[1] «Ме сійӧ висьталі, медбы тійӧ веритӧмсис мӧдӧрӧ эд бӧбасьӧ.
[2] Тіянӧс вашӧтасӧ синагогаэзісь. Сибалӧ сэтшӧм кад, кӧр тіянӧс пондасӧ вийлыны. Вийиссес пондасӧ шуны, сідз пӧ нія кысъялӧны Енлӧ.
[3] Нія озӧ тӧдӧ Айӧс да Менӧ, сійӧн и пондасӧ сідз керны.
[4] Ме тіянлӧ сійӧ висьталі, медбы тійӧ уськӧтіт тӧдвыланыт Менчим висьталӧмӧс, кӧр локтас сія кадыс. Одзжык Ачым вӧлі тіянкӧт, сійӧн сы йылісь эг баитлы».
[5] «Ӧні муна Менӧ Ыстісь дынӧ. И некин одӧ юалӧ, кытчӧ Ме муна.
[6] Но Менам висьталӧмсянь гажтӧмыс тыртіс тіянлісь сьӧлӧммезнытӧ.
[7] Ме былись тіянлӧ баита: тіянлӧ буржык лоас, Ме муна кӧ. Ог кӧ мун, Дорйисьыс оз лок тіян дынӧ. Ме муна кӧ, иньда Сійӧ тіян дынӧ.
[8] Сія локтас да отирыслӧ висьталас умӧль керӧмныс йылісь, Ен сьӧрті веськыта олӧм йылісь да суд йылісь.
[9] Висьталас умӧль керӧмныс йылісь, мыля озӧ веритӧ Меным.
[10] Ен сьӧрті веськыта олӧм йылісь висьталас, мыля Ме муна Айӧ дынӧ, сэсся Менӧ одӧ ни адззылӧ.
[11] Висьталас суд йылісь, эта му вылын ыждалісьыс эд судитӧм ни.
[12] Уна мый верма тіянлӧ висьтавны, но ӧні тійӧ сійӧ одӧ вермӧ пыртны юраныт.
[13] Быльыслӧн Лолыс локтас да велӧтас тіянӧс быдӧс быляс. Сія оз понды баитны Ассяняс. Пондас баитны кылӧмсӧ да юӧртас одзланьсясӧ.
[14] Сія босьтас Месянь да юӧртас тіянлӧ. Сідз Сія Меным ваяс ошкӧмсӧ.
[15] Быдӧс, мый эм Айӧлӧн, сія Менам. Сійӧн Ме и висьталі: Лолыс юӧртас тіянлӧ Месянь кылӧмсӧ».
[16] «Менӧ тійӧ чожа ӧштат син одзсиныт. Сыбӧрын чожа мыйись бӧра Менӧ казялат, Ме эд муна Айӧ дынӧ».
[17] Сэтӧн Сылӧн мукӧд велӧтчиссес шуисӧ ӧтамӧдныслӧ: «Мый Сія мӧдӧ висьтавны сідз баитӧмнас: "Чожа Менӧ ӧштат син одзсиныт. Сыбӧрын чожа мыйись бӧра казялат," и "Ме муна Айӧ дынӧ"?»
[18] Нія баитісӧ сідз: «Мыля Сія шуӧ, чожа пӧ? Мийӧ огӧ вежӧртӧ, мый йылісь Сія баитӧ».
[19] Исусыс тӧдіс, мый нія мӧдісӧ юавны. Сія шуис: «Ӧтамӧднытлісь юасят Менам висьталӧм йылісь "Чожа Менӧ ӧштат син одзсиныт, сыбӧрын чожа мыйись бӧра казялат Менӧ"?
[20] Тіянлӧ быльсӧ веськыта висьтала: тійӧ пондат горзыны, синва кисьтны, а отирыс гажмасӧ. Тіянӧс гажтӧмыс кутас, но тіян гажтӧмсялӧмныт вежсяс гаж вылӧ.
[21] Новйӧтчись инька тӧждісьӧ, локтіс эд кад вайны кагасӧ. Кагасӧ вайӧм бӧрын гажувьяс тӧждісьӧмсӧ вунӧтӧ. Му вылас эд морт шогмис.
[22] Сідз и тійӧ ӧні. Гажтӧмыс тыртіс тіянлісь сьӧлӧммезнытӧ. Но Ме бӧра адззисьла тіянкӧт, сэк тіян сьӧлӧмныт гажмас. Тіянлісь сійӧ гажсӧ некин оз вермы мырддьыны.
[23] Сія лунӧ тійӧ Менчим нем ни одӧ юалӧ. Тіянлӧ быльсӧ веськыта висьтала: Айӧлісь мый корат Менам нимӧн, Сія сетас тіянлӧ.
[24] Ӧнӧдз тійӧ Менам нимӧн нем эдӧ корлӧ. Корӧ ─ тіянлӧ сетасӧ, медбы сьӧлӧмныт тырис гажнас».
[25] «Талуння лунӧдз Ме баиті тіянкӧт велӧтан висьттэзӧн. Локтас кад, кӧр ог ни понды баитны тіянлӧ велӧтан висьттэзнас. Сэк веськыта висьтала тіянлӧ Айӧ йылісь.
[26] Сія лунӧ пондат корны Менам нимӧн. Ог шу тіянлӧ: Ме понда корны Айӧс тіян понда.
[27] Айӧ Ачыс радейтӧ тіянӧс. Тійӧ эд пондіт Менӧ радейтны да веритат Ен дынсянь локтӧмам.
[28] Му вылас Ме локті Айӧ дынсянь. Ӧні му вывсис Ме бӧр берта Айӧ дынӧ».
[29] Велӧтчиссес шуисӧ Сылӧ: «Ӧні Тэ веськыта висьталін, он ни баит велӧтан висьттэзнас.
[30] Ӧні адззам: Тэ тӧдан быдӧс. Миян юавтӧдз Тэ тӧдан ни, мый висьтавны. Сійӧн веритам: Тэ локтін Ен дынсянь».
[31] Исус шуис нылӧ: «Ӧні веритат?
[32] Локтӧ кад, да и эта кадыс локтіс ни. Тійӧ рознитчат, Менӧ ӧтнамӧс колят. Но Ме абу ӧтнам, Айӧ эд Мекӧт.
[33] Сідз Ме висьталі тіянлӧ, медбы тійӧ Меын адззитӧ лӧньсӧ. Тіянлӧ му вылас лоас сьӧкыт, но тійӧ эд полӧ, Ме верми му вылісьсӧ».