Galatî 1
[1] Әз Паwлосе шанди, нә кӧ жь алийе мәрьвада йан бь дәсте мәрьва к’ьфшбуйи мә, ле бь дәсте Иса Мәсиһ у Бав Хwәде, Йе кӧ Әw жь мьрьне р’акьр,
[2] әз бь һ’әму баwәрмәндава т’әвайи бәрбьр’и wә щьвинед Галатйайеда дьбьм.
[3] Дә бьра к’әрәм у ә’дьлайийа Хwәде Баве мә у Хӧдан Иса Мәсиһ ль wә бә,
[4] Йе кӧ щанийа Хwә анәгори ә’мьре Баве мә Хwәде жь бәр гӧнед мәва да, wәки мә жь ви зәмане ньһайи хьраб хьлаз кә.
[5] Шькьр жь Хwәдер’а һ’әта-һ’әтайе! Амин.
[6] Әз ә’щебмайи дьминьм, кӧ һун ӧса зу пьшта хwә дьдьнә Хwәдейе кӧ бь сайа к’әрәма Мәсиһ гази wә кьр у бәре хwә дьдьнә мьзгиникә дьн.
[7] Р’аст мьзгиникә дьн т’ӧнә, ле һьнәк һәнә wә т’әви һәв дькьн у дьхwазьн Мьзгинийа Мәсиһ бьгӧһезьн.
[8] Ле һәгәр әм йан мьлйак’әтәк жи жь ә’змен бе, мьзгиникә ӧса бьдә wә, к’ижан кӧ нә мина wе Мьзгинийе йә, йа кӧ мә дайә wә, бьра ньфьр’ ль wи бә!
[9] Чаwа мә пешда гот, ньһа жи диса дьбежьм: Һәгәр йәк мьзгиникә нә мина wе Мьзгинийа кӧ wә qәбул кьр дьдә wә, бьра ньфьр’ ль wи бә!
[10] Чьма әз ньһа дькьм мәрьв жь мьн р’ази бьн, йан Хwәде? Йан гәло әз дькьм кӧ ль мәрьва хwәш бем? Һәгәр мьн һе бьхwәста әз ль мәрьва хwәш бьһатама, мьн нькарьбу әз бьбума хӧламе Мәсиһ.
[11] Әз ве йәке ль wә дьдьмә һ’әсандьне хушк-бьрано, кӧ әw Мьзгинийа мьн даннасин кьр, нә йа мәрьвайи йә.
[12] Мьн әw жь мәрьва нәстанд, нә жи жь кәсәки һин бум, ле Иса Мәсиһ мьнва ә’йан кьр.
[13] Wә бона беп’әргалийа мьнә бәрейә нава щьһутийеда бьһистийә. Мьн беһ’әсаб щьвина Хwәде дьзеранд у дькьр кӧ wе хьраб кьм.
[14] Әз нава щьһутийеда жь гәләк һәвалед хwәйә щьһу пешдатьр чубум, алийе р’аw-р’ьзьма кал-бавада жи гәләки хwәйихирәт бум .
[15] Ле гава Хwәде хwәст, (Йе кӧ әз бьжартьм, чахе әз һе зьке дийа хwәда бум у бь к’әрәма Хwә әз к’ьфш кьрьм),
[16] Кӧр’е Хwә мьнва ә’йан кьр, кӧ нава нәщьһуйада Wи даннасин кьм, һьнге мьн шеwьра хwә т’ӧ кәси нәкьр ,
[17] нә жи р’абумә Оршәлиме, щәм әwед кӧ бәри мьн бьбунә шанди, ле әз пер’а-пер’а чумә Ә’рәбьстане у диса вәгәр’ийамә Шаме.
[18] Паше се сала шунда р’абумә Оршәлиме, кӧ Пәтрус бьбиньм у панздәһ р’ожа щәм wи мам .
[19] Ле бәле жь шандийед майин мьн т’ӧ кәс нәдит, пештьри Аqубе бьре Хӧдан.
[20] Чь кӧ wәр’а дьньвисьм, әз бәр Хwәде бехельф дьбежьм.
[21] Паше чумә алийед Сурйайе у Киликйайе.
[22] Ле щьвинед Мәсиһә Щьһустанеда әз р’у бь р’у нас нәдькьрьм.
[23] Wана т’әне бьһистьбу кӧ: «Әwе wәхтәке әм дьзерандьн, ньһа хwәха wе баwәрийе даннасин дькә, к’ижан wи wәхтәке дькьр кӧ хьраб кә».
[24] У бона мьн шькьри дьданә Хwәде.