Galatî 4
[1] Аwа әз дьбежьм, wаре кӧ хwәйе һәр тьшти йә, ле һ’әта кӧ хьшим ә жь хӧлем найе фьрqикьрьне.
[2] Әw бьн дәсте хwәйкьрийа у хәмк’ешада йә, һ’әта wи wәхте кӧ баве к’ьфш кьрийә.
[3] Ӧса жи әм гава һе р’ӧһ’анида «хьшим» бун, мә хӧламти сьхьред ве дьнйайер’а дькьрьн.
[4] Ле гава wәхт пер’а гьһишт, Хwәде Кӧр’е Хwә шанд, кӧ жь к’ӧлфәте бу у к’әтә бьн Qануне,
[5] wәки йед бьн Qануне аза кә у әм жи һәqе лаwтийа Хwәде бьстиньн .
[6] Аwа һун кӧ лаwед Wи нә, Хwәде Р’ӧһ’е Кӧр’е Хwә шандә нава дьле мә, кӧ гази Хwәде дькә: «Абба!» аwа готи «Баво!»
[7] Бь ви аwайи иди тӧ нә хӧлам и, ле лаw и у һәгәр лаw и, ӧса жи Хwәде тӧ кьри wаре Хwә.
[8] Бәре, гава wә Хwәде нас нәдькьр, wә хӧламти йед ӧсар’а дькьрьн, кӧ р’аст нә хwәде бун.
[9] Ле ньһа кӧ wә Хwәде нас кьрийә, ле бәле Хwәде жи һун нас кьрьнә, һун чаwа диса вәдьгәр’ьнә сәр wан сьхьред ве дьнейә беqәwатә нә т’ӧ тьшт у диса дьхwазьн хӧламтийе wанр’а бькьн?
[10] Һун гӧһ дьдьнә р’ожед һ’әсаб, мәһа, р’ожгар у сала.
[11] Әз бона wә дьтьрсьм, кӧ әw шьхӧле мьн бона wә кьрийә дәйа һәр’ә.
[12] Әз һиви жь wә дькьм хушк-бьрано, бьбьнә мина мьн, чьмки әз жи мина wә бумә. Wә т’ӧ зийан нәдайә мьн.
[13] Һун заньн кӧ щара пешьн бесьһ’әтийа qальбе мьн бу мә’ни, мьн Мьзгини да wә.
[14] У чь кӧ һатә сәре qальбе мьн, әw йәк бу щер’ьбандьнәк бона wә, ле диса wә әз беһӧрмәт нәкьрьм йан пьшта хwә нәда мьн, ле wәкә мьлйак’әтәки Хwәде әз qәбул кьрьм у wәкә Мәсиһ Иса.
[15] Әw шабуна wә чаwа бу? Әз wәкә шире хwә, һәгәр жь дәст wәва бьһата, wәйе ч’ә’ве хwә жи дәрхьста бьда мьн.
[16] Иди әз бумә дьжмьне wә, wәки мьн wәр’а р’аст хәбәр дайә?
[17] Әwед майинә кӧ к’әтьнә дәмана wә, әw хера wә нахwазьн, ле бәле әwана дьхwазьн wә жь мьн бьqәтиньн, wәки һун бьк’әвьнә дәмана wан.
[18] Qәнщ ә кӧ мәри дәмана qәнщийеда бә у нә кӧ т’әне гава әз нава wәда бьм, ле һәр гав.
[19] Лаwед мьн, әз ньһа диса бона wә мина еша к’ӧлфәта дьк’ьшиньм, һ’әта кӧ Мәсиһ нава wәда бьгьһижә.
[20] Хwәзи әз ньһа ль щәм wә бума у мьн тьһәре хәбәрдана хwә бьгӧһаста, чьмки әз бона wә нава мьталада мә!
[21] Жь мьнр’а бежьн, һун кӧ дьхwазьн бьн Qанунеда бьн, wә нәбьһистийә Qанун чь дьбежә?
[22] Ньвисар ә кӧ: «Дӧ кӧр’ед Бьраһим һәбун, йәк жь щарийе бу, йәк жи жь жьна аза» .
[23] Әwе жь щарийе бу, әw бь бьнйат’а мәрьвайе бьбу, ле әwе жь жьна аза бу, әw ль гора созе Хwәде бу.
[24] Әва йәка щур’әки майин те фә’мкьрьне, әв һәр дӧ жьн дӧ пәйман ьн: Йәк жь ч’ийайе Синайе, бона хӧламтийе тинә, әw Һащәр бу .
[25] Һащәр Ә’рәбьстанеда те һ’әсабе ч’ийайе Синайе у һьмбәри Оршәлима ньһа дьбә, кӧ зар’ед хwәва хӧламтийе дькә.
[26] Ле йа аза, әw Оршәлима жорьн те һ’әсабе, кӧ әw дийа мә һ’әмуйа йә .
[27] Чьмки ньвисар ә: «Ша бә, безӧр’әта кӧ тә зар’ нәданин. Бь әшq бьстьре, дәнг бьльнд кә, кӧ еша зар’анине тә нәк’ьшанд. Чьмки зар’ед тә мербәр’дайийе wе жь зар’ед йа хwәйимер гәләктьр бьн» .
[28] Аwа һун хушк-бьрано, мина Исһаq зар’ед wи сози нә .
[29] Ле чаwа һьнге әwе жь мәрьвайе бьбу, йе жь алийе Р’ӧһ’да дьзеранд, ӧса жи ньһа .
[30] Ле ньвисар чь дьбежә? «Әwе щарийе кӧр’е wева бәрде дәрхә, чьмки кӧр’е щарийе гәрәке т’әви кӧр’е жьна аза wар нәбә» .
[31] Аwа хушк-бьрано, әм нә зар’ед щарийе нә, ле зар’ед йа аза нә.