[1] Yî-set-lie̍t-ngìn â, ngì-têu oi thâng Song-chú kûng-kit ngì-têu chhiòn-koet ngìn-mìn só-kóng ke fa. Song-chú sṳt tui Âi-khi̍p chiông ngì-têu thu chhut-lòi;
[2] Kì kóng: “Chhai chhiòn sṳ-kie án-tô koet-kâ chûng, Ngài chṳ́-yû sién ngì-têu, ngì-têu hàn fam án-tô ke chhui; só-yî Ngài yit-thin oi chit-fa̍t ngì-têu.”
[3] Lióng-sà na m̀ siông-chheu, ngióng-voi khiung-ha hàng nè?
[4] Sṳ̂-é na-mò chok-tó lia̍p-vu̍t, ngióng-voi chhai su-lìm chûng ho-ho-kún? Yúng-chong ke sṳ̂-é mò chok-tó tûng-sî, ngióng-voi chhai lùng-tú chhin-hò?
[5] Na-he chok tiâu-é ke kî-koân mò piong sṳ̍t-vu̍t, ngióng-pân chok tet-tó tiâu-é? Na-he mò tûng-sî thûng-tó kî-koân, kì ngióng-voi thiàu hí-lòi?
[6] Chok-chan ke kín-po yit-hióng, sàng-tú ke ngìn kám voi m̀-kiâng? Na m̀-he Song-chú ke chṳ́-yi, châi-fo voi lìm-to ke-sàng mâ?
[7] Chṳ-kô ke Song-chú oi yû hàng-thung ke sṳ̀, yit-thin siên chiông kie-va̍k lâu Kì ke phu̍k-ngìn — ke-têu siên-tî kóng.
[8] Sṳ̂-é ho-ho-kún ke sṳ̀, má-ngìn m̀-kiâng? Chṳ-kô ke Song-chú kóng-fa ke sṳ̀, má-ngìn kám m̀ chhòn yi-ngièn nè?
[9] Ngì hi hiong ke-têu he̍t chhai Âi-khi̍p lâu Â-sṳ̍t-thut vòng-kiûng tú ke ngìn siên-pu: “Ngì-têu oi chhai Sat-mâ-li-â ke sân-táng si̍p-ha̍p, khon sàng-tú só fat-sên fun-lon, khî-ap ke sṳ.”
[10] Song-chú án-ngiòng kóng: “Ke-têu ngìn chhai kì-têu ke sàng-pó tôi-mân chhióng-lòi lâu pok-siok ke chhòi-vu̍t; kì-têu m̀-tî má-ke ôn-to kûng-tong.
[11] Só-yî, thi̍t-ngìn voi pâu-vì kì-têu ke sàng-sṳ, pho-fái kì-têu ke fòng-sien, chhióng kì-têu ke sàng-pó.”
[12] Song-chú án-ngiòng kóng: “Chhiu-chhiong mu̍k-yòng-ngìn chṳ́-yû tui sṳ̂-é ke choi-tú chhióng-chón lióng-kî yòng-kiok ya-he pan-chak ngí-kûng thin-thin, chhai Sat-mâ-li-â ko chhâ-fà sên-fa̍t ke Yî-set-lie̍t-ngìn ya chṳ́-yû séu-su yû khó-nèn tui châi-nan chûng tet-tó chṳ́n-kiu.”
[13] Chṳ-kô ke Song-chú — Van-kiûn ke Ngièn-soi Song-ti kóng: “Oi thâng! Oi kín-ko Ngâ-kok ke heu-thoi:
[14] Ngài chit-fa̍t Yî-set-lie̍t só-fam ke chhui sṳ̀, Ngài oi chhak-thet Pak-thi̍t-li-sàng ke chi-thàn; chi-thàn ke si-chak kok voi pûn-ngìn khau-thet, tiet chhai thi-song.
[15] Ngài oi chhak-thet kì-têu phit-sú ke phe̍t-chông lâu phit-hòn ke nôn-fòng; siong-ngà chông-fòng ke vuk lâu chhin-chiâng ke thai-vuk chhiòn-phu voi vang-to tap-tap.” Song-chú án-ngiòng siên-pu lé.