[1] Ngong Kâ-lâ-thai-ngìn â! He má-ngìn mì-fe̍t ngì-têu â? Yâ-sû Kî-tuk pûn-ngìn tâng-sí chhai sṳ̍p-sṳ-ka-táng ke sṳ, kám m̀-he chhiong yit-puk thù-fa, mìn-mìn chhai ngì-têu ke muk-chû-chhièn mâ?
[2] Ngài chṳ́-oi mun ngì-têu yit-khien sṳ: Ngì-têu chiap-su Song-ti ke Lìn he yîn-vi chûn-hàng fap-li̍t, ya-he thûng-ko thâng-sin fuk-yîm â?
[3] Ngì-têu ngióng-voi án ngong â? Ngì-têu ki-yèn thûng-ko Song-ti ke Lìn lòi khôi-sṳ́, ngióng-pân liá-ha sióng-oi kho chhṳ-kâ ke nèn-li̍t hi vàn-sṳ̀n nè?
[4] Ngì-têu só kîn-li̍t ke yit-chhiet lûng-chúng mò chhái-kûng he-mò? Kám he khûng-khûng!
[5] Song-ti su ngì-têu Sṳn-Lìn, yu chhai ngì-têu chûng-kiên hàng kok-chúng ke sṳ̀n-chiak, he yîn-vi ngì-têu chûn-hàng fap-li̍t, ya-he yîn-vi ngì-têu thâng-sin fuk-yîm â?
[6] Chhiong Sṳn-kîn lun Â-pak-lâ-hón ke sṳ̀ kóng: “Kì sin Song-ti, yîn-vi kì ke sin, Song-ti chhiu son kì cho ngi-ngìn.”
[7] Án-ngiòng, ngì-têu oi tî, yû sin-sîm ke ngìn chang he Â-pak-lâ-hón ke chṳ́-sûn.
[8] Sṳn-kîn yi-siên khon-tó, Song-ti oi pûn Ngoi-pâng-ngìn yîn-vi sin lòi thùng Kì yû chṳn-khok ke koân-he, só-yî chó chhiu chhòn liá fuk-yîm pûn Â-pak-lâ-hón, kóng: “Van-mìn lûng-chúng voi thûng-ko ngì tet-tó Song-ti ke su-fuk!”
[9] Â-pak-lâ-hón yîn-vi sin chhiu tet-tó fuk-hi; án-ngiòng, yit-chhiet sin ke ngìn ya oi thùng kì khiung-ha tet-tó fuk-hi!
[10] Yung chûn-hàng fap-li̍t cho yí-kho ke ngìn chhiòn-phu he sâng chhai chu-chú chṳ̂-ha; yîn-vi Sṳn-kîn kóng: “Fap-li̍t-sû só kûi-thin ke mî-yit-hong sṳ, mò yit-chhṳ̍t chûn-hàng ke ngìn, chhiu oi su Song-ti chu-chú.”
[11] Sṳ-sṳ̍t-song, mò-ngìn nèn kho chûn-hàng fap-li̍t chhai Song-ti mien-chhièn pûn Kì chhṳ̂n-cho ngi-ngìn; yîn-vi Sṳn-kîn kóng: “Thûng-ko sin pûn Song-ti chhṳ̂n-cho ngi ke ngìn yit-thin voi tet-tó sâng-miang.”
[12] Chúng-he, fap-li̍t ke kîn-kí pin m̀-he sin; tiên-to, Sṳn-kîn án-ngiòng kóng: “Chûn-sú fap-li̍t min-lin ke ngìn, voi yîn-vi fap-li̍t tet-tó sâng-miang.”
[13] Kî-tuk yí-kîn vi ngài-têu tâm-tông chu-chú, yung án-ngiòng lòi kiu-su̍k ngài-têu thot-lì fap-li̍t ke chu-chú; yîn-vi Sṳn-kîn kóng: “Só-yû pûn-ngìn tiau-sí chhai su-é táng-kô ke ngìn, chhiòn-phu su Song-ti ke chu-chú.”
[14] Kî-tuk án-ngiòng cho ke muk-tit he oi sṳ́ Song-ti só yin-hí su-pûn Â-pak-lâ-hón ke fuk-hi, thûng-ko Kî-tuk Yâ-sû lòi su-pûn Ngoi-pâng-ngìn; só-yî, ngài-têu chang cho-tet thûng-ko sin lòi liâng-su Song-ti só yin-hí ke Sṳn-Lìn.
[15] Hiûng-thi chí-moi â, ngài yung ngit-sòng sên-fa̍t ke sṳ kí-li lòi kóng: Lióng-ke ngìn thùng-yi yit-khien sṳ, yu tá khie-yok, chhiu mò ngìn cho-tet vì-yok ya-he kâ-kám má-ke.
[16] Khiung-yong, Song-ti yí-kîn tui Â-pak-lâ-hón lâu kì ke chṳ́-sûn li̍p-liáu yin-hí. Sṳn-kîn pin m̀-he yung “tui chṳ́-chṳ́ sûn-sûn” lòi chṳ́ tông-tô ngìn; he kóng “tui ngì ke chṳ́-sûn”, tân-tân chṳ́ yit-ke ngìn, chhiu-he Kî-tuk.
[17] Ngài ke yi-sṳ he kóng: Song-ti li̍p-liáu khie-yok, yu tap-yin oi sú liá-ke khie-yok. Si-pak sâm-sṳ̍p ngièn heu chang chhut-hien ke fap-li̍t cho-m̀-tet pho-fai liá-ke khie-yok, lòi fi-thet Song-ti ke yin-hí.
[18] Yîn-vi Song-ti só-su ke sán-ngia̍p na-he yung fap-li̍t cho kîn-kí, chhiu m̀-he cheu yin-hí lé; chúng-he, Song-ti sṳ̂-ên su sán-ngia̍p pûn Â-pak-lâ-hón he cheu Kì ke yin-hí.
[19] Án-ngiòng, fap-li̍t ke muk-tit he má-ke nè? Fap-li̍t he vi-tó chṳ́-chhut má-ke he ko-fam lòi sat ke, chhṳ̍t-to ke yin-hí pûn Â-pak-lâ-hón ke “chṳ́-sûn” lòi-to chhiu kiet-suk. Fap-li̍t he thûng-ko thiên-sṳ́, theu-ko yit-ke chûng-kiên-ngìn lòi pân-pu ke.
[20] Chúng-he, tân-fông-mien ke sṳ chhiu m̀-sṳ́ chûng-kiên-ngìn; Song-ti ke yin-hí he tân-fông-mien ke sṳ.
[21] Án-ngiòng lòi kóng, fap-li̍t he fán-tui Song-ti ke yin-hí mâ? Chhie̍t-tui m̀-he! Na-he fap-li̍t ke pân-pu nèn vi ngìn-lui tai-lòi sâng-miang, ngìn chhiu cho-tet kho fap-li̍t lòi thùng Song-ti yû chṳn-khok ke koân-he lé.
[22] Chúng-he Sṳn-kîn kóng, chhiòn sṳ-kie lûng-chúng chhai chhui ke khièn-sṳ chṳ̂-ha; yîn-vi án-ngiòng, Song-ti oi yung Yâ-sû Kî-tuk ke sin-sṳ̍t cho liâng-su yin-hí ke kî-chhú; liá yin-hí he su-pûn só-yû siông-sin ke ngìn.
[23] Chúng-he, “sin” ke sṳ̀-thoi màng to yî-chhièn, fap-li̍t he chóng-kón ngài-têu ke, chhiong chóng fam-ngìn yit-yong, chhṳ̍t-to “sin” hién-mìn chhut-lòi ke-sṳ̀.
[24] Só-yî, fap-li̍t he cho ngài-têu ke kam-fu-ngìn, chhṳ̍t-to Kî-tuk lòi-to, án-ngiòng, ngài-têu chhiu yîn-vi “sin” lòi pûn Song-ti chhṳ̂n-cho ngi-ngìn.
[25] Ki-yèn liá-ha he “sin” ke sṳ̀-thoi, ngài-têu chhiu mò chai su fap-li̍t ke kam-fu lé.
[26] Ngì-têu thai-kâ chhiòn-phu he thûng-ko sin Kî-tuk Yâ-sû lòi sàng-cho Song-ti ke chṳ́-ńg.
[27] Ngì-têu liâng sé-lî kûi-ngi̍p Kî-tuk, chok-sông Kî-tuk chhiu-chhiong chok-sâm yit-yong.
[28] Mò fûn Yù-thai-ngìn ya-he Ngoi-pâng-ngìn, nù-li ya-he chhṳ-yù-ngìn, nàm-ngìn ya-he ńg-ngìn, chhai Kî-tuk Yâ-sû ke sâng-miang tî-poi, ngì-têu chhiòn-phu sàng-cho yit-thí lé.
[29] Ngì-têu na-he su̍k Kî-tuk, ngì-têu chhiu-he Â-pak-lâ-hón ke heu-thoi lé, voi liâng-su Song-ti só yin-hí ke sán-ngia̍p.