[1] Hàn-yû, oi ki-sṳ̀n â-pâ sán-ngia̍p ke lai-é, sûi-yèn só-yû ke sán-ngia̍p chhiòn-phu he kì ke, chúng-he hàn cho se-ngìn-è ke sṳ̀-chiet, kì lâu nù-phu̍k mò má-ke fûn-phe̍t.
[2] Chhai kì hàn se ke sṳ̀-chiet, yû ngìn cheu-ku kì, thoi kì kón-lî kâ-ngia̍p, yit-chhṳ̍t tén-to kiâ-pâ vi kì só thin ke ngit-è lòi-to.
[3] Khiung-yong, ngài-têu ke lìn-sin hàn chhiong se-ngìn-è ke sṳ̀-chiet, ya he pûn yí-chhiu-kiên só-vi sên-siuk ke sṳ̀n-lìn chṳ̂-phi cho nù-chhòi.
[4] Chúng-he, sṳ̀-kî sṳ̀n-su̍k ke sṳ̀, Song-ti chhiu chhâi-phai chhṳ-kâ ke Lai-é, tui ńg-ngìn lòi chhut-se, yu sên-fa̍t chhai fap-li̍t chṳ̂-ha,
[5] muk-tit he oi kiu-su̍k sên-fa̍t chhai fap-li̍t chṳ̂-ha ke ngìn, pûn ngài-têu yû-hó sàng-cho Song-ti ke chṳ́-ńg.
[6] Vi-tó oi chṳn-mìn ngì-têu he Kì ke chṳ́-ńg, Song-ti chhiu chhâi-phai Kì ke Lai-é ke Lìn ngi̍p ngài-têu ke sîm, fû-ham: “Â-pâ! Ngài ke Yà!”
[7] Só-yî, chhiùng-kîm yî-heu, ngì chhiu m̀-he nù-phu̍k lé, he lai-é; ki-yèn he lai-é, Song-ti chhiu pûn ngì cho ki-sṳ̀n-ngìn.
[8] Yî-chhièn ngì-têu m̀-sṳt Song-ti ke sṳ̀, he pûn ke-têu m̀-he sṳ̀n ke sṳ̀n-mìn cho nù-chhòi.
[9] Liá-ha ngì-têu yí-kîn ngin-sṳt Song-ti (sṳ-sṳ̍t-song he pûn Song-ti ngin-sṳt), ngióng yu to-chón-hi chhìm ke-têu mò nèn-li̍t lâu mò lu-yung ke sên-siuk ke sṳ̀n-lìn nè? Ngióng oi chhùng-sîn hi cho kì-têu ke nù-chhòi nè?
[10] Ngì-têu hàn chiông ke-têu ngit, ngie̍t, chiet-khì, lâu ngièn-fun ke kûi-thin sú to sí-sí!
[11] Ngài vi ngì-têu sṳ̍t-chhai yù-sèu, chhin kiâng ngài thèu-pái chhai ngì-têu chûng-kiên só-cho ke chhiòn-phu lo̍k-khûng lé.
[12] Hiûng-thi chí-moi â, ngài khiù ngì-têu, oi chiông sîm pí sîm, chhiong ngài ngin-thùng ngì-têu yit-yong. Yî-chhièn, ngì-têu m̀-sṳt cho-ko tui-m̀-hí ngài ke sṳ.
[13] Ngì-têu hàn ki-tet mâ? Ngài thèu-yit-pái hi chhòn fuk-yîm pûn ngì-têu, he yîn-vi ngài pot-phiang só chho-sṳ̀n ke kî-fi.
[14] Sûi-yèn ngài ke phiang sṳ́ ngì-têu su chhin thai ke kháu-ngiam, chúng-he ngì-têu mò khon-khiâng ngài, ya mò khî-chhie̍t ngài. Tiên-to, ngì-têu chiap-thai ngài, chhiong chiap-thai Song-ti ke thiên-sṳ́, chhiong chiap-thai Kî-tuk Yâ-sû yit-yong.
[15] Ke-sṳ̀ ngì-têu án fôn-hí! Chúng-he liá-ha nè? Ngài kám-kóng, ke-sṳ̀, na-he yû fap-thu, chhiu-he chiông chhṳ-kâ ke muk-chû yet pûn ngài, ngì-têu me ngien-yi.
[16] Liá-ha ngài lâu ngì-têu kóng chṳ̂n-lî, fán-chón sa sàng-cho ngì-têu ke tui-thi̍t he-mò?
[17] Ke-têu ngìn tui ngì-têu án ngie̍t-sîm, m̀-he má-ke hó sîm-su̍t. Kì-têu ke muk-tit he oi chhiet-thôn ngì-têu lâu ngài ke koân-he, sṳ́ ngì-têu chang voi ngie̍t-sîm tui-thai kì-têu.
[18] Chhai san-sṳ-song ngie̍t-sîm pún-lòi he hó ke, chúng-he m̀ tân-chhiang ngài thùng ngì-têu khiung-ha ke sṳ̀ chang án-ngiòng.
[19] Ngài chhîn-oi ke chṳ́-ńg â, ngài vi ngì-têu chai yit-pái chhiong â-mê ngiûn-su sên-sán ke thung-khú, chhṳ̍t-to Kî-tuk chhai ngì-têu ke sâng-miang-chûng sṳ̀n-hìn.
[20] Liá-ha, ngài na-he thùng ngì-têu khiung-ha, m̀-tî voi yû kí hó ô! Ngài lâu ngì-têu kóng-fa ke khiéu-hi chhiu m̀-sṳ́ chhiong án-ngiòng. Vi-tó ngì-têu, ngài ke sîm sṳ̍t-chhai mò-kat mò-sat!
[21] Ke-têu sióng-oi sên-fa̍t chhai fap-li̍t chṳ̂-ha ke ngìn, ngài mun ngì-têu yit-ke mun-thì: Ngì-têu mò thâng-ko Mô-sî ke fap-li̍t mâ?
[22] Fap-li̍t-sû ki-chai kóng, Â-pak-lâ-hón yû lióng-ke lai-é, yit-ke he sṳ́-ńg kiung ke, yit-ke he chhṳ-yù ke fu-ngìn-kâ kiung ke.
[23] Sṳ́-ńg kiung ke he cheu ngìn ke yi-sṳ lòi kiung ke; chhṳ-yù ke fu-ngìn-kâ kiung ke he tui Song-ti ke yin-hí lòi ke.
[24] Liá cho-tet khon-cho yit-ke pí-yi: Ke lióng-ke fu-ngìn-kâ he thoi-péu lióng-chúng ke khie-yok. Khì-chûng yit-ke yok he tui Sî-nai-sân lòi ke, só kiung ke chhiu oi cho nù-li; liá chhiu-he Ha-kap.
[25] Ha-kap he thoi-péu chhai Â-lâ-pak ke Sî-nai-sân, khó-pí kîm-pû-ngit ke Yâ-lu-sat-lâng; kì lâu kì ke chṳ́-ńg só ko ke he nù-li ke sên-fa̍t.
[26] Chúng-he, chhai thiên-táng ke Yâ-lu-sat-lâng he chhṳ-yù ke; kì chang he ngài-têu ke â-mê.
[27] Yîn-vi Sṳn-kîn ki-chai kóng: Mò fài-thôi, mò kiung-chṳ́ ke pû-ngiòng-ngìn â, ngì oi fôn-hí! Màng-sṳt kîn-li̍t sên-sán ke thung-khú ke, ngì oi thai-sâng fôn-fû! Yîn-vi su lâng-lo̍k ke pû-ngiòng-ngìn pí ke thùng ló-kûng khiung-ha sên-fa̍t ke, voi yû kha-tô ke chṳ́-ńg!
[28] Hiûng-thi chí-moi â, chhiong Yî-sat khiung-yong, ngì-têu he tui Song-ti ke yin-hí lòi sàng-cho Song-ti ke chṳ́-ńg.
[29] Tông-sṳ̀, ke cheu ngìn ke yi-sṳ kiung ke, pet-hoi Sṳn-Lìn só kiung ke; liá-ha ya he án-ngiòng.
[30] Chúng-he Sṳn-kîn ngióng-pân kóng nè? Sṳn-kîn kóng: “Chiông sṳ́-ńg lâu kiâ lai-é kiuk chhut-hi, yîn-vi sṳ́-ńg ke lai-é cho-m̀-tet thùng chhṳ-yù ke fu-ngìn-kâ só kiung ke lai-é khiung-ha ki-sṳ̀n sán-ngia̍p.”
[31] Chúng-kóng, hiûng-thi chí-moi â, ngài-têu m̀-he sṳ́-ńg ke chṳ́-ńg; ngài-têu he chhṳ-yù ke fu-ngìn-kâ só kiung ke.