<Ибрани 1

[1] Гәләк щара у бь гәләк щур’а Хwәде пешда пе п’ехәмбәра кал-бавед мәр’а хәбәр дайә,

[2] ле ван р’ожед ахьрийеда пе Кӧр’е Хwә мәр’а хәбәр да, К’ижан кӧ к’ьфш кьр, wәки ахьрийе бьбә хwәйиwаре һәр тьшти у бь Wи жи ә’рд у ә’зман ә’фьранд.

[3] Әw нура р’умәта Хwәде йә, хут мина һәйинтийа Wи йә, Әw бь qәwата хәбәра Хwә һәр тьшти хwәй дькә. Гава Әwи мәщала шуштьна гӧнед мәрьва һазьр кьр , ль жор һәрәма мәзьнайийа Хwәдейә р’асте р’уньшт.

[4] Кӧр’ һаqаси жь мьлйак’әта жортьр к’әт, чьqаси әw наве кӧ Wи станд жь навед wан мәстьр ә.

[5] Чьмки Хwәде т’ӧ мьлйак’әтир’а аһа нәготийә: «Тӧ Кӧр’е Мьн и, Тӧ иро Мьнр’а буйи» у диса: «Әзе баве Wи бьм, Әwе жи Кӧр’е мьн бә» .

[6] У гава Хwәде ньхӧрийе Хwә дьшинә дьнйайе, аһа жи дьбежә: «Бьра һ’әму мьлйак’әтед Хwәде сәре хwә бәр Wи дайньн» .

[7] Ле бона мьлйак’әта аһа дьбежә: «Әw мьлйак’әтед Хwә дькә ба у бәрдәстийед Хwә алава егьр» .

[8] Ле бәле бона Кӧр’ Хwәде дьбежә: «Т’әхте Тә Хwәдейо, т’әхте һ’әта-һ’әтайе йә, шьва п’адшатийа Тә шьва һәqийе йә.

[9] Тӧ һәqийе һ’ьз дьки у дьжәни нәһәqийе, ләма жи Хwәдейо, Хwәдейе Тә Тӧ бь р’уне шабуне р’ункьри, жь һәвалед Тә зедәтьр» .

[10] У аһа жи дьбежә: «Йа Хӧдан, Тә пешийе һ’име дьнйайе дани у ә’зман кьред дәстед Тә нә.

[11] Әwе wеран бьн һәр’ьн, ле Те бьмини, һ’әмуйе мина щьла бьп’ьзьньн.

[12] Те wан һәв бьп’еч’и мина qап’ут, мина к’ьнща wе бенә гӧһастьне. Ле Тӧ диса Әw и у салед Тә wе кем нәбьн» .

[13] К’ижан мьлйак’әтир’а Хwәде готийә: «К’еләка Мьнә р’асте р’уне, һ’әта Әз нәйаред Тә бькьмә бьне п’ийед Тә»?

[14] Иди мьлйак’әт чь нә? Әw һ’әму жи р’ӧһ’ед бәрдәсти нә, кӧ бона хьзмәтк’арийа wан тенә шандьне, йед кӧ хьлазбуне wе wар бьн.