[1] Ngài khon-tó Chú khî chhai chi-thàn ke sùn-thèu; Kì kóng: “Ngài oi khau sṳn-thien ke tung-liòng, sṳ́ kûi-kiên vuk lap hâ-lòi, tá-lan tak-sà ke thèu-nà. Ngài oi yung tô-kiam chhṳ̀-sí khì-thâ ke ngìn, mò yit-sà sám tet-khôi, mò yit-sà chéu tet-hi.
[2] Chhiu-son kì-têu yet thi-lùng, chon-ngi̍p yîm-kiên, Ngài ya oi chiông kì-têu khiú chhut-lòi! Chhiu-son kì-têu pak-sông thiên, Ngài ya oi chiông kì-têu lâi hâ-lòi!
[3] Chhiu-he kì-têu chéu-to Kâ-me̍t-sân táng, Ngài ya oi hi sêu-sân, chiông kì-têu chhìm chhut-lòi! Chhiu-son kì-têu khong chhai hói-tái, Ngài ya oi ham hói-sà ngâu kì-têu!
[4] Chhiu-son kì-têu yí-kîn pûn-ngìn chok-chéu, Ngài ya oi ham thi̍t-ngìn chhṳ̀-sí kì-têu! Ngài oi yung muk-chû hìm kì-têu, Ngài oi kong châi-fo, mò-oi kong fuk-hi.”
[5] Chṳ-kô ke Song-chú — Van-kiûn ke Ngièn-soi yit miâ-tó thi, thi chhiu yùng-thet; thi-song ke ngìn-mìn chhiòn-phu sông-sîm thai-kieu, thi chhiong Nì-lò-hò ke súi fèu-hí chhṳ̀m-lo̍k.
[6] Song-chú chhai thiên-táng hí kiûng-thien, chiông kiûng-chhông ôn chhai thai-thi ke táng-kô, Kì fûn-fu thai-hói ke súi, tó chhai thi-song. Kì ke miàng he Song-chú.
[7] Song-chú kóng: “Yî-set-lie̍t-ngìn nâ, Ngài me koân-sîm Kú-sṳ̍t-ngìn, chhiu-chhiong Ngài koân-sîm ngì-têu. Ngài me thu Fî-li-sṳ-ngìn chhut Khiet-lî-thi̍t, thu Si-li-â-ngìn chhut Kit-ngí, chhiu-chhiong Ngài tui Âi-khi̍p chiông ngì-têu thu chhut-lòi.
[8] Ngài — Chṳ-kô ke Song-chú yung muk-chû hìm liá chhui-thai ok-khi̍t ke Yî-set-lie̍t-koet. Ngài oi tui thi-mien-song chiông kì chhù-thet, chúng-he Ngài m̀-voi chiông Ngâ-kok ke heu-thoi chhiòn-phu sêu-me̍t.
[9] “Ngài oi min-lin, chiông Yî-set-lie̍t-ngìn piong chhai lie̍t-koet tông-chûng chhî, chhiong piong-ngi̍p chhî-é, chiông phai-lui chhiòn-phu chhî-thet.
[10] Chhai Ngài ke chṳ́-mìn tông-chûng, ke-têu kóng: ‘Khú-nan m̀-voi lìm-to ngài-têu’ ke chhui-ngìn, chhiòn-phu voi sí chhai tô-kiam chṳ̂-ha.”
[11] Song-chú kóng: “Yû yit-ngit, Ngài oi chhùng-kien Thai-ví ke pho-sui ke vòng-koet. Ngài oi siû-cháng kì ke sàng-chhiòng; Ngài oi chiông kì chhùng-sîn hí-to lâu thèu-pái vàn-chhiòn khiung-yong;
[12] Ngài oi sṳ́ Yî-set-lie̍t-ngìn yû nèn-li̍t kûng-tá só-chhûn ke Yî-tûng-ngìn, sû-fu̍k su̍k Ngài miàng-hâ só-yû ke koet.” Liá-ke fa he cho liá-têu sṳ ke Song-chú kóng ke.
[13] Song-chú kóng: Khon â, ke-ngit voi to lé, ńg-kuk fûng-tên màng kot chhiû, chhiu to sṳ-thièn ke sṳ̀, phù-thò mân-phàng màng tha̍p chhiû, yu to ve-chúng ke sṳ̀. Thai-sân liù-chhut hó-chiú, liù-ko ke-têu se-sân.
[14] Ngài oi thu Ngài ke chṳ́-mìn Yî-set-lie̍t-ngìn chón-lòi pún-thi; kì-têu oi chhùng-kien pho-sui ke sàng-sṳ, yún-kiú he̍t chhai ke-vi. Kì-têu oi chhùng-sîn kâng-chung phù-thò-yèn, lîm chhṳ-kâ só-kiuk ke chiú; kì-têu oi chhùng-sîn kîn-yìn kó-chṳ́-yèn, sṳ̍t khì-chûng chhut-sán ke súi-kó.
[15] Ngài oi chiông Ngài ke chṳ́-mìn chung chhai Ngài su-pûn kì-têu ke thú-thi; kì-têu chhie̍t-tui m̀-voi chai pûn-ngìn lièn-kîn pâng-thet. Song-chú — ngì-têu ke Song-ti án-ngiòng siên-pu lé.