<Ибрани 8

[1] Фькьра wан тьштед мә пешда готьн әв ә: Сәрәкк’аһинәки мәйи ӧса һәйә кӧ ль ә’змана сәр т’әхте мәзьнайийа Хwәдейә р’асте р’уньштийә.

[2] Әw чаwа сәрәкк’аһин пирозгәһеда бәрдәстийе дькә, аwа готи wи коне р’астда, к’ижан кӧ Хӧдан вәгьрт, нә кӧ мәрьва.

[3] Һәр сәрәкк’аһинәк бона qӧрбан у һ’әдидайине к’ьфшкьри йә, аwа гәрәке тьштәки ви жи һәбуйа кӧ бьда.

[4] Һәгәр әва ль сәр дьне буйа, wе нәбуйа к’аһин жи, чьмки һәнә к’аһин кӧ анәгори Qануне һ’әдийа дьдьн.

[5] Әвана хьзмәтк’арийа хwә пирозгәһеда дькьн, йа кӧ мина си у сурәте wан тьштед ль ә’змен ә. Чаwа Мусар’а һатә ә’мьркьрьне, гава әwи wе Коне Шә’дәтийе вәгьрта, wир’а һатә готьне: «Дина хwә бьде, кӧ һәр тьшти wи щур’әйи бьки, чаwа сәре ч’ийе мьн нишани тә кьр» .

[6] Ле р’аст хьзмәтк’арикә һе бьльнд Исар’а һатә дайине, чаwа кӧ Әw навчетийе пәйманәкә һе qәнщ дькә, чьмки әв пәймана ль сәр созед һе qәнщ һ’имгьрти йә.

[7] Һәгәр пәймана пешьн бе кемаси буйа, иди йа дӧда wе һ’әwщә нибуйа.

[8] Ле Хwәде щьмә’те нәһәq дькә у дьбежә: «Ва р’оже бен, Хӧдан дьбежә, Әзе т’әви мала Исраел у т’әви мала Щьһуда пәйманәкә ну гьредьм,

[9] ле нә мина wе пәймана кӧ Мьн т’әви кал-бавед wан гьреда, wе р’ожа кӧ Мьн дәсте wан гьрт, wәки жь Мьсьре дәрхьм. Әwана нава пәймана Мьнда нәман, Мьн жи дәсте Хwә жь wан к’ьшанд, Хӧдан дьбежә.

[10] Ле әв ә әw пәйман, йа кӧ Әзе т’әви мала Исраел гьредьм, пәй wан р’ожар’а, Хӧдан дьбежә: Әзе qанунед Хwә бькьмә һ’ьше wан у дьле wанда жи wан бьньвисьм у Әзе Хwәдейе wан бьм, әwе жи щьмә’та Мьн бә.

[11] Һьнге т’ӧ кәс wе һәвале хwә йан бьрайе хwә һин нәкә у нәбежә: ‹Хӧдан нас бькә›, чьмки һ’әму жи wе Мьн нас бькьн, жь бьч’укед wан һ’әта мәзьна.

[12] Әзе нәһәqийед wан бьбахшиньм у гӧнед wан жи иди бир нәйньм» .

[13] Гава Хwәде бона пәйманәкә «ну» гот, йа пешьн кәвьн кьр у чь кӧ кәвьн у пир дьбә, бәр ӧндабуне йә.