[1] Oi thâng Song-chú ke fa. Kì kóng: “Mì-kâ â, hong hí-lòi! Oi chhai thai-sân lâu se-sân mien-chhièn kóng Ngài ke on-chhìn.”
[2] Khiùn-sân nâ, thai-thi kiên-ku ke kî-sa̍k â! Ngì-têu oi thâng Song-chú só-kóng ke on-chhìn! Song-chú oi ko Kì ke chṳ́-mìn, oi ko Yî-set-lie̍t.
[3] Song-chú án-ngiòng kóng: “Ngài ke chṳ́-mìn â, Ngài yû má-ke tui-m̀-hí ngì-têu ke? Ngài kám án tet-ngìn-nâu? Ngì-têu fong-se kóng â!
[4] Ngài tui Âi-khi̍p chiông ngì-têu thu chhut-lòi, chṳ́n-kiu ngì-têu thot-lì cho nù-chhòi ke só-chhai. Ngài phai Mô-sî, Â-lùn, Mî-li-ôn hi liâng-thô ngì-têu.
[5] Ngài ke chṳ́-mìn â, oi fì-sióng ke-sṳ̀ Mô-ap-vòng Pâ-le̍t ke yîm-mèu lâu Pí-ngí ke lai-é Pâ-làn en kì ke fa; oi fì-sióng tui Sṳ̍p-thìn to Kit-kap tông-chûng só fat-sên ke sṳ. Ngì-têu chhiu mìn-pha̍k Ngài só-cho ke chhiòn-phu he vi-tó chṳ́n-kiu ngì-têu.”
[6] Yû-ngìn mun: “Ngài yin-kôi tai má-ke lî-vu̍t lòi kien Song-chú nè? Ngài yin-kôi ngióng-pân lòi kin-pai thiên-táng ke Song-ti nè? Ngài tai chui-hó ke se ngiù-kú cho sêu-fa-chi lòi hien-pûn Kì, cho-tet mò?
[7] Song-chú kám voi fôn-hí ngài hien kí-chhiên chak yòng-kú, ya-he kí-van thiàu hò-pa án-tô ke kám-lám-yù? Kì kám voi fôn-hí ngài hien chóng-chṳ́ lòi thoi ngài su̍k-chhui?”
[8] Sṳ-kiên-ngìn â, Song-chú yí-kîn chṳ́-sṳ ngì má-ke he liòng-san. Kì tui ngì ke yêu-khiù he: Hàng kûng-ngi, hau lìn-mén, chhùn khiâm-pî lâu ngì ke Song-ti khiung-ha hàng.
[9] Kin-vi Song-chú he chui chhûng-mìn ke. Song-chú hiong sàng-tú ke chung-ngìn fû-ham: “Chhai sàng-tú ke chung kî-chhu̍k lâu ngi-fi, ngì-têu oi thâng!
[10] Fái-ngìn vuk-hâ ke chhòi-vu̍t he yung mò sṳ̀n-sṳ̍t ke sú-thon tet-lòi ke. Kì-têu sṳ́-yung lióng-yong ke chhṳn-é lâu sṳ̂n-téu; liá he Ngài chhin nâu ke.
[11] Yung lióng-yong chhṳn-é, thoi-tén kúi-cha chhṳn-thò ke ngìn, Ngài ngióng-nèn son kì mò-chhui nè?
[12] Sàng-tú ke yû-chhièn-ngìn pok-siok khiùng-ngìn; tî-poi ke ngìn-mìn chhiòn-phu he lau-é, kín kóng fâ-liâu.
[13] Yîn-vi ngì-têu fam-chhui, Ngài yí-kîn khôi-sṳ́ tá-kit ngì-têu, sṳ́ ngì-têu su chhûng-sông.
[14] Ngì-têu sṳ̍t, chúng-he sṳ̍t m̀-páu, tú-sṳ́ hàn-he khûng ke. Ngì-têu chhióng tûng-sî, chúng-he pó m̀-he̍t; yîn-vi ngì-têu chhióng chhut-lòi ke, Ngài oi yung chan-chên lòi fí-me̍t.
[15] Ngì-têu ve-chúng, chúng-he mò sû-sṳ̀n; ngì-têu cha kám-lám-yù, chúng-he mò kî-fi yung; ngì-têu kiuk-chiú, chúng-he hióng-su m̀-tó.
[16] Ngì-têu ho̍k Am-li-vòng lâu kiâ lai-é Â-ha̍p-vòng ke fái hàng-vì, ki-siu̍k kì-têu ke chok-fûng. Só-yî Ngài oi sṳ́ ngì-têu sôi-phai; phe̍t-ngìn oi méu-sṳ ngì-têu, vú-yu̍k ngì-têu.”