[1] وُمَ أَمْوُرَوَیٜ ࢻَلْࢽْجَدْ غَیُسْ کَمْ تْرَاࢽَدْرُو: جِرٜلَࢽْ ࢽجْرَاکّْࢽَ؞
[2] کْرَوُومَࢽِ، رُوࢽْمْ ࢻُوُ جُوُیْدْ غَیْ، أَوِ یَیٜࢽْ ࢻُوُ بُیْ یٜ، کْلٜوَ سَلَیْࢽِࢽْ دْغَیْ یٜرُو مُودُوَ ࢽجْدّْکِّ؞
[3] سَ کْرَمِیَ لَا إِسَࢽٜ کْلَ جِرٜࢽْمْبٜࢽْ شٜدَجَࢽَدْࢽْ، جِرٜلَࢽْ کْࢽْدْغَیْ دِمِدْ غَیْ، وُ یٜ کَرْوُࢽِ جَوْرُو کْجِیٜࢽُو؞
[4] أَیْ، ࢽجُرِیَࢽِ جِرٜلَࢽْ کْࢽْدْغَیْ ثَدِ ࢻَکِّیَ، ࢽَࢽِࢽْ کَرْوُکْجِ أَدَ کُوجْࢽَ بَوُو؞
[5] کْرَوُومَࢽِ، أَوُو کْرَمِیَرُو یِدّْمِ سَمَّࢽْ، مَسَمَّࢽُّو سِکُدُووَرُو، أَمَࢽَّرُو ࢻْلٜدْغْمَّ؞
[6] ࢻُوُ جَمَ عِیسَىٰ غَوُیٜࢽْ کْرَوُوࢽْمْدَ شٜدَجَࢽَ؞ جِرِ ࢻُوُ اللَّهیٜࢽْ جُسّْࢽَلَࢽْ تَیِیَ بَࢽَغْمٜ بْلَوُرُوࢽْجَ ثَدِیَ، جَوْرُو ࢽغْلَ،
[7] أَوُووَ أَوِمَ ࢽَ کْرْدِیَیٜࢽْ ثَمُواْࢽِّࢽْ ثُ عِیسَى أَلْمَسِیوُیٜ ࢽَࢽْغَرُو کٜلُوُو؞
[8] أَدْمَ ࢽَࢽْغَرُو أَمْ جِرِ أَدْغَیْدَ بَࢽَدُوُ وَجِمْسَاࢽَ، ࢽغَیْࢽِࢽْ جِرٜدْ ࢽَࢽْغَرُو سَوَوَࢽْجَ کِدَیٜرُو وَلِّیٜ؞
[9] جَمَ عِیسَىٰ غَوُدْرُو وُوتِیَ رُوُࢽْکّْࢽَ، أَمَّ دِیُوتَرِࢻِسْ، تِ دُوُوࢽْ وُࢽْدُࢽْجَ یَیٜیَ کُوجْࢽَرُو کْلَࢽْجُ ࢽغُودُ ثْرَاࢽَدْ، مَࢽَࢽْدٜ ࢽغُودُرُو وَیٜࢽُو؞
[10] أَدْ ࢽَࢽْغَرُو، إِسْکِّیَ، دِوِ دُوُوࢽْ کْلَ أَࢽْدِیٜࢽْ مَࢽَکُتُّ وُلْجِیَرُو ثْدِدَ إِسَتَࢽْغْغْکِّ؞ أَیْ، کْلَ أَدْیٜࢽْ دَجْࢽِّࢽْ کْرَمِیَدَ ثْمُویِوَوُو، کُورُو أَمْ تَیِیَ مُواْ ثَرَاࢽَدْرُو دَࢻْثِیٜ تَیِیَ جَمَدْلَࢽْ ثُتُّلُوِ؞
[11] کْرَوُومَࢽِ، مِسَلْ أَوُو دِوِیٜ غْࢽِ، ࢽغْلَیٜ غَیْ! ࢽغْلَ دِیُومَدْ اللَّهیٜ، دِوِ دِیُومَدْ اللَّهَ ࢽُوجْࢽِّ؞
[12] دِمِتْرِیُسْدْ، وُࢽْدُ یَیٜ کْلَࢽْجُࢽْ مَࢽَ ࢽغْلَ وُلْجِ، جِرٜ کْلَࢽْجُدْمَ ࢽغَیْ وُلْجِ؞ أَࢽْدِ یٜ تِیَ شٜدَࢽِیٜ، کُورُو شٜدَࢽْدٜدْ جِرٜرُو ࢽُوࢽْمَّ؞
[13] أَوُو ࢽغْوُ ࢽِرُو رُوُدُوُرُو رَاکّْࢽَ، أَمَّ تَدُّوَا رِسِوُوَلَࢽْ ࢻَیْدَدْکِّیَ، رَاکّْࢽِ؞
[14] تُسّْࢽِّࢽْ ࢽِیَ کُرُورُو تْمَکّْࢽَ، دَجِ سِمْبَ سِمْبَلَࢽْ مَࢽَࢽِیٜ؞
[15] ࢽَࢽْلٜوَ ࢽِلَࢽْ دْغَ؞ سَوَوَࢽْدٜ سَمَّ ࢽِیَ لٜوَࢽْجَیْ؞ سَوَࢽْدٜ ࢻِ یَیٜیَ لٜوَࢽٜ؞