<Ибрани 3

[1] Аwа хушк-бьрайед пироз, һун кӧ һәвал-п’аред wе газийа ә’змен ьн, ль Иса бьньһер’ьн, Wи шандийи у Сәрәкк’аһине кӧ әм иqрар дькьн.

[2] Әw һьндава Хwәдеда амьн бу, Йе кӧ Әw бона ве йәке к’ьфш кьр, чаwа Муса жи т’әмамийа мала Wида амьн бу .

[3] Бәле Иса һаqаси жь Муса зедәтьр һежайи р’умәте бу, чьqаси qәдьре йе кӧ мале чедькә, жь qәдьре мале зедәтьр ә.

[4] (Фә’мдари йә, һәр маләк бь дәсте йәки те чекьрьне, ле йе һәр тьшт ә’фьрандийә, Хwәде йә.)

[5] Р’аст ә Муса т’әмамийа мала Wида хӧламәки амьн бу, бона шә’дәтийа wан тьштед кӧ Хwәде wе бьгота.

[6] Ле Мәсиһ чаwа кӧр’ һьндава мала Хwәдеда амьн бу. У әw мала Wи әм ьн, һәгәр әм wе ә’гитийе у гӧмана кӧ әм пе дьфьр’ьн qәwин бьгьрьн.

[7] Бона ве йәке чаwа Р’ӧһ’е Пироз дьбежә: «Иро һәгәр һун дәнге Wи бьбьһен,

[8] мина кал-бавед хwә сәрһ’ьшк нибьн, чаwа кӧ wана сәри һьлда, гава бәр’ийеда һатьнә щер’ьбандьне,

[9] wе дәра кӧ кал-бавед wә бь qәлпе хьраб Әз щер’ьбандьм у т’әмамийа чьл сали жи кьред Мьн дитьн.

[10] Ләма жи һ’иле Мьн жь wи ньсьли чу у Мьн гот: ‹Дьлада т’ьме әw хальфи нә у р’ийа Мьн нас нәкьрьнә›.

[11] Аwа Мьн жи жь һерса сонд хwар гот: ‹Т’ӧ щар әwе нәк’әвьнә р’ьһ’әтийа Мьн!›»

[12] Һаш жь хwә һәбьн хушк-бьрано, нәбә кӧ нава wә йәкида дьләки хьраб у нәбаwәр һәбә, кӧ пьшта хwә бьдә Хwәдейе сах.

[13] Ле һәр р’ож дьл бьдьнә һәв, һ’әта кӧ ньвисареда бона мә «иро» һәйә, wәки жь wә т’ӧ кәс бь гӧна нәхапә, нәбә сәрһ’ьшк.

[14] Чьмки әм т’әви Мәсиһ бунә хwәйип’ар, һәгәр т’әне әм wе баwәрийе жь сәрида һ’әта хьлазийе qәwин бьгьрьн.

[15] Аwа чаwа жор һатә готьне: «Иро һәгәр һун дәнге Wи бьбьһен, сәрһ’ьшк нибьн, чаwа wәхте сәрһьлданеда» .

[16] Әw к’и бун, йед кӧ бьһистьн у сәри һьлдан? Әw һ’әму нибун, йед кӧ бь дәсте Муса жь Мьсьре дәрк’әтьбун?

[17] Чьл сали һ’иле Хwәде жь к’е чу? Нә жь wан чу, йед кӧ гӧнә кьрьн, щьнйазед wан бәр’ийеда ман?

[18] У Хwәде бона к’е сонд хwар кӧ нәк’әвьнә р’ьһ’әтийа Wи, һәгәр нә бона нәельма ?

[19] Иди әм дьбиньн кӧ әвана жь дәст нәбаwәрийа хwә нькарьбун бьк’әтанайе.