[1] A Sol mɩ̀ tɩ saw na kɛ́ bɛ kʋ́ a Ɩtɩɛn. A ʋlɩ bibir nɛ tɔr za, dɔwrʋ kpɛ̃ɛ tɩ lo n a Zeruzalɛm Lãw-yir zu. Bɛ za tɩ zɔ na yaarɩ cen a Zude nɩ a Samaari ten pʋɔ, ɛ tɩ cɛ a nɩ-toni tɛwr.
[2] Nɩbɛ na nɔ̃w a puoru a, tɩ ɓaw nɩ a Ɩtɩɛn cen nɩ tɩ ũù, ɛ kõ ʋ yaga za.
[3] A Sol ʋl a, ʋ tɩ ƴãw nɩ fãw dɔwrɛ a Lãw-yir. Ʋ mɩ́ tɩ kpɛ n a yie pʋɔ nyɔw nɩbɛ, dɛbr nɩ pɔwbɛ za, tɩ lɔb ƴãw a gaso pʋɔ.
[4] A bɛl na tɩ zɔ yaarɩ a, tɩ cɔlɛ na hiere a Yel-nʋ̃ɔ̀.
[5] Lɛ n'a a Filib tɩ siw a Samaari tẽ-kpɛ̃ɛ kãw pʋɔ tɩ manɛ a Kɩrɩta yele kʋ̀rɛ a nɩbɛ.
[6] A zu-sɛbla tɩ gel a tu a ʋ kanʋ pùor: bɛ za tɩ wone na bɛ na manɛ a nɔ-ɓãa-yele ʋ na maalɛ a, bɩɩ bɛ tɛɛ za mɩ̀ mɩ́ tɩ nyɛ̃ a na.
[7] A kɔ̃tɔ̃-faar tɩ ŋmɩɛr ɩ cɛlsɩ yire nɩ a kɔ̃tɔ̃-ìrbɛ yaga zie. Nɩ-yaga na tɩ lore wɔblʋ bɩɩ gbɛr a tɩ sanɩ na.
[8] Nʋ̃ɔ̀-kpɛ̃ɛ tɩ paalɩ a tẽw nɛ.
[9] Dɛb kãw bɛ na bʋɔlɛ kɛ Sɩmʋ̃ a, tɩ dãw na be a tẽw nɛ pʋɔ. Ʋ tɩ tone nɩ tɩtɩblɛ tome, a mɩ́ ɩ nɔ-ɓãan a Samaari tẽw dem za zie. Ʋ tɩ yel a kɛ ʋlɛ mɩ̀ n'ʋ,
[10] ɛ a nɩbɛ za tɩ tu a ʋ pùor, a bibiir tɩ lãw nɩ a nɩ-bɛrɛ. Bɛ tɩ yere na: «A dɛb ŋa n'ɩ a Naaŋmɩn fãw, a fãw ʋl bɛ na bʋɔlɛ a fãw kpɛ̃ɛ a.»
[11] Bɛ tɩ tu n a ʋ pùor, ʋ na tɩ ɩ a ʋ tɩtɩblɛ ɩ-ɩrɩ a nyɔw bɛ a koro za a ƴãw.
[12] Ɛ cɛ a Filib na wa hieri a Naaŋmɩn-Naalʋ Yel-nʋ̃ɔ̀ nɩ a Yeezu Kɩrɩta Yel-nʋ̃ɔ̀ a, bɛ tɩ saw na de a Filib ƴɛrʋ ɛ de a suob, dɛbr nɩ pɔwbɛ.
[13] A Sɩmʋ̃ tɔr za mɩ̀ tɩ saw na de ɛ de a suob, ɛ́ mɩ́ tɩ sɛ̀b mɛr a Filib kʋra lɛ. Ɛ a nɔ-ɓãa-yel-bɛrɛ nɩ a yel-bãw-guuri ʋ na tɩ nyɛrɛ a, tɩ ɩ ʋ nɩ nɔ-ɓãan.
[14] A nɩ-toni, na tɩ be a Zeruzalɛm a, tɩ wõ na kɛ a Samaari tẽw dem saw na de a Naaŋmɩn ƴɛrʋ. Lɛ n'a bɛ tɩ tõ Pɩɛr nɩ Zã a bɛ zie.
[15] Bɛ na tɩ ta a, bɛ pùor ɩ Naaŋmɩn kʋ̀ a Samaari tẽw dem, kɛ́ bɛ tʋ̃ɔ páw a Vʋʋrʋ Sõw,
[16] ʋ na bɛ tɩ siw a bɛ been kãw za zu sɛr a ƴãw: a suob tɛwr ʋ bɛ tɩ de a Sore Yeezu yúor ƴãw.
[17] A Pɩɛr nɩ a Zã tɩ íre nɩ nuru dɔwlɛ a bɛ zu, ɛ́ bɛ tɩ páwr a Vʋʋrʋ Sõw.
[18] A Sɩmʋ̃ tɩ nyɛ̃ na kɛ a nɩ-toni mɩ́ wa dɔwlɩ nuru a nɩr zu a, a ʋ sob mɩ́ páw nɩ a Vʋʋrʋ Sõw. Lɛ so ʋ tɩ ír libie zɛlɛ nɩ a Pɩɛr nɩ a Zã
[19] yere nɩ: «Nyɩ de, ɛ mɩ̀ kʋ̀ m a fãw ŋa, kɛ́ a bɛlɩ dem zu ɩ̃ nãá mɩ́ wa ír a nuru dɔwlɩ a, bɛ mɩ̀ mɩ́ páw a Vʋʋrʋ Sõw.»
[20] Ɛ cɛ a Pɩɛr tɩ yel ʋ na: «Fʋ̃ʋ nɩ a fʋ libie za a, nyɩ wɛ! Fʋ na tɩɛrɛ kɛ́ fʋ na tʋ̃ɔ na da n libie a Naaŋmɩn maalʋ ʋ na tɩrɛ zawla lɛ a!
[21] A fʋ tɩɛrʋ na bɛ tori a Naaŋmɩn zie a, fʋ bɛ tɛr sɔr na páw bom za a yele a ŋa na ɩrɛ a ka a pʋɔ ɩ.
[22] A na ɩ lɛ a, zawrɩ a fʋ yel-faa ŋa bɛr ɛ pùori a Sore: a mɩnɛ kãw ʋ na dɩ n a tɩɛr-faa ŋa, na wa a fʋ zie a, sãwna suur kʋ̀ b.
[23] Yel-mɩŋa sɩza, ɩ̃ nyɛ̃ a na fʋ kpɛ n nyuur yaga za, ɛ a yel-bier 'lẽ fʋ mɛ̃ miwr a.»
[24] A Sɩmʋ̃ tɩ sɔw na: «A nyɩɩm tɛɛ za, nyɩ pùori a Sore kʋ̀ m, kɛ a a ŋa kãw za nyɩ na yel a taa páwr mɛ̃ ɩ.»
[25] A Pɩɛr nɩ a Zã na tɩ dɩ a dãsɩɛ ɛ hieri a Yel-nʋ̃ɔ̀ a be a, bɛ lɛb a cen a Zeruzalɛm. Bɛ tɩ hiere nɩ a Yel-nʋ̃ɔ̀ a Samaari lowr tẽli yaga pʋɔ cere nɩ.
[26] A Sore malkɩ tɩ ƴɛr ɩ a Filib zie yel ʋ: «Ìr tu a saa-pɛrɩ́-dʋrʋ lowr, de a sɔr ʋl na yi a Zeruzalɛm ɛ siwr a Gaza a, nɩr bɛ be a ʋ zu ɛ.»
[27] A Filib tɩ ìr cen daadaa lɛ. Zɩ̃ kɛ dɛ-vár kãw, Etiopi tẽw pɔw-nãà Kãdasɩ tõ-tõ-nɩ-kpɛ̃ɛ, na tɩ kaarɛ a ʋ na-bome zie a, tɩ cen nɩ a Zeruzalɛm tɩ pùori
[28] ɛ lɛb kule. Ʋ tɩ zɩ̃ n a ʋ torko pʋɔ kanɛ a Naaŋmɩn-ƴɛr-manɛ Ɩzayi sɛbɛ.
[29] A Vʋʋrʋ Sõw tɩ yel ɩ a Filib: «Cen ta a torko ŋa zie.»
[30] A Filib tɩ zɔ na pɩɛlɩ wõ a dɛ-vár ʋ kanɛ a Naaŋmɩn-ƴɛr-manɛ Ɩzayi sɛbɛ, ʋ sowr ʋ: «Fʋ nɩ̃ɛ na bãw a kanʋ ŋa fʋ na kanɛ a pɛr ɩ?»
[31] Ʋ tɩ sɔw na: «Nɩr bɛ wa ír a pɛr kʋ̀ m a, ŋmɩŋmɩn za n'a ɩ̃ na ɩ tɩ bãw?» Ʋ tɩ yel ɩ a ŋa, ɛ ƴãw a Filib do kpɛ zɩ̃ pɩɛl ʋ.
[32] A Sɛb-sõw ƴɛr-bie a ŋa n'a ʋ tɩ kanɛ: ‹Mɛ̃ pɛ́rʋ bɛ na nyɔw cere nɩ a kʋ́b zie a, mɛ̃ péle bɛ na ŋmarɛ a kɔblʋ ɛ ʋ ar gbili a, ʋ bɛ haa nʋɔr ɛ.
[33] Bɛ siwr ʋ na, ɛ́ bɛ dɩ a ƴɛrʋ nɩ mɩnʋ kʋ̀ ʋ ɛ. Ãa n'ʋ ƴɛr a ʋ bʋʋrɛ ƴɛrʋ? Bʋ̃ʋ n'ʋ vɛ̃, bɛ ír ɩ a ʋ nyɔ-vʋʋrʋ a tẽw zu.›
[34] A dɛ-vár sowr ɩ a Filib: «Ɩ̃ zɛlɛ fʋ na, yel ɩ̃ nyɛ̃, ãa ƴɛrʋ n'a a Naaŋmɩn-ƴɛr-manɛ ƴɛrɛ? Ʋl mɩŋa ƴɛrʋ n'a ʋ ƴɛrɛ bɩɩ nɩ-yũo ƴɛrʋ n'a?»
[35] Lɛ n'a a Filib tɩ de a ƴɛrʋ, tĩ a Sɛb-sõw ƴɛr-bie a ŋa zie ɛ hieri a Yeezu Yel-nʋ̃ɔ̀ kʋ̀ ʋ.
[36] Bɛ na tɩ cãa lo a sɔr cere a, bɛ tɩ ta n kʋ̃ɔ zie. A dɛ-vár tɩ yel ɩ a Filib: «Nyɛ̃ kʋ̃ɔ, bʋ̃ʋ n'ʋ be be ɩ̃ kʋ̃ tʋ̃ɔ de a suob?» [
[37] A Filib tɩ yel ʋ na: «Fʋ̃ʋ wa saw de nɩ a fʋ pʋɔ za a, fʋ na tʋ̃ɔ na de a suob.» A dɛ-vár yel ʋ: «Ɩ̃ saw na de k'aa Yeezu Kɩrɩta ɩ n a Naaŋmɩn Bie.»]
[38] Ʋ tɩ ƴãw na bɛ ɩ a torko ʋ ar, ɛ ʋlɛ nɩ a Filib siw bɛ za ayi a kʋ̃ɔ̀mɩ́, a Filib kʋ̀ ʋ a suob.
[39] Bɛ na wa lɛb yi a kʋ̃ɔ pʋɔ a, a Sore Vʋʋrʋ ír ɩ a Filib. A dɛ-vár bɛ lɛ tɩ cãa nyɛ̃ ʋ ɛ, ɛ cãa lo a ʋ sɔr kule nɩ nʋ̃ɔ̀.
[40] A Filib ʋl wa tɩ nyɛ̃ na ʋ be Azɔtɩ. Al pùorí, ʋ tɩ hiere nɩ a Yel-nʋ̃ɔ̀ a ten al za pʋɔ ʋ na tɩ tuur tɔlɛ a, tɩ sãá nɩ Sezaare.