[1] Аполлосыс вӧлі Коринфын. Сы коста Павелыс муніс керӧса муэзӧт да локтіс Ефесӧ. Сэтчин адззис кынымкӧ велӧтчисьӧс.
[2] Сія нылісь юаліс: «Козьналіс я Еныс тіянлӧ Вежа Ловсӧ, кӧр пондіт веритны?» Нія висьталісӧ: «Мийӧ Вежа Лолыс йылісь эгӧ и кывлӧ».
[3] Павелыс нылісь юаліс: «Кытшӧм пыртчӧмӧн нӧ тійӧ пыртчит?» Мӧддэс висьталісӧ: «Иоаныс пыртӧмӧн».
[4] Павелыс шуис: «Иоаныс пыртіс нійӧ, кӧдна бергӧтчисӧ умӧль керӧммезныс дынісь. Отирсӧ сія тшӧктіс веритны сы бӧрын Локтісьлӧ. А сы бӧрын Локтісьыс ─ Кристос Исус».
[5] Сійӧ кылӧм бӧрын нія пыртчисӧ Дӧсвидзись Исус нимӧн.
[6] Павелыс пуктіс ны вылӧ киэсӧ. Сэк Вежа Лолыс лэдзчисис пыртӧммес вылӧ. Нія пондісӧ баитны мӧдік кыввез вылын да Енсянь юӧртны.
[7] Быдӧссӧ нія вӧлісӧ даскык морт гӧгӧр.
[8] Павелыс локтіс синагогаӧ. Сія куим тӧлісь сьӧрна сёрнитіс отиркӧт: повтӧг висьтасис, велӧтіс-осьтіс Енлӧн Юралӧм йылісь.
[9] Мукӧдыс чорзьӧтісӧ сьӧлӧммезнысӧ да эзӧ веритӧ. Быдӧнныс одзын умӧль кыввезӧн видісӧ Дӧсвидзисьлӧн Туй йылісь велӧтӧмсӧ. Сэк Павелыс велӧтчиссескӧт ны дынісь муніс. Сэксянь сія быд лун баитіс-велӧтіс Тиранлӧн велӧтанінын.
[10] Сідз кыссис кык во сьӧрна. Сійӧн Дӧсвидзись Исус йылісь юӧртӧмсӧ кылісӧ Асия пасьта оліссез быдӧнныс: кыдз иудейез, сідз и мӧдік отир.
[11] Павел пыр Еныс аркмӧтліс вына адззывлытӧм керӧммез.
[12] Шогаліссез вылӧ пуктывлісӧ Павелыслісь новьян чышьяннэсӧ да йыэсӧ. Сэк шогӧт-висяннэз нылӧн чулавлісӧ, сэрпӧсь ловвез ны пытшкись петлывлісӧ.
[13] Иудейес коласын вӧлісӧ ветлӧтісь тӧдіссез. Нія Дӧсвидзись Исусыс нимӧн отирись пондісӧ вашӧтлыны сэрпӧсь ловвесӧ. Шувлісӧ сідз: «Исус нимӧн, кӧдӧ Павелыс юӧртӧ, тшӧктам тіянлӧ мортсис петны».
[14] Сідз керлывлісӧ Скева аркирейлӧн сизим зон.
[15] Сэрпӧсь лолыс сэтчӧ шуис: «Исуссӧ ме тӧда, Павелсӧ тӧда, а тійӧ киннэз сэтшӧммес?»
[16] Серпӧсь лола мортыс уськӧтчис Скева зоннэз вылӧ. Сія вӧлі ӧддьӧн вына да нійӧ вермис. Нія вартлӧмӧсь, вирӧсьӧсь да кушӧсь пышшисӧ сія керкуись.
[17] Ефес карись быдӧнныс ─ и иудейес, и греккес ─ пондісӧ тӧдны лоӧмыс йылісь. Сысянь отирсӧ полӧм кутіс. Нія ошкісӧ-лэбтісӧ Дӧсвидзись Исуслісь нимсӧ.
[18] Унаӧн вовлісӧ Исуслӧ виль веритіссез коласісь. Нія осьтісӧ-висьтасисӧ умӧль керӧммезнысӧ.
[19] Сэтӧн унаӧн вӧлісӧ и тӧдіссез коласісь. Нія ӧктісӧ ассиныс небӧггезнысӧ да сотісӧ быдӧнныс одзын. Небӧггезнысӧ неблӧмась витдас сюрс эзысь сьӧм вылӧ.
[20] Сэтшӧм вынӧн паськаліс да поздісис отир сьӧлӧммезӧ Дӧсвидзисьлӧн Кылыс.
[21] Сэтӧн быдӧс керӧм бӧрын Павелыс юрас пыртіс мунны Ерусалимӧ. Сэтчин сія лӧсьӧтчис мунны Македония да Акаия муэзӧт. Сія висьталіс сідз: «Ерусалимас вовлӧм бӧрын меным колӧ мунны и Римӧ».
[22] Македония муас ыстіс ассис кык отсасисьӧс: Тимофейӧс да Ерастӧс. Ачыс мымдакӧ кежӧ кольччис Асияас.
[23] Сія кадӧ Дӧсвидзисьлӧн Туй велӧтӧмыс кузя ыджыт зык лэбтісис Ефес карын.
[24] Сэтӧн вӧлі Димитрий нима эзысьӧн уджалісь. Сія эзысьсис керліс учӧтик керкуоккез Артемидалӧ юрбитанін сьӧрті. Аслас уджаліссезлӧ сія отсавліс шедтыны уна сьӧм.
[25] Сія ӧктіс нійӧ да ны кодь мӧдік уджаліссесӧ. Нылӧ висьталіс: «Ёрттэзӧ! Тійӧ тӧдатӧ, эта уджӧн мийӧ уна шедтам.
[26] Тійӧ эд асьныт адззат и кылат, мый керсьӧ Ефесас да быдсӧн Асияас. Павелыс аслас велӧтӧмӧн уна йӧзӧс ылӧтіс. Сія баитӧ: киӧн керӧммес пӧ абу еннэз.
[27] Сысянь миян уджным отирыслӧ оз понды ковны. Нельки ыджыт Артемида еннымлӧн юрбитаніныс абутӧм туйӧ лоас, да и Артемидасӧ ыджытас озӧ пондӧ пуктыны. Сылӧ эд быдсӧн Асияын да мӧдік муэзын оліссез копрасьӧны».
[28] Сійӧ кывзӧм бӧрын ӧксьӧммес лёксялісӧ. Пондісӧ горӧтлыны: «Ефесісь Артемида ─ медыджыт!»
[29] Нія горӧтлӧмнаныс лэбтісӧ быдсӧн карсӧ. Отирыс кутісӧ Гайӧс да Аристаркӧс, кӧдна Павелыскӧт локтӧмась Македония муись. Быдӧнныс ӧтлаын иньдӧтчисӧ карас театрӧ.
[30] Павелыс мӧдіс пырны отирыс коласӧ. Велӧтчиссес сійӧ эзӧ лэдзӧ.
[31] Сэтӧн юраліссез коласісь мукӧдыс вӧлісӧ Павеллӧн ёрттэз. Нія тшӧктісӧ висьтавны Павелыслӧ, медбы сія эз мыччась театрас.
[32] Сы коста ӧксьӧммес коласісь ӧтіккез горӧтісӧ ӧтікӧ, мӧдіккез ─ мӧдікӧ. Мукӧдыс ны коласісь эзӧ и тӧдӧ, мыйлӧ ӧксис отирыс, ӧксьӧмныс вӧлі арттӧм да.
[33] Иудейез корӧм сьӧрті отирыс коласісь корисӧ Александр нима мортӧс. Сія мыччаліс кинас, мӧдіс баитны отирыслӧ.
[34] Сія вӧлі иудей. Эта йылісь тӧдӧм бӧрын быдӧнныс ӧтік ӧмись горӧтісӧ. Отирыс кык час мымда ӧтмоз горӧтліс: «Ефесісь Артемида ─ медыджыт!»
[35] Карын веськӧтлісьыс ӧліс отирсӧ, сэсся висьталіс: «Ефесын оліссез! Кытшӧм морт оз тӧд: Ефес карын оліссез копрасьӧны енӧжсянь лэдзчисьӧм ыджыт Артемида енлӧ?
[36] Некин тіянкӧт оз етшась эта понда. Тіянлӧ колӧ лӧньсьыны. Видзӧттӧг оз ков нем керны.
[37] Тійӧ вайӧтіт этнӧ кык мортсӧ. Нія Артемидалӧ юрбитанінісь нем эзӧ гусялӧ. Енныт йылісь умӧля эзӧ баитӧ.
[38] Димитрийлӧн да сыкӧт уджаліссезлӧн эм кӧ мый ны вылӧ норасьны, ась мунӧны бӧрйисьны судӧ да Римись юраліссез дынӧ. Сэтчин ась норасьӧны ӧтамӧдныс вылӧ.
[39] Кошшат кӧ тійӧ мӧдікӧ, сэк ӧктасӧ отирсӧ да видзӧтасӧ миян туйдӧт сьӧрті.
[40] Талуння лунӧ лоӧм понда миянӧс вермасӧ судитны кыдз зык лэбтіссезӧс. Мыйӧн сэк мийӧ пондам дорйыны асьнымӧс эта ӧксьӧмись?» Сідз висьталӧм бӧрын сія быдӧннысӧ тшӧктіс рознитчыны.