[1] Vi-tó oi pûn ngài-têu tet-tó chhṳ-yù, Kî-tuk yí-kîn sṳt-fong ngài-têu lé. Só-yî, ngì-têu oi khî-chhai, m̀-hó pûn nù-li ke ak chai khúng-chṳ ngì-têu!
[2] Ngài — Pó-lò chṳn-kîn lâu ngì-têu kóng, na-he ngì-têu chiap-su kot-lî, Kî-tuk tui ngì-têu chhiu mò má-ke pông-chhu.
[3] Ngài chai yit-pái kín-ko tak-ke chiap-su kot-lî ke ngìn, kì yit-thin oi chûn-hàng chhiòn-phu ke fap-li̍t!
[4] Ngì-têu sióng-oi kho chûn-hàng fap-li̍t lòi thùng Song-ti yû chṳn-khok koân-he ke ngìn, chhiu-he chhiet-thôn thùng Kî-tuk ke koân-he, sṳt-lo̍k Song-ti ke ên-tién.
[5] Lun-tó ngài-têu, ngài-têu kho Sṳn-Lìn ke li̍t-liong, thûng-ko ngài-têu ke sin-sîm, pet-chhiet phan-mong Song-ti voi pûn ngài-têu thùng Kì yû chṳn-khok ke koân-he.
[6] Yîn-vi, thùng Kî-tuk Yâ-sû kiet-lièn ke sṳ̀-chiet, yû su kot-lî ya-he mò su kot-lî lûng-chúng mò má-ke koân-he; chhung-yeu ke chṳ́-yû yit-hong, chhiu-he yung oi-sîm ke hàng-thung péu-hien chhut-lòi ke sin-sîm.
[7] Ngì-têu yit-tán chéu-to chhin hó! Má-ngìn làn-tén ngì-têu, hoi ngì-têu m̀ sun-chhiùng chṳ̂n-lî nè?
[8] Liá-chúng khien-va tông-yèn m̀-he tui ke fû-seu ngì-têu ke Song-ti lòi ke.
[9] Siu̍k-ngî kóng: “Yit-si̍t-é fat-kau chhiu pûn kûi-thòn mien fat-hí-lòi.”
[10] Ngài hàn-he siông-sin ngì-têu; yîn-vi ngài-têu lûng-chúng he thùng Chú kiet-lièn ke ngìn, ngài khok-sin ngì-têu ke khon-fap yin-tông m̀-voi thùng ngài ke yû má-ke chên-chhâ. Chúng-he, ke yéu-lon ngì-têu ke ngìn, mò-lun kì he má-ngìn, thin-chho̍k voi pûn Song-ti chit-fa̍t!
[11] Hiûng-thi chí-moi â, ngài na-he ki-siu̍k chhòn kot-lî, cho-má-ke hàn pûn-ngìn pet-hoi nè? Ngài na chṳn-kîn chhòn kot-lî, ngài só siên-yòng Kî-tuk ke sṳ̍p-sṳ-ka chhiu m̀-voi ngoi-tó kì-têu lé!
[12] Ngài chṳ̂n hî-mong ke-têu káu-lon ngì-têu ke ngìn chhṳ-kâ hi yâm-thet!
[13] Hiûng-thi chí-moi â, Song-ti sién-seu ngì-têu, he oi ngì-têu sàng-cho chhṳ-yù-ngìn. Chúng-he cho-m̀-tet yung liá chhṳ-yù cho fong-chiúng chhìn-yu̍k ke chia-khiéu, fán-chón oi yung oi-sîm fu-siông fu̍k-sṳ.
[14] Yîn-vi chhiòn-phu fap-li̍t lûng-chúng pâu-hàm chhai “siak lìn-sa chhiong siak chhṳ-kâ” liá-thiàu min-lin tî-poi.
[15] Oi se-ngi ô! Ngì-têu na-he chhiong khìm-chhu án-ngiòng ngâu-lòi ngâu-hi, ngì-têu thai-kâ yit-thin voi fu-siông sêu-me̍t!
[16] Ngài oi khiòng-thiau: Ngì-têu oi sun-chhiùng Sṳn-Lìn ke tai-liâng, chhiu m̀ voi mân-chiuk chhṳ-kâ ngiuk-thí ke chhìn-yu̍k.
[17] Yîn-vi ngiuk-thí ke chhìn-yu̍k thùng Sṳn-Lìn pí-chhṳ́ tui-li̍p, fu-siông kûng-kit, sṳ́ ngì-têu mò fap-thu cho ngì-têu sióng-oi cho ke.
[18] Chúng-he, na-he ngì-têu pûn Sṳn-Lìn tai-liâng, ngì-têu chhiu m̀-sṳ́ su fap-li̍t ke yok-suk lé.
[19] Chhìn-yu̍k ke sṳ he chhin mìn-hién ke, péu-hien chhai yìm-lon, lá-sap, ha-liù,
[20] pai ngiéu-siong, hàng sià-su̍t, kiet yên-sù, siông-châng, yen-hen, fat-khién, chhṳ-sṳ̂, fûn-phai, kiet-tóng,
[21] chhit-tu, chiú-chui, tiên-khòng yen-lo̍k, lâu khì-thâ liá-lui ke sṳ. Ngài yî-chhièn sṳt kín-ko ngì-têu, liá-ha chai kín-ko ngì-têu: Cho liá-chúng sṳ ke ngìn, yit-thin m̀-voi sàng-cho Song-ti koet ke chṳ́-mìn!
[22] Chúng-he Sṳn-Lìn só kiet ke kó-chṳ́ chhiu-he: Yìn-oi, hí-lo̍k, fò-phìn, ngiûn-nai, ên-chhṳ̀, liòng-san, sin-sṳ̍t,
[23] vûn-yù, lâu chiet-chṳ. Liá-têu sṳ fap-li̍t m̀-voi kim-chṳ́.
[24] Só-yû su̍k Kî-tuk Yâ-sû ke ngìn, yí-kîn chiông kì-têu ke ngiuk-thí, lièn ngiuk-thí ke yit-chhiet sià-chhìn lâu sṳ̂-yu̍k, lûng-chúng tâng-sí chhai sṳ̍p-sṳ-ka-táng lé.
[25] Ki-yèn Sṳn-Lìn su ngài-têu sîn sâng-miang, ngài-têu chhiu yin-kôi sun-chhiùng Kì ke tai-liâng lòi hàng-sṳ.
[26] Ngài-têu m̀-hó kiêu-ngau, m̀-hó ngiâ tui-fông fat-khién, ya-he fu-siông chhit-tu.