[1] Ayuba ka Bilidadi jaabi ko:
[2] Can ra, ne k’a lɔn ko i ka min fɔ ko a bɛ ten le; adamaden tagamacogo bɛ se ka teren Ala ɲa kɔrɔ cogo di?
[3] Ni i ko i bɛ sɔsɔri kɛ ni Ala ye, ni a ka ɲininkari waga kelen kɛ, ele tɛna se ka hali kelen jaabi a ra.
[4] Hakiritigiya b’a fɛ, a ta sebagaya fana ka bon. Jɔn le bɛ se ka lɔ k’a kɔnɔ, ni fɛn ma o tigi sɔrɔ?
[5] Ale le bɛ kuruw wuri ka o bɔ o nɔ ra, hali o tɛ bɔ a kala ma; ni a dimina, a bɛ kuruw dabiri.
[6] A bɛ dugukolo siginin to a jusiginan kan k’a yɛrɛyɛrɛ, fɔ a samasenw bɛ yuguyugu.
[7] A bɛ kuma tere fɛ ko a kana bɔ, tere tɛ bɔ; a bɛ lolow datugu janko o yeelen kana bɔ.
[8] Ale kelen le bɛ sankolo yɛrɛgɛ, a bɛ tagama kɔgɔji jikurubaw kunna.
[9] Ale le ka sahiliyanfan ta lolow bɛɛ dan, ani samiya wagati ta lolow, ani teremana wagati ta lolow, ani woroduguyanfan ta lolow.
[10] A bɛ kobaw kɛ, ko minw tɛmɛna adamaden hakiri dan kan; a bɛ kabako minw kɛ, o tɛ se ka jate ka ban.
[11] A flɛ, a bɛ se ka tɛmɛ ne kɔrɔ, nka ne t’a ye, a bɛ se ka taga ka bɔ ne kɔrɔ, nka ne tɛ bɔ foyi kala ma.
[12] Ni a ka fɛn min mina, jɔn le bɛ se ka o bɔsi a boro? Jɔn le bɛ se k’a fɔ a ma ko: «I bɛ mun le kɛra tan?»
[13] Ala tɛna a ta jusugban mala; kɔgɔji danfɛn barakaman ni a jɛnɲɔgɔnw bɛɛ bɛ o yɛrɛ majigi a kɔrɔ.
[14] O tuma ne bɛ se k’a jaabi cogo di? Ne bɛ se ka kuma juman le sɔrɔ ka sigi ka o fɔ ni a ye?
[15] Hali ni ne tun terennin lo, ne tun tɛna se k’a jaabi; ne bɛ se k’a daari le dɔrɔn, sabu ale le ye ne ta kititigɛbaga ye.
[16] Ni ne k’a wele, hali ni a ka ne jaabi, ne tɛna la a ra ko can ra, a bɛ sɔn k’a toro malɔ ka ne lamɛn.
[17] A bɛ ne fifa ka taga fan bɛɛ ra ni a ta sanfɔɲɔ ye; a bɛ ne ta tɔɔrɔkow caya k’a sɔrɔ ne ma foyi kɛ a ra.
[18] A t’a to ne ye nɛnɛkiri; a bɛ jusukasi caya ne kan.
[19] Ni ne ko ne b’a kɛ fangako ye, ale baraka le ka bon; ni ne ko ne bɛ taga ni a ye kiti ra, jɔntigi le bɛna o kiti sigi?
[20] Hali ni ne tun terennin lo, ne yɛrɛ da tun bɛna kiti ben ne kan; hali ni ne jusukun tun gbɛnin lo, ne yɛrɛ da tun bɛna ne jaraki.
[21] Yala ne jusukun gbɛnin lo can ra wa? Ne m’a lɔn! Ne lɔgɔ bɔra ne yɛrɛ ra!
[22] A bɛɛ ka kan ne fɛ sisan! O kosɔn ne ko: «Ala bɛ mɔgɔ jusukungbɛnin ni mɔgɔjugu bɛɛ halaki cogo kelen na!»
[23] Hali ni kojugu dɔ ka bara ka ben mɔgɔ terennin kan k’a faga, Ala bɛ yɛrɛko mɔgɔ jarakibariw ta jusukasikow ra le.
[24] Ale le bɛ jamana labla mɔgɔjuguw ye, k’a to kititigɛbagaw ye o ɲaw datugu kojugu kan. Ni ale tɛ, o tuma jɔntigi lo sa?
[25] Ne si terew bɛ tɛmɛna joona joona; a ka teli ka tɛmɛ hali sennaboribaga teliman kan. Ne si bɛ banna k’a sɔrɔ ne ma hɛra ye ne ɲa ra.
[26] Ne si terew bɛ tɛmɛna joona joona le, i ko jirakurun min ka fiyɛn, i ko bɔn bɛ jigi ka na cun sogo kan cogo min na.
[27] Ni ne ko ne bɛ ɲina ne ta dimi kɔ, ka ne ɲada cogoya yɛlɛma, ka ninsɔndiya,
[28] ne ta sɛgɛ bɛ ne lasiran; sabu ne k’a lɔn ko i tɛna ne jarakibari to.
[29] Ne le bɛna jaraki! O tuma mun kosɔn ne bɛ ne yɛrɛ sɛgɛ gbansan?
[30] Hali ni ne kora ni ji saninyaninba dɔ le ye, ka ne tɛgɛw ko k’a gbɛ ni safina ye,
[31] o bɛɛ n’a ta, i belen bɛna ne lajigi kaburu kɔnɔ, bɔgɔ ra; hali ne ta faniw bɛ ne haramuya.
[32] Ala tɛ adamaden ye, i ko ne, janko ne y’a jaabi, walama ko ne ye a wele ka taga kititigɛyɔrɔ ra.
[33] Kititigɛbaga si tɛ se ka don an fla cɛ, min bɛ se k’a ta fanga sigi an fla bɛɛ kan,
[34] janko a ye a ta bere bɔ ne kan, a ta siranyakow kana ne ja tigɛ tuun.
[35] Ni o tun bɛ se ka kɛ, ne tun bɛna kuma, ne tun tɛna siran a ɲa tuun; nka o tɛ se ka kɛ, ne tora ne kelen na le.