<Galatî 2

[1] Паше чардәһ сала шунда т’әви Барнабас диса р’абумә Оршәлиме, Тито жи мьн т’әви хwә бьр .

[2] Әз чум, чьмки Хwәде бәр мьн вәкьр, кӧ һәр’ьм. У мьн әw Мьзгини ль wан да һ’әсандьне, йа кӧ әз нава нәщьһуйада даннасин дькьм, ле әв йәк мьн йед сәрәкәр’а башqә дьгот. Мьн нәхwәст кӧ әз бадиһәwа бьбәзьм йан бәзибьм.

[3] Ле һ’әта Титойе т’әви мьн кӧ йунан бу, п’ейи сәр wи жи нәкьрьнә, кӧ бе сьнәткьрьне. Әв пьрс пешда һат,

[4] чьмки чәнд бьрайед дәрәw шулькинә нава мә, wәки щә’сусийе азайийа мә бькьн, йа кӧ бь сайа Мәсиһ Иса мә дәст анийә. Wана дьхwәст әм бькьрана бьндәст.

[5] Ле мә qәт дәqәке жи гӧр’а wан нәкьр, кӧ р’астийа Мьзгинийе нава wәда һ’имгьрти бьминә.

[6] Ле бона wан жи, йед кӧ сәрәкә к’ьфш дьбун, (qәт хәма мьн нинә, кӧ әw бәре чь бунә, Хwәде фьрqийе накә нава мәрьва), wан сәрәка жи т’ӧ тьште ну мьнр’а нәготьн.

[7] Ле сәрбара-сәрда дитьн кӧ ль мьн һатийә спартьне, wәки әз Мьзгинийе бьдьмә нәщьһуйа , чаwа кӧ ль Пәтрус жи һатийә спартьне, wәки Мьзгинийе бьдә щьһуйа .

[8] Чьмки Хwәдейе кӧ Пәтрус кьрә шандийе щьһуйа, һәма Wи жи әз кьрьмә шандийе нәщьһуйа.

[9] Гава Аqуб, Пәтрус у Йуһ’әннайе кӧ «Стун» дьһатьнә һ’әсабе, бона wе к’әрәма кӧ мьнр’а һатьбу дайине пе һ’әсийан, дәстед хwәйә р’асте чаwа нишана т’ьфаqийе данә мьн у Барнабас. Әw qайл бун, кӧ әм һәр’ьнә нава нәщьһуйа у әw жи һәр’ьнә нава щьһуйа.

[10] Т’әне wан һиви кьр, кӧ әм бәләнгаза бир нәкьн, йа кӧ әз хwәха жи дәмана wе йәкеда мә.

[11] Ле гава Пәтрус һатә Әнтакйайе, әз ашкәрә мьqабьли wи р’абум, чьмки әwи шаш бу.

[12] Бәри һатьна чәнд мәрьвед кӧ Аqуб шандьбун, әwи т’әви нәщьһуйед баwәрмәнд нан дьхwар. Ле гава әwана һатьн, әwи хwә дьда алики у вәдьк’ьшийа, жь тьрса әwед кӧ дьготьн, гәрәке нәщьһу бенә сьнәткьрьне.

[13] У щьһуйед баwәрмәндә майин жи т’әви wи дӧр’ути кьрьн, һ’әта кӧ Барнабас жи хальфи, к’әтә нава wе дӧр’утийа wан.

[14] Ле гава мьн дит кӧ әwана нава р’астийа Мьзгинийеда наминьн, һьнге ль бәр һ’әмуйа мьн готә Пәтрус: «Һәгәр тӧ щьһу йи, мина йәки нәщьһу дьжийи у нә мина щьһуйа, тӧ чаwа дьки сәр нәщьһуйа, кӧ бьбьнә мина щьһуйа?»

[15] Әмә кӧ ә’сьле хwәда щьһу нә у нә жь «нәщьһуйед гӧнәк’ар» ьн,

[16] заньн кӧ мәрьв бь кьред Qануне нькарә р’аст бе һ’әсабе, ле т’әне бь Иса Мәсиһ баwәркьрьне. Мә жи Мәсиһ Иса баwәр кьр, wәки бь Мәсиһ баwәркьрьне әм р’аст бенә һ’әсабе, нә кӧ бь кьред Qануне, чьмки т’ӧ qул-бәндә бь кьред Qануне нькарә р’аст бе һ’әсабе .

[17] Аwа һәгәр әм дькьн бь Мәсиһ р’аст бенә һ’әсабе у wе гаве хӧйа бә, кӧ әм хwәха жи мина wан гӧнәк’ар ьн, һьнге Мәсиһ бу wәк’иле гӧна? Т’ӧ щар!

[18] Һәгәр әw тьштед мьн хьраб кьрьнә, диса дәстпедькьм чедькьм, әз нәһәqийа хwә дьдьмә избаткьрьне.

[19] Чьмки әз бь Qануни бона Qануне мьрьм, wәки бона Хwәде бьжим. Әз т’әви Мәсиһ хач бум,

[20] жь вьр шунда нә кӧ әз дьжим, ле Мәсиһ ә кӧ нава мьнда дьжи. У ньһа кӧ әз ви qальбида дьжим, бь Кӧр’е Хwәде баwәркьрьне дьжим, Йе кӧ әз һ’ьз кьрьм у щанийа Хwә бона мьн да дәр.

[21] Әз к’әрәма Хwәде т’әхсир накьм, чьмки һәгәр р’астһ’әсаббун бь Qануне буйа, кӧ ӧса йә Мәсиһ бадиһәwа мьр.