[1] Дӧсвидзисьлӧн велӧтчиссез вылӧ Савлыслӧн одззамоз петіс лӧгыс. Сія нійӧ быдӧннысӧ мӧдіс вийны. Сійӧн локтіс аркирей дынӧ.
[2] Сылісь корис гижӧттэз Дамаскын синагогаэзӧ, медбы сэтчинісь вермис кошшыны Исуслӧн велӧтӧм сьӧрті оліссесӧ. Адззас кӧ сэтшӧммесӧ, ай морт, инька я, нійӧ быдӧннысӧ кӧрталӧмӧн лӧсьӧтчис вайӧтны Ерусалимӧ.
[3] Савлыс сибӧтчис Дамаск кар дынӧ. Видзчисьтӧг енӧжсяняс сійӧ кытшӧвтіс югьялӧм.
[4] Савлыс усис му вылас. Сія кыліс баитан шы: «Савл, Савл! Мыля тэ Менӧ вашӧтан?»
[5] Сія юаліс: «Дӧсвидзисьӧ, кин тэ?» Мӧдыс висьталіс: «Ме ─ Исус, тэ Менӧ эд вашӧтан. Сьӧкыт тэныт мунны паныт лэчыт йыла зорлӧ».
[6] Савлыс ӧддьӧн повзис. Зэгсьӧмӧн сія юаліс: «Дӧсвидзисьӧ, мый тшӧктан меным керны?». Исусыс сылӧ висьталіс: «Чеччы, мун карӧ. Сэтчин тэныт висьталасӧ, мый тэныт керны».
[7] Савлкӧт мунісь йӧз повзьӧмувьяныс эзӧ лысьтӧ вӧрзьӧтчыны. Нія баитісьсӧ адззытӧг тай кылісӧ сылісь баитӧмсӧ.
[8] Савлыс му вывсис чеччис. Осьта синнэзӧн нем эз понды адззыны. Ки пӧлӧт нуӧтӧмӧн вайӧтісӧ сійӧ Дамаск карӧ.
[9] Куим лун сьӧрна сія нем эз адззы, эз сёй, эз ю.
[10] Дамаскас оліс Ананий нима Исуслӧн велӧтчись. Дӧсвидзисьыс мыччалӧмӧн висьталіс сылӧ: «Ананий!» Мӧдыс шуис: «Ме эстӧн, Дӧсвидзисьӧ».
[11] Дӧсвидзисьыс висьталіс Ананийыслӧ: «Чеччы, мун Веськыт нима туй дорись Иуда керкуӧ. Сэтчин юав мортӧс, кӧда чужис Тарсын, нимыс сылӧн Савл. Ӧні сія кеймӧ.
[12] И Савлыс адззыліс Енсянь мыччалӧмсӧ: пырӧ Ананий нима морт, сибӧтчӧ да пуктӧ сы вылӧ киэсӧ, медбы сылӧн синнэс пондісӧ адззыны».
[13] Ананийыс висьталіс: «Дӧсвидзисьӧ! Унасянь ме кывлі сія морт йылісь. Ерусалимын Тэнат вежа отирлӧ сія керис уна лёксӧ.
[14] Сія локтіс аркирейезсянь гижӧтӧн, медбы и татӧн вермис кутны Тэнӧ нимнат быд корисьсӧ».
[15] Дӧсвидзисьыс сылӧ висьталіс: «Мун. Сія Менам бӧрйӧм морт. Сія пондас висьтасьны Менам ним йылісь быдпӧлӧс отирлӧ, ӧксуэзлӧ да и Израиль отирлӧ.
[16] Ме Савлыслӧ мыччала, мымда пессьӧм-мырсьӧмыс сылӧ усяс Менам ним понда».
[17] Ананий муніс, пырис Иуда керкуӧ. Сія пуктіс Савлыс вылӧ киэсӧ да висьталіс: «Савл вонӧ! Туй вылӧт мунтӧн тэныт мыччасьӧм Дӧсвидзись Исус. Ӧні Сія ыстіс менӧ тэ дынӧ, медбы тэ пондін адззыны да тырин Вежа Лолӧн».
[18] Сэтӧн Савлыслӧн синнэзсис мыйкӧ кыш моз усис. Сія пондіс адззыны да сэк жӧ пыртчис.
[19] Сёйӧм бӧрын Савлыс вынсяліс. Дамаскас кынымкӧ лун сьӧрна Савлыс вӧлі велӧтчиссескӧт.
[20] Савлыс сія кадсянь синагогаэзын пондіс юӧртны Исусыс йылісь: Сія ─ Енлӧн Зон.
[21] Кывзіссесӧ быдӧннысӧ диво кутіс. Нія баитісӧ: «Абу разь эта сія, кӧда Ерусалимас летіс-вотіс Исуссӧ нимнас кориссесӧ? Натьтӧ, сія и татчӧ локтіс нійӧ кӧртавны да нуӧтны аркирейез дынӧ?»
[22] Савлыс лунісь лунӧ вынсяліс. Дамаскын олісь иудейесӧ баитӧмнас паймӧмӧдз воштывліс. Сія вежӧртӧтліс: Исусыс ─ Кристос-Мездӧтісь.
[23] Чулаліс унакодь кад. Сэк иудейес баитчӧмась вийны Савлсӧ.
[24] Савлыслӧ кывсис нылӧн баитчӧмныс. Иудейес уна ойлун сьӧрна видзӧтісӧ карсис петан ыбӧссэз сьӧрын, медбы вийны Савлсӧ.
[25] Но ойнас велӧтчиссес пуксьӧтісӧ сійӧ кудӧ да лэдзисӧ карись из йӧр сайӧ.
[26] Савлыс локтіс Ерусалимӧ. Сія мӧдіс пантасьны Исуслӧн велӧтчиссескӧт. Но быдӧнныс полісӧ сыись. Сылӧн велӧтчисьӧ пӧртчӧмас нія эзӧ веритӧ.
[27] Сэк Варнава сійӧ босьтіс да вайӧтіс апостоллэс дынӧ. Нылӧ висьтасис Савллӧн Дӧсвидзисьсӧ туй вылын адззылӧм йылісь да Сылісь висьталӧмсӧ. Варнаваыс висьтасис Савлыслісь Дамаскас Исус нимӧн повтӧг висьтасьӧмсӧ.
[28] Сэксянь Савлыс оліс ныкӧт. Ӧтлаын ныкӧт ветлӧтіс Ерусалимын, повтӧг висьтасис Дӧсвидзись Исус нимӧн Бур Юӧрсӧ.
[29] Сія сёрнитіс, нельки етшасис грек кыв вылын баитісь иудейезкӧт. Нія лӧсьӧтчисӧ сійӧ вийны.
[30] Эта йылісь кылӧм бӧрын воннэз ыстісӧ Савлсӧ Кесарияӧ, сэтчинсянь ─ Тарс карӧ.
[31] Иудея, Самария да Галилея муэз пасьта вичкуэзлӧн вӧлі лӧнь кад. Нія олісӧ Дӧсвидзисьсис полӧмӧн да вынсялісӧ. Вежа Лов ӧзйӧтӧмсянь вичкуэс содісӧ-паськалісӧ.
[32] Петра быд карсӧ кытшӧвттӧн локтіс Лидда карись вежа отир дынӧ.
[33] Сэтчин сія адззис Ӧней нима мортӧс. Сія мортыс вӧлі личкӧм параличӧн и кыкьямыс во сьӧрна куйлӧм ольпасьын.
[34] Петра висьталіс сылӧ: «Ӧней! Кристос Исусыс тэнӧ веськӧтӧ. Чеччы да ӧкты ольпасьтӧ!» Мортыс перыта чеччис.
[35] Лиддаын да Саронын быд олісь адззыліс веськӧтӧм мортсӧ. Нія бергӧтчисӧ Дӧсвидзисьлань, пондісӧ Сылӧ веритны.
[36] Иоппия карын оліс Тавифа нима инька, кӧда вӧлі Исуслӧн велӧтчиссез коласісь. Тавифа нимсӧ вуджӧтны кӧ, лоӧ «газель». Сія уна керис бурсӧ отирыслӧ, отсаліс умӧля олісь йӧзлӧ.
[37] Петралӧн Лиддаас вовлӧм коста Тавифаыс пондӧм шогавны да кулӧм. Сійӧ миссьӧтӧмась да пуктӧмась вылісь жырас.
[38] Велӧтчиссеслӧ кывсьӧм Петралӧн Иоппияас локтӧм йылісь. Лиддасянь Иоппияыс вӧлі матын. Нія кык мортӧс ыстӧмась корны Петрасӧ, тшӧктӧмась сійӧ чожажык локны ны дынӧ.
[39] Петраыс лӧсьӧтчис да муніс ныкӧт. Локтӧм бӧрын сійӧ пыртісӧ вылісь жырас. Сэтӧн сы гӧгӧрӧ ӧксисӧ горзісь дӧваэз. Нія мыччалісӧ паськӧммез, кӧдӧ Тавифаыс вурлӧм ныкӧт овтӧн.
[40] Петраыс быдӧннысӧ ыстіс ӧтӧрас, сувтіс пидзӧс вылӧ да кеймис. Кулӧмыслӧ сія висьталіс: «Тавифа! Чеччы». Тавифаыс осьтіс синнэсӧ, казяліс Петрасӧ да пуксис.
[41] Петраыс сылӧ сетіс кисӧ да чеччӧтіс. Сэсся сія корис сэтчӧ дӧваэсӧ да мӧд веритіссесӧ, ны одзӧ сувтӧтіс ловья Тавифасӧ.
[42] Иоппияас быдыс пондіс тӧдны лоӧмыс йылісь. Сійӧн унаӧн пондісӧ веритны Дӧсвидзисьлӧ.
[43] Петраыс дыркодь оліс Иоппияас. Сія сувтчис кучик керись Симон ордын.