[1] A Sol ʋl cãa bɛ tɩ bɛrɛ a Sore po-tuurbɛ ɩ, ɛ bɔbr a bɛ kʋ́b. Ʋ tɩ cen na tɩ páw a bawr-maal-kara,
[2] ɛ ƴãw ʋ kʋ̀ ʋ sɛb-tʋɔlɩ a Damasɩ tẽw puoru-diru nɩ-bɛrɛ ƴãw, kɛ́ ʋlɛ wa tɩ nyɛ̃ nɩbɛ, dɛbr bɩɩ pɔwbɛ, bɛ tuur a Yeezu sɔr a, ʋ̃ʋ nyɔw bɛ ƴãw bamɛ wa n a Zeruzalɛm.
[3] Ʋ tɩ lo n a sɔr cere tɩ pɩɛlɛ a Damasɩ, wa bere cãa yi a salom zu wa caalɩ pili pàw ʋ.
[4] Ʋ tɩ lo na gã tẽw ɛ wõ kɔkɔr ʋ yere a ʋ zie: «Sol i, Sol i, bʋ̃ʋ n'ʋ so fʋ dɔwrɛ mɛ̃?»
[5] A Sol tɩ sowr ʋ na: «Ãa nɛ b, Sore e?» Ʋ tɩ sɔw na: «Mãa n'ɩ a Yeezu, mãa n'ʋ fʋ dɔwrɛ.
[6] Ɛ cɛ ìr kpɛ a tẽw pʋɔ, bɛ na tɩ yel a kʋ̀ b a ʋlɩ bom nɛ a na fɛr kɛ fʋ ɩ a.»
[7] Dɛ̃bɩ̃ɛ tɩ gbĩni nɩ a Sol sɔr-lãw-cen-taabɛ bɛ ar gbili: bɛ tɩ wone nɩ a kɔkɔr, ɛ cɛ bɛ bɛ tɩ nyɛ̃ nɩr za ɩ.
[8] A Sol tɩ lɛb a ìr. Ɛ cɛ ʋ na saa tɩ yuo a mimie a, ʋ bɛ tɩ nyɛrɛ ɩ. A ʋ sɔr-lãw-cenbɛ tɩ nyɔw ʋ nɩ nũú taw tɩ kpɛn a Damasɩ.
[9] Ʋ tɩ maal ɩ bibie ata, ɛ cãa bɛ nyɛrɛ ɩ. Ɛ a bibie ata a ŋa za ʋ bɛ dɩ bom ɛ, ɛ bɛ nyũ bom ɛ.
[10] Yeezu po-tuure kãw, na dɩ kɛ Ananɩasɩ a, tɩ be n a Damasɩ. Ʋ tɩ nyɛ̃ nɩ a Sore ʋ bʋɔl ʋ: «Ananɩasɩ ɩ! » Ʋ sɔw: «Mãa n'ɩ ŋan Sore e.»
[11] A Sore tɩ yel ʋ na: «Ìr yi a sɔr ʋl zu bɛ na bʋɔlɛ a ‹Sɔr-dẽdẽ› a, tɩ kpɛ a Zuda yir sowri nɩr kãw na dɩ kɛ Sol a, Tarsɩ n'a ʋ yi. Ʋ puore na,
[12] ɛ nyɛ̃ nɩr na dɩ kɛ Ananɩasɩ a, ʋ wa kpɛ ír nuru dɔwlɩ a ʋ zu k'ʋʋ tʋ̃ɔ lɛ nyɛrɛ.»
[13] A Ananɩasɩ tɩ sɔw na: «Sore e, ɩ̃ wõ n nɩ-yaga na ƴɛr a nɩr ŋa ƴɛrʋ a, nɩ a dɔwrʋ al za ʋ na dɔwrɩ a fʋ nɩbɛ a Zeruzalɛm a.
[14] A bawr-maal-nɩ-bɛrɛ kʋ̀ ʋ nɩ sɔr ʋ wa a ka, k'ʋʋ wa nyɔw a bɛlɩ dem za na bʋɔlɛ a fʋ yúor a ƴãw bamɛ.»
[15] Ɛ cɛ a Sore tɩ yel ʋ na: «Cen, a nɩr ŋa ɩ n tõ-tõ-bom ɩ̃ na kaa ir k'ʋʋ ɩ a ɩ̃ yúor yi ta a nɩ-bʋʋr-yoru, a na-mɩnɛ nɩ a Ɩsɩrayɛl biir zie a.
[16] Mãa mɩŋa na wul ʋ nɩ a tuo al za a na fɛr k'ʋʋ wõ a ɩ̃ yúor ƴãw a.»
[17] A Ananɩasɩ tɩ cen na tɩ kpɛ a yir pʋɔ, dɔwlɩ a nuru a ʋ zu ɛ yel: «Ɩ̃ yɛb Sol i, a Sore n'ʋ tõ m. A Yeezu ʋl na wul ʋ tʋɔra fʋ nyɛ̃ ʋ a sɔr ʋl fʋ na tɩ lo waar a zu a, ʋlɛ n'ʋ tõ m k'ɩ̃ɩ wa ɩ fʋ lɛb nyɛrɛ ɛ a Vʋʋrʋ Sõw paalɩ fʋ.»
[18] Daadaa lɛ bome kãw, na ɩ mɛ̃ zʋm-pɛgɛ a, tɩ yi n a ʋ mimie pʋɔ lawrɩ lo, ɛ ʋ lɛb nyɛrɛ ɛ de a suob.
[19] Al pùorí, ʋ tɩ dɩ na lɛb páw fãw. A Sol tɩ maal ɩ bibie blã a Damasɩ, ʋlɛ nɩ a Yeezu po-tuurbɛ na tɩ be a be a.
[20] Ʋ tɩ tĩ nɩ daadaa lɛ hiere a Zifʋ mɩnɛ puoru-dìrú kɛ a Yeezu n'ɩ a Naaŋmɩn Bie.
[21] A bɛlɩ dem za na tɩ bɛrɛ wone a ʋ kanʋ a, mɩ́ tɩ nyɔw nɩ nʋɔr yere nɩ: «A nɩr ŋa bɛ tʋ̃ɔ n'ʋ bɛ tɩ bɛrɛ a bɛlɩ dem na bʋɔlɛ a Yúor ŋa a Zeruzalɛm a ɩ? Ɛ a bɛ nyɔwfʋ ƴãw bɛ n'a ʋ sʋ̃ɔmɩ bul wa a ka, k'ʋʋ wa nyɔw bɛ 'lẽ cen nɩ tɩ kʋ̀ a bawr-maal-nɩ-bɛrɛ ɩ?»
[22] Ɛ cɛ a Sol tɩ nyɛrɛ nɩ fãw dɔwlɛ, ɛ́ mɩ́ tɩ ƴɛr tʋ̃ɔ a Damasɩ tẽw Zifʋ mɩnɛ, ʋ na mɩ́ tɩ manɛ wule k'aa Yeezu sɩrɩ n'ɩ a Kɩrɩta a.
[23] A wa tɩ kɔwrɩ na, ɛ a Zifʋ mɩnɛ bɛ ŋa wa ír bʋ taa kɛ́ bɛ kʋ́ a Sol.
[24] A Sol tɩ wõ n a bɛ bʋ-taa ŋa yele. A Zifʋ mɩnɛ mɩ́ tɩ gu n a tẽw dɩ̃dɛɛ mʋ̃tɔ̃w nɩ tɩ̃ɩsɔw za, kɛ́ bɛ tʋ̃ɔ piw nyɔw ʋ kʋ́.
[25] Ɛ cɛ tɩ̃ɩsɔw kãw, a Sol po-tuurbɛ tɩ ɓaw ʋ na ƴãw zãgba pʋɔ ɛ 'lẽ nɩ mie tur bɛr dapùorí ʋ siw.
[26] A Sol na tɩ ta a Zeruzalɛm a, ʋ tɩ bɔbr a k'ʋʋ pʋɔ a Yeezu po-tuurbɛ pʋɔ; ɛ cɛ bɛ za tɩ zɔrɛ nɩ a ʋ dɛ̃bɩ̃ɛ, ɛ bɛ tɩ saw tɩɛrɛ kɛ sɩza n'a ʋ lɩɛbɩ a Yeezu po-tuure ɩ.
[27] Lɛ n'a a Banabasɩ pãa tɩ tɛr ʋ cen nɩ tɩ wul a nɩ-toni, ɛ manɩ kʋ̀ bɛ a lɛ a Sol na tɩ nyɛ̃ a Sore a sɔr pʋɔ ʋ ƴɛr a ʋ zie a, nɩ a lɛ a Sol na tɩ nyɔw socir ɛ kanɩ nɩ a nɩbɛ a Yeezu yúor ƴãw a Damasɩ a.
[28] Lɛ n'a a Sol pãa tɩ pʋɔ a bɛ pʋɔ, kpɩɛr ɛ yire a Zeruzalɛm, ɛ nyɔw socir kanɛ nɩ a nɩbɛ a Sore yúor ƴãw.
[29] A Zifʋ bɛl na ƴɛrɛ a Gɩrɛkɩ a zie n'a ʋ mɩ́ tɩ ƴɛrɛ, ɛ ʋlɛ nɩ a bɛl ŋmɩɛr a nɔkpɛn. Ɛ cɛ a nɩbɛ bɛ ŋa tɩ bɔbr ɩ ʋ kʋ́b.
[30] A yɛbr na tɩ bãwnɩ a, bɛ tɛr ʋ na cen nɩ Sezaare, tɩ ƴãw k'ʋ cen Tarsɩ.
[31] A Lãw-yir tɩ tɛr ɩ ƴã-ɓaarʋ a Zude tẽw za pʋɔ, nɩ a Galile tẽw nɩ a Samaari tẽw; ʋ tɩ mɩɛr a yɛlɛ ɛ tɛr a Sore zɔba, a Vʋʋrʋ Sõw mɔwlʋ tɩ be n a ʋ zie yaga ʋ kɛrɛ nɩ.
[32] A Pɩɛr na tɩ cɔlɛ a ziir za a, ʋ mɩ̀ tɩ tɔl a siw a Lɩda a Kɩrɩta-nɩbɛ zie.
[33] Ʋ tɩ nyɛ̃ nɩ nɩr kãw na dɩ kɛ Ene a, ʋ gã sɛ̃w pʋɔ. Yome anĩ n'ɩ a ŋa ʋ na tɩ gbɛr gã a.
[34] A Pɩɛr tɩ yel ʋ na: «Ene e, a Yeezu Kɩrɩta sanɩ fʋ na; ìr pili a fʋ sɛ̃w fʋ tʋɔra.» Ʋ tɩ ìr ɩ daadaa lɛ.
[35] A Lɩda tẽw dem za, nɩ a Saarɔ̃ tẽw nɩbɛ za na tɩ nyɛ̃ ʋ a, bɛ tɩ lɩɛb ɩ a bɛ ɩb saw de a Sore.
[36] Pɔw kãw tɩ be n a Zope tẽw ɩ a Sore po-tuure. Ʋ tɩ dɩ na kɛ Tabɩta, ɛ́ bɛ bʋɔlɛ Dɔrkasɩ a gɩrɛkɩ kɔkɔr pʋɔ, a pɛr lɛ kɛ Wala. A ɩ-vɩɛlɩ maalʋ nɩ a nɩ-kɔmɛ sõwfʋ tɩ n'ɩ a ʋ tome.
[37] Ʋ wa tɩ lo n bàalʋ a alɩ bibie nɛ pʋɔ kpi. Bɛ tɩ sò ʋ nɩ a kʋ̃ɔ, ɓaw do n tɩ bin a bɔwpɩɛ pʋɔ.
[38] A Lɩda nɩ a Zope pɩɛl ɩ taa. A Kɩrɩta-nɩbɛ na tɩ wõ kɛ a Pɩɛr be n a Lɩda a, bɛ tõ n nɩbɛ ayi kɛ́ bɛ tɩ bʋɔl ʋ nɩ a ƴɛr-bie a ŋa: «Wa fɔ̃w za a tɩ zie.»
[39] A Pɩɛr tɩ ìr ɩ daadaa lɛ páw bɛ cen. Ʋ na tɩ ta a, bɛ tɛr ʋ na do n a bɔwpɩɛ pʋɔ. A pɔw-kɔbɛ za tɩ ɓã n taa a be, kone wule nɩ a Pɩɛr a kpali nɩ a kpar-bɛrɛ al a Dɔrkasɩ na tɩ wóbr a ʋ cãafʋ daar a.
[40] A Pɩɛr tɩ ƴãw nɩ a nɩbɛ za bɛ yi, ɛ ʋ lo gbĩ dume pùori. Ʋ na wa pùori baar a, ʋ tɩ lɩɛb ɩ niwn cɔw a kũu ɛ yel: «Tabɩta a, ìr!» Ʋ yuo a mimie, ɛ ʋ na tɩ nyɛ̃ a Pɩɛr a, ʋ ìr a zɩ̃.
[41] A Pɩɛr tɩ nyɔw ʋ nɩ nũú ʋ ìr, ʋʋ bʋɔlɩ a Kɩrɩta-nɩbɛ nɩ a pɔw-kɔbɛ wa wul bɛ a Tabɩta na lɛb vʋʋrɛ a.
[42] A Zope tẽw nɩbɛ za tɩ wõ n a yel ŋa, ɛ́ bɛ yaga zie tɩ saw na de a Sore.
[43] A Pɩɛr tɩ kpɛ n a Zope kɔwrɩ. Ʋ tɩ kpɩɛr ɩ gãn-nɔnɛ́ kãw bɛ na bʋɔlɛ Sɩmʋ̃ a yir.