[1] Chhám lé, liá liù ngìn-hiet ke sàng-sṳ! Chhiòn-sàng chhûng-mân cha-khî lâu khiòng-phau; mân-phien yû-ngìn chhióng-kiap, m̀-sṳt thìn.
[2] Piên-sâng pi̍t-po̍k hióng! Chhâ-lin lung-lung-kún! Chan-mâ pêu chhiong pî! Chan-chhâ phung-phung chéu!
[3] Khì-pîn chhûng-fûng, tô-kông kiam-yáng! Sṳ̂n-sṳ̂ tôi-sân, sṳ̂-kut vù-su; ngìn hàng thîn-thûng, chhiu kang tiet-tó.
[4] Kî-ńg Nì-nì-mì oi su chit-fa̍t; kì tá-pan to chiâng-chiâng lòi mì-ngìn. Kì ke yìm-lon yín-yu lie̍t-koet; kì hàng sià-su̍t khî-phien van-chhu̍k.
[5] Song-chú — Van-kiûn ke Ngièn-soi kóng: Nì-nì-mì â, Ngài he ngì ke thi̍t-ngìn; Ngài oi hiên ngì ke khiùn-è, lòi-miâng ngì ke mien, pûn lie̍t-koet khon-tó ngì chhak-sṳ̂n lu-thí, pûn van-mìn khon-tó ngì án kien-seu.
[6] Ngài oi chiông ô-chô tûng-sî vok chhai ngì sṳ̂n-song, án-ngiòng siû-yu̍k ngì; ngìn oi muk tâng-tâng khon-tén ngì.
[7] Khon-tó ngì ke ngìn hak-to tá-lon-thui. Kì-têu kóng: Nì-nì-mì fông-thet lé! Yû má-ngìn thùng-chhìn kì nè? Má-ngìn hén ôn-ví kì nè?
[8] Nì-nì-mì â, ngì yû pí Âi-khi̍p ke sú-tû Tí-pí-sṳ̂ kha-khiòng mò? Kì yû yit-thiàu hò-kiêu vì-tén kì, chhiong sàng-chhiòng án-ngiòng pó-fu kì — Nì-lò-hò he kì ke fòng-phi.
[9] Kú-sṳ̍t lâu Âi-khi̍p he kì ke li̍t-liong; kì ke khièn-li̍t vù-khiùng. Fut lâu Li-pí-â he kì ke thùng-mèn-koet.
[10] Chúng-he Tí-pí-sṳ̂ ke ngìn-mìn sa pûn-ngìn chok-to ngoi-koet hi lé. Kì-têu ke ô-nga-é chhai kiê-thèu hong-mî pûn-ngìn phiâng-sí; kì-têu ke thai-kôn kui-ngìn pûn thiet-lien só-tén, pûn-ngìn yung ngiâm-khiêu lòi fûn-phi, yèn-heu tai-chéu.
[11] Nì-nì-mì â, ngì ya voi chui-to mì-mì chhṳ̀-chhṳ̀; ngì ya voi sióng-oi sám ngì ke thi̍t-ngìn.
[12] Ngì ke sàng-pó chhiòn-phu chhiong vù-fâ-kó-su, mân-mân siuk-súi ke kó-chṳ́, su yit-yèu, kó-chṳ́ chhiu tiet-lo̍k ngìn ke choi-khûng tú!
[13] Ngì ke chan-sṳ chhiòn-phu chhiong ngiôn-ngio̍k ke se-moi-é. Ngì mò fap-thu chhai thi̍t-ngìn mien-chhièn pó-ví sàng-mùn; ngì ke mùn-chhôn voi pûn fó sêu-thet.
[14] Ngì oi tún-súi, fòng-phi thi̍t-ngìn pâu-vì! Ngì oi kâ-khiòng fòng-phi! Ngì oi tha̍p-nài cho-chôn, yi-phi chôn-mù!
[15] Ngì mò-lun ngióng-pân cho, hàn-he oi pûn-ngìn sêu-sí, ya-he pûn-ngìn chhṳ̀-sí. Ngì voi chhiong nùng-chok-vu̍t pûn chhó-máng sṳ̍t-to kông-kông. Thèu-pái ngì kiung-chṳ́ chhiong chhó-máng án-kiak án-tô;
[16] ngì cho sên-lî ke ngìn pí thiên-táng ke sên-é kha-tô! Chúng-he liá-ha chhiòn-phu chhiong chhó-máng thui-hok pî-chéu lé.
[17] Ngì ke liâng-chhiu chhiong yit-khiùn chhó-máng, hòn-thiên khong chhai chhiòng-phung tú, ngit-thèu yit chhut-lòi chhiu chhiòn-phu pî-chéu; mò-ngìn tî kì-têu to nai-vi hi.
[18] Â-sut fòng-ti â, ngì ke-têu thai-sṳ̀n chhiòn-phu vang-thet; ngì ke kôn-yèn chhiòn-phu soi sí lé. Ngì ke ngìn-mìn fûn-san chhai sân-tú, mò-ngìn tai kì-têu chón-lòi.
[19] Ngì ke sún-sông mò fap-thu pú-kiu; ngì ke sông-héu mò fap-thu yî-hó. Só-yû thâng-tó ngì fái sêu-sit ke ngìn chhiòn-phu fôn-hí phok-sú. Ngì chhòng-kiú ke phau-hàng, yû má-ngìn mò su-ko ngì ke ô-chô-châi nè?