортӧй, тэнат умӧль керӧммет проститӧмӧсь».
[21] Туйдӧтӧ велӧтіссес фарисейескӧт юраныс пыртісӧ: «Кин Сія сэтшӧмыс? Сія Еныс вылын сералӧ. Ӧтік Енся кин вермас проститны умӧль керӧммез?»
[22] Нылісь юраныс пыртӧмсӧ тӧдӧмсянь Исусыс нылӧ висьталіс: «Мый тійӧ сэтшӧмсӧ юраныт пыртіт?
[23] Мый кокнитжык висьтавны: "Тэнат умӧль керӧммет проститӧмӧсь" али мӧднёж висьтавны: "Чеччы да ветлӧт"?
[24] Ӧні тіянлӧ колӧ тӧдны: Морт Зон вермӧ проститны умӧль керӧммесӧ му вылас». Шогалісьыслӧ Сія висьталіс: «Тэныт шуа: чеччы, босьт ассит ольпасьтӧ да мун гортат».
[25] Сія сэтӧн жӧ чеччис, босьтіс ольпасьсӧ да Енсӧ ошкӧмӧн муніс гортас.
[26] Быдӧннысӧ диво кутіс. Нія ошкисӧ Енсӧ да повзьӧмувьяныс баитісӧ: «Мийӧ талун адззылім вӧвлытӧмӧ».
[27] Сэтісь петӧм бӧрын Исусыс казяліс Левий нима вот ӧктісьӧс. Сія пукалӧ вӧлі вот ӧктанінас. Исусыс горӧтчис: «Лок Ме сьӧрӧ».
[28] Левийыс чеччис, быдӧс колис да муніс Исусыс сьӧрӧ.
[29] Левийыс гортас Исус понда лӧсьӧтіс ыджыт пызан вылӧ бур сёян. Ӧтлаын пызан саяс вӧлісӧ уна вот ӧктіссез да и мӧдіккез.
[30] Туйдӧтӧ велӧтіссес фарисейескӧт Исуслӧн велӧтчиссезлӧ лӧгӧн висьталісӧ: «Мыля тійӧ сёят вот ӧктіссезкӧт да умӧльсӧ кериссезкӧт?»
[31] Исусыс нылӧ висьталіс: «Веськӧтісьыс колӧ шогалісьлӧ, оз ков шогӧттӧмыслӧ.
[32] Ме эг лок корны Ен сьӧрті веськыта оліссесӧ, локті корны Еныс дынӧ умӧльсӧ кериссесӧ».
[33] Сэк нія Исусыслӧ висьталісӧ: «Иоаныслӧн велӧтчиссес уна кӧслуналӧны, кеймӧны. Сідз и фарисейезлӧн велӧтчиссес керӧны, а Тэнат тай сёйӧны да юӧны».
[34] Сія нылӧ висьталіс: «Вермат я тшӧктыны кӧслунавны гӧтрасись зонкӧт гажӧтчиссесӧ гӧтрасьӧмсӧ порйӧтӧм коста?
[35] Локтас кад, мырддясӧ нылісь гӧтрасись зонсӧ. Сэк нія пондасӧ кӧслунавны».
[36] Сэтӧн Сія висьталіс нылӧ велӧтан висьт: «Некин оз косяв виль паськӧмись дӧмас важ паськӧм вочӧм понда. Вильсӧ сэк косялас, да и важыс дынӧ оз лӧсяв вильсис дӧмасыс.
[37] Некин оз кисьт виль винасӧ важ кучик дозӧ. Виль винаыс поткӧтас дозсӧ, и винаыс петас, да и дозыс потас.
[38] Виль винасӧ колӧ кисьтны виль кучик дозӧ. Сэк кыкнанныс быдсаӧсь кольччӧны.
[39] Некин важ винасӧ юӧм бӧрсянь сэк жӧ оз понды юны вильсӧ. Баитӧны тай: "Важыс буржык"».