[1] Сыбӧрын Исусыс бӧра мыччасис Аслас велӧтчиссезлӧ Тивериада ты дорын.
[2] Сэк ӧтлаын вӧлісӧ Симон-Петра, Фома, мӧднёж ─ «Двойнишнӧй», Галилея муын Кана карись Нафанаил, Зеведейлӧн зоннэз да Исусыслӧн мӧдік кык велӧтчись.
[3] Симон-Петра шуис нылӧ: «Муна кыйны чери». Мӧддэс сылӧ шуисӧ: «И мийӧ тэкӧт мунам». Мунісӧ, пуксисӧ пыжӧ. Сія ойӧ нія нельки ӧтік чериок эзӧ кыйӧ.
[4] Асывнас Исусыс сулаліс ва дорас. Велӧтчиссес Сійӧ эзӧ тӧдӧ.
[5] Исусыс нылісь юаліс: «Челядь! Тіян эм кытшӧмкӧ сёян?» Нія сылӧ висьталісӧ: «Абу».
[6] Сэк Исусыс нылӧ висьталіс: «Вӧтьӧ чери кыяннытӧ пыжсяняс веськыт ладорас, сэк кыят». Велӧтчиссес вӧтисӧ. Нія эзӧ вермӧ кыскыны кыяннысӧ, сымда сэтчӧ шедӧм чериыс.
[7] Сэк велӧтчисьыс, кӧдӧ радейтіс Исусыс, шуис Петраыслӧ: «Сія ─ Дӧсвидзисьным». Симон-Петра сэк вӧлі пасьтӧм. Сійӧ кылӧм бӧрын сія кӧртасис паськӧмнас да уськӧтчис ваас.
[8] Мӧд велӧтчиссес уйисӧ пыжнас. Нія эд вӧлісӧ матын, кытӧнкӧ сё метра гӧгӧр ва дорсяняс. Сьӧкыта кыскисӧ сьӧраныс кыянсӧ шедӧм черинас.
[9] Нія петісӧ васис, казялісӧ керӧм бисӧ. Ӧгыррес вылын вӧлі чери, ордчӧн куйліс нянь.
[10] Исусыс шуис велӧтчиссеслӧ: «Кыйӧмсиныт вайӧ кынымкӧ чериок».
[11] Симон-Петра муніс кыскыны васис шедӧм черинас кыянсӧ. Сэтӧн быдӧс вӧлі гырись чери. Чериэс шедӧмась сё витдас куима. Сымда кыйӧм черисяняс кыянныс абу и косясьӧм.
[12] Исусыс шуис нылӧ: «Локтӧ, сёйӧ». Велӧтчиссес эзӧ лысьтӧ юавны Сылісь, кин Сія. Нія тӧдісӧ ни: Сія ─ Дӧсвидзисьыс.
[13] Исусыс сибӧтчис, босьтіс няньсӧ, черисӧ да сетіс велӧтчиссеслӧ.
[14] Сэтӧн Исусыс куимӧтісь мыччасис велӧтчиссеслӧ ловзьӧм бӧрас.
[15] Сёйӧм бӧрас Исусыс юаліс Симон-Петралісь: «Ионалӧн Симон, радейтан я тэ Менӧ мӧддэсся буржыка?» Петраыс Сылӧ висьталіс: «Радейта. Тэ эд тӧдан: ме Тэнӧ радейта». Исусыс висьталіс сылӧ: «Видзӧт Менам дзеллез сьӧрын».
[16] Исусыс бӧра юаліс: «Ионалӧн Симон, радейтан я тэ Менӧ?» Петраыс шуис: «Радейта. Тэ эд тӧдан: ме Тэнӧ радейта». Исусыс сылӧ висьталіс: «Тӧждісь менам баляэз понда».
[17] Исусыс куимӧтісь юаліс: «Ионалӧн Симон, радейтан я тэ Менӧ?» Петраыс гажтӧмсяліс, мыля Исусыс куимӧтісь ни юалӧ сылісь, радейтӧ я Сійӧ. Петраыс висьталіс Исусыслӧ: «Дӧсвидзись, Тэ эд быдӧс тӧдан. Тэ тӧдан: ме Тэнӧ радейта». Исусыс висьталіс сылӧ: «Видзӧт Менам баляэз сьӧрын.
[18] Тэныт быльсӧ веськыта висьтала: томувьят тэ йыасьлін ачыт, ветлӧтін сэті, кытӧн тэныт коліс. Пӧрисьман, киэтӧ лэбтан, косат йысӧ домалас мӧдік, нуӧтас сэтчин, кытчӧ тэ эн лӧсьӧтчы мунны».
[19] Исусыс сідз висьталіс одзланьсясӧ: кыдз Петраыс аслас кулӧмӧн ваяс ошкӧмсӧ Еныслӧ. Сідз висьталӧм бӧрын шуис: «Лок Ме бӧрсянь!»
[20] Петраыс бергӧтчис бӧрлань да казяліс: сы бӧрын оськалӧ велӧтчись, кӧдӧ радейтіс Исусыс. Эта вӧлі сія велӧтчисьыс, кӧда рытнас сёйӧмныс коста Исусыс дынӧ матына сибӧтчӧмӧн юаліс: «Дӧсвидзись, кин Тэнӧ вузалас?»
[21] Петраыс казяліс сійӧ да юаліс Исусыслісь: «Дӧсвидзись, а сыкӧт мый лоас?»
[22] Исусыс Петраыслӧ висьталіс: «Меным колӧ кӧ, медбы сія оліс локтытӧдззам, мый тэныт сы дорӧдз? Тэ мун Ме бӧрсянь».
[23] Сійӧн воннэз коласын паськаліс юӧр: сія велӧтчисьыс пӧ оз кув. А Исусыс эз висьтав сылӧ, оз пӧ сія кув. Сія шуис: «Меным колӧ кӧ, медбы сія оліс локтытӧдззам, мый тэныт сы дорӧдз?»
[24] Сія велӧтчисьыс и висьтасьӧ быдӧс лоӧмыс йылісь, гижис сы йылісь. Тӧдам: сія висьтасьӧ быльсӧ.
[25] Уна мый и мӧдікӧ керис Исусыс. Гижны кӧ сьӧрсьӧн-бӧрсьӧн керӧмыс йылісь быдӧс, натьтӧ, гижӧм небӧггес эзӧ бы тӧрӧ му вылас. Аминь.