[1] Сійӧ висьталӧм бӧрын Исусыс видзӧтіс енӧжӧ да шуис: «Айӧ! Локтіс кад мыччавны Зонытлісь югьялан вынсӧ, медбы Зоныт вермис мыччавны Тэнчит югьялӧмтӧ.
[2] Тэ быдӧннысӧ сетін Сы кипод увтӧ. А Сія сетас пырся олан быдӧнныслӧ, кинӧс Тэ Сылӧ сетін.
[3] А пырся оланыс то мыйсянь: Тэнӧ, ӧтік былись Енсӧ да Тэнчит ыстӧм Кристос Исуссӧ тӧдӧмсянь.
[4] Ме мыччалі Тэнчит югьялан вынтӧ му вылас, кери Тэнчит сетӧм уджсӧ.
[5] Айӧ, ӧні босьт Менӧ дынат, сет Меным Ассит югьялӧмтӧ. Сія югьялӧмыс Менам вӧлі Тэ дынын эшӧ быдӧс аркмӧтӧмӧдз.
[6] Ме осьті Тэнчит нимтӧ отирыслӧ, кӧднӧ Тэ сетін Меным му вылас. Нія вӧлісӧ Тэнат, Тэ нійӧ сетін Меным. Нія видзсьӧны Тэнат Кыв бердӧ.
[7] Ӧні нія вежӧртісӧ: быдӧс, мый Тэ Меным сетін, петӧ Тэсянь.
[8] Тэнчит кывветӧ Ме нылӧ висьталі. Нія кывветӧ босьтісӧ да вежӧртісӧ: Ме былись локті Тэ дынісь. Нія пондісӧ веритны: Тэ Менӧ ыстін.
[9] Ме кора ны понда, кӧднӧ Тэ Меным сетін, нія эд Тэнатӧсь. Ог кор быдӧс отир понда.
[10] Быдӧс, мый Менам эм, сія Тэнат. Быдӧс, мый Тэнат, сія Менам. Нія ваясӧ Меным ошкӧмсӧ.
[11] Ме абу ни татӧн му вылас, Ме муна Тэ дынӧ. Но нія кольччӧны татчӧ. Вежа Айӧ! Видз Меным сетӧмметӧ Аслат ним понда. Мийӧ Тэкӧт ӧтік, ась и нія миян моз йитчӧны, лоӧны ӧтік.
[12] Му вылас ӧтлаын ныкӧт овтӧн Ме видзи нійӧ Тэнат ним понда. Меным сетӧммет коласісь некин эз ӧш, дзир сія, кӧдалӧ коліс ӧшны. Керсис Вежа Гижӧтын висьталӧм сьӧрті.
[13] Ӧні Ме муна Тэ дынӧ. Кытчӧдз Ме му вылас, нылӧ быдӧс этӧ висьтала, медбы Менам гажӧ тыртіс и нылісь сьӧлӧммезнысӧ.
[14] Ме сеті нылӧ Тэнчит кывтӧ. Ӧні нія отирыслӧ син вылӧ эзӧ пондӧ ковны сійӧн, мыля нія абу эта му вылісь, кыдз и Ме абу эта му вылісь.
[15] Ог кор босьтны нійӧ му вывсис, кора видзны нійӧ умӧльсис.
[16] Нія эд абу эта му вылісь, кыдз и Ме абу эта му вылісь.
[17] Кер нійӧ вежаэзӧн Аслат быльӧн. Быльыс ─ Тэнат Кылыт.
[18] Тэ Менӧ ыстін отирыс дынӧ, а ӧні Ме нійӧ ысті отирыс дынӧ.
[19] Ме сета Тэныт Ачымӧс ны понда, медбы быльыс керис нійӧ вежа отирӧн.
[20] Ме ог кор дзир ны понда. Кора и ны понда, кӧдна пондасӧ веритны Меным ны висьталӧмсянь.
[21] Нія ась лоасӧ ӧтлаасьӧмӧсь миян пытшкын, кыдз Тэ, Айӧ, Ме пытшкын, а Ме ─ Тэ пытшкын. Отирыс ась пондӧны веритны: Тэ Менӧ ыстін.
[22] Тэ Меным сетін югьялан вынтӧ. Сійӧ Ме сеті нылӧ. Миян моз ась и нія лоӧны ӧтвыв.
[23] Ме ны пытшкын, Тэ Ме пытшкын. Ась нія быдӧнныс быдӧсын лоӧны ӧтік. Му вылісь отирыс ась пондӧны тӧдны: Тэ ыстін Менӧ, и Тэ радейтан нійӧ Менӧ моз.
[24] Айӧ! Меным колӧ, медбы Меным Тэнат сетӧммес вӧлісӧ сэтчин, кытӧн Ме лоа. Нія ась адззӧны Менчим югьялӧмсӧ, кӧдӧ Тэ Меным сетін. Быдӧс аркмӧтӧмӧдз эд Тэ Менӧ радейтін ни.
[25] Веськыта олісь Айӧ! Отирыс Тэнӧ озӧ тӧдӧ, а Ме Тэнӧ тӧда. Пондісӧ тӧдны и Тэнат сетӧммес: Тэ ыстін Менӧ.
[26] Ме велӧті нійӧ тӧдны Тэнӧ и эшӧ велӧта, медбы сэтшӧм радейтӧмыс, кыдз Тэ Менӧ радейтан, вӧлі ны пытшкын, и медбы Ме ны пытшкын олі».