[1] Антиокия вичкуын вӧлісӧ Енсянь юӧртіссез да велӧтіссез: Варнава, Симеон, шуны мӧд нимнас кӧ, Нигер, Киринеяись Луций, Савл да Манаил. Манаилыс Ирод ӧксукӧт вон туйӧ тшӧтш быдмӧм.
[2] Нія кысъялісӧ Дӧсвидзисьлӧ да кӧслуналісӧ. Сэтӧн нія кылісӧ Вежа Ловлісь тшӧктӧм: «Янсӧтӧ Меным Варнавасӧ Савлыскӧт удж вылӧ, кӧдӧ керны Ме нійӧ кори».
[3] Сэк нія ӧтлаын кӧслуналісӧ да кеймисӧ, Варнава да Савл вылӧ пуктылісӧ киэзнысӧ, сэсся иньдісӧ нійӧ туйӧ.
[4] Сідз Варнаваыс да Савлыс, Вежа Лолӧн ыстӧммез, локтісӧ Селевкияӧ. Сэтчинсянь иньдӧтчисӧ саридз шӧрись Кипр му вылӧ.
[5] Нія вовлісӧ Саламинӧ. Сэтӧн висьтасисӧ Енлісь кывсӧ синагогаэзын. Ныкӧт ӧтлаын вӧлі Иоан, кӧда отсасис нылӧ.
[6] Кипр мусӧ шуч мунӧм бӧрын нія локтісӧ Паф карӧдз. Сэтӧн нія панталісӧ тӧдісьӧс ─ асьсӧ Енсянь юӧртісьӧ пуктісьӧс. Сія вӧлӧм Варисус нима иудей.
[7] Варисусыс оліс Сергий-Павел дынын. Сергий-Павелыс вӧлі бур мывкыда морт, Кипр муӧн юралісь. Сія корис Варнавасӧ Савлыскӧт гортас. Мӧдіс кывзыны Енлісь Кывсӧ.
[8] Варисуслӧн грек кыв вылын нимыс вӧлӧм Елима ─ «тӧдісь». Сія апостоллэслӧ паныт сувтіс, мӧдіс падмӧтны юралісьсӧ Енлӧ веритӧмсис.
[9] Савлыс, мӧдмоз кӧ шуны, Павелыс, Вежа Лолӧн тырӧм видзӧтіс тӧдісьыс вылӧ.
[10] Сія Варисусыслӧ висьталіс: «Кульлӧн зон! Тэись дорӧн петӧ ылӧтлӧм-бӧбӧтлӧмыт, лёк керӧмыт! Тэ быд бурыслӧ паныт сувтан! Кӧр тэ дугдан чуклявны Дӧсвидзисьлісь веськыт туйесӧ?
[11] Дӧсвидзисьыс ӧні лэбтіс кисӧ тэ вылӧ. Тэ синтӧмсялан, он понды адззыны шондісӧ кытшӧмкӧ кадӧдз». Сэтӧн са кодь пемытыс лэдзчисис тӧдісьыс вылӧ. Варисусыс ӧтӧрись-мӧдӧрись пондіс кошшыны новйӧтісьӧс.
[12] Быдӧс лоӧмыс вӧлі юралісьыс син одзын. Сійӧ диво кутіс Дӧсвидзисьлӧн велӧтӧмсянь, и сія пондіс веритны.
[13] Павелыс мӧдіккезкӧт Пафсис уйис Памфилия муись Пергия карӧ. Иоаныс ныкӧт эз мун, а бӧр бертіс Ерусалимӧ.
[14] А мӧддэс Пергиясис мунісӧ Писидия муын Антиокия карӧ. Шоччисян лунӧ пырисӧ синагогаӧ да пуксисӧ.
[15] Сэтӧн сы коста лыддьӧтісӧ Моисейлӧн Туйдӧтісь да Енсянь юӧртіссезлӧн гижӧттэзісь. Сыбӧрын синагогаын веськӧтліссес ыстісӧ юавны нылісь: «Воннэз, эм кӧ тіян отирыслӧ велӧтан-вынсьӧтан кыв, баитӧ».
[16] Павел чеччис, лэбтыштіс кисӧ да висьталіс: «Израиль отир да Енсис поліссез, кывзӧ:
[17] Израильлӧн Еныс бӧрйӧм вӧлі миянлісь айезнымӧс. Миян отирным олӧмась Египет муын. Сэтӧн овтӧн Еныс содтӧм этӧ отирсӧ, сэсся Аслас вына киӧн петкӧтӧм нійӧ сія муись.
[18] Нёльдас во сьӧрна Еныс вердӧм нійӧ кушмуын.
[19] Ханаан мусис Сія орӧтӧм сизим отирпӧлӧс, а нылісь мусӧ янсӧтӧм Израиль отир коласын.
[20] Чулалӧм нёльсё витдас во гӧгӧр. Сыбӧрын Еныс сетлӧм нылӧ судитіссезӧс. Сідз вӧлӧм Енсянь юӧртісь Самуилӧдз.
[21] Сэсся отирыс пондӧм корны ӧксуӧс. Еныс нылӧ сетӧм Саулӧс. Сія мортыс вӧлӧм Вениамин увтырись Кислӧн зон. Сія юралӧм нёльдас во сьӧрна.
[22] Еныс Саулсӧ вежӧм, нылӧ сувтӧтӧм Давидӧс. Еныс Давидыс йылісь висьталӧм сідз: "Аслам сьӧлӧм сьӧрті Ме адззи мортӧс, Иессейлісь Давид зонӧс. Сія быдӧс керас сідз, кыдз Меным колӧ".
[23] Аслас кӧсйӧм сьӧрті Давидыс увтырись Еныс сувтӧтіс Израиль отирлӧ Мездӧтісьӧс ─ Исусӧс.
[24] Исуслӧн отир одзӧ петтӧдз велӧтіс Иоан. Быд Израиль мортӧс сія тшӧктіс кольны умӧль керӧммезнысӧ да пыртчыны.
[25] Сетӧм уджсӧ ештӧтікӧ Иоаныс висьтавліс: "Кин туйӧ тійӧ менӧ пуктат, ме абу сія. Ме абу туяна морт нельки пӧрччавны кӧмкӧт бердсис воньсӧ Ме сьӧрын Локтісьлісь".
[26] Воннэзӧ, Авраам увтырись челядь да Енсис поліссез! Тіянлӧ ыстӧм эта мездан юӧрыс.
[27] Ерусалимын оліссес веськӧтліссескӧт Сійӧ эзӧ тӧдӧ. Нія Сійӧ судитісӧ. Нылӧн керӧмныс лоис Енсянь юӧртіссезлӧн висьтавлӧм сьӧрті. Нійӧ кыввесӧ мийӧ лыддьӧтам быд шоччисян лунӧ.
[28] Нія умӧльсӧ эзӧ адззӧ Сы сайись, медбы Сійӧ позис вийны. Сэк Сійӧ вийны тшӧктісӧ Пилатсӧ.
[29] Сы йылісь быдӧс гижӧмсӧ нія керисӧ. Лэдзисӧ Сійӧ пу вывсис да пуктісӧ дзебсянінӧ.
[30] Но Еныс Сійӧ ловзьӧтіс.
[31] Уна лун сьӧрна Сія мыччасьліс Галилеясянь Ерусалимӧ Сыкӧт тшӧтш локтіссезлӧ. Нія ӧні Исусыс йылісь висьтасьӧны Израиль отирлӧ.
[32] Мийӧ висьтасям тіянлӧ Бур Юӧр. Миян айезлӧ кӧсйӧмсӧ Еныс сетіс миянлӧ ─ челядьныслӧ. Кӧсйӧмсӧ Сія сетіс Исуссӧ ловзьӧтӧм пыр.
[33] Мӧдік псаломын тай гижӧм: ─ Тэ Менам Зон, Ме талун Тэнӧ чужті.
[34] Еныс Исуссӧ ловзьӧтіс. Сідзкӧ, Сія оз ни берт сісьманас. Эта йылісь висьтавлӧм сідз: ─ Мый Ме кӧсйи Давидыслӧ, сійӧ сета тіянлӧ. Кӧсйӧмӧ вежа, оз вежсьы.
[35] Вежа Гижӧтас эд мӧдіклаын висьталӧм: ─ Он лэдз Аслат Вежалӧ адззывны сісьмӧмсӧ.
[36] Давидыс аслас кадӧ керӧм Ен шуӧм сьӧрті. Сэсся кулӧм. Сійӧ дзебӧмась айез дынӧ. Сылӧн шойыс сісьмис.
[37] А Кӧдӧ Еныс ловзьӧтіс, Сылӧн вывтырыс эз сісьмы.
[38] Воннэзӧ, тӧдӧ: умӧль керӧммез проститӧм йылісь Еныс тіянлӧ юӧртӧ Исус пыр.
[39] Исус отсӧтӧн Сылӧ быд веритісьыс мезмӧ быд умӧль керӧмись. Мезмӧ и ныись, кӧднаись Моисейлӧн Туйдӧтыс эз вермы мездыны. И морт лоӧ Ен сьӧрті веськыта олісьӧн.
[40] Видзӧтӧ, медбы эз лок тіян вылӧ Енсянь юӧртіссезлӧн висьтавлӧмныс:
[41] ─ Видзӧтӧ, абутӧм туйӧ пуктіссез, дивуйтчӧ да ӧшӧ! Ме кера Ассим уджӧс тіян луннэзӧ. Кылітӧ бы тійӧ кинсянькӧ Менам вына керӧм йылісь, эдӧ бы веритӧ».
[42] Синагогаись петӧм коста Павелсӧ да Варнавасӧ корисӧ мӧд шоччисян лунас бӧра баитны эта йылісь.
[43] Синагогасис отирыс петісӧ. Иудейес да мӧдік отирись локтӧммес, кӧдна пондӧмась овны Моисейлӧн Туйдӧт сьӧрті, унаӧн мунісӧ Павелкӧт да Варнавакӧт. Апостоллэз баитісӧ ныкӧт. Велӧтісӧ-мывкыдсьӧтісӧ отирсӧ дугдывтӧг видзсьыны Енлӧн бурсетӧм бердӧ.
[44] Мӧд шоччисян лунас карас оліссес чуть не быдӧнныс ӧксисӧ кывзыны Енлісь кывсӧ.
[45] Отирсӧ казялікӧ, иудейесӧ завидныс кутіс. Павеллӧн баитӧмлӧ паныт нія лӧгувьяныс уна умӧльсӧ висьтавлісӧ.
[46] Сэк Павел да Варнава повтӧг висьталісӧ: «Енлісь Кывсӧ медодз коліс юӧртны тіянлӧ. Тійӧ тай миянӧс эдӧ пондӧ кывзыны, пырся оланас пырны асьнытӧ пуктат нетуяна отирӧ. Ӧні мийӧ мунам ентӧдтӧм отир дынӧ.
[47] Сідз миянӧс тшӧктіс Медвылісьыс: ─ Ме Тэнӧ сувтӧті югдӧтны ентӧдтӧм отирсӧ, медбы Тэ пыр мезмисӧ му пасьта оліссес».
[48] Ентӧдтӧм отирыс сэтшӧмсӧ кылӧмсянь гажӧтчисӧ. Нія ошкисӧ Дӧсвидзисьлісь Кывсӧ. Веритісӧ быдӧнныс, кӧдналӧ шуӧм пырны пырся оланӧ.
[49] Дӧсвидзисьлӧн Кылыс сія муын паськаліс.
[50] Но иудейес ызйӧтісӧ лэбтісьны Павел да Варнава вылӧ Енлӧ юрбитісь бурӧ пуктӧм инькаэсӧ да карсис юраліссесӧ. Нія апостоллэсӧ вашӧтісӧ асланыс муись.
[51] Сэк Павел да Варнава пыркӧтісӧ ны ладорӧ коккезсиныс буссӧ да мунісӧ Иконияӧ.
[52] А Антиокияас велӧтчиссес тырисӧ Вежа Лолӧн да ёна гажмисӧ.