[1] A Pãtɩkɔtɩ cuw bibir na wa vɩɛ a, a yɛbr tɩ ɓã n taa bɛ za zi-been.
[2] Bɛ wa bere na damnʋ yi a salom zu, ɩ mɛ̃ sɛsɛb kpɛ̃ɛ na fure a; ʋ tɩ fu na paalɩ a yir ʋl za pʋɔ bɛ na tɩ be a.
[3] Lɛ n'a bɛ tɩ nyɛ̃ bom na ŋmɛ̃ mɛ̃ vũu a, ʋ siw põ yaarɩ mɛ̃ zɛlɛ a, dɔwlɩ a bɛ za been been zu.
[4] A lɛ n'a a Vʋʋrʋ Sõw tɩ paalɩ bɛ za bɛ tĩ ƴɛrɛ bʋʋr-yoru ƴɛrʋ. Ŋa za mɩ́ tɩ ƴɛrɛ na mɛ̃ a lɛ a Vʋʋrʋ Sõw na kʋ̀ ʋ k'ʋʋ ƴɛrɛ a.
[5] A tɩ car ɩ na kɛ́ Zifʋ bɛ mɩnɛ kãw na nɔ̃w a puoru a, mɩ̀ tɩ be n a Zeruzalɛm be; a nɩ-bʋʋrɛ bɛl za na tɩ be a tẽ-daa zu a, a bɛl pʋɔ n'a bɛ tɩ yi kɛ wa.
[6] A nɩbɛ na tɩ wõ a damnʋ a, bɛ tɩ zɔ na wa ɓã taa bɛ tɛr vuo ɩ. A tɩ ur bɛ na bɛ dɩ vuo ɩ, a ŋa za na mɩ́ tɩ wone bɛ ƴɛrɛ a ʋ sãà bʋʋrɛ ƴɛrʋ a ƴãw.
[7] A bɛ tɩɛrʋ za tɩ nyaw nɩ taa ɛ nɔ-ɓãan nyɔw bɛ bɛ yere: «A nɩbɛ bɛ ŋa na ƴɛrɛ a, Galile tẽw dem bɛ tʋ̃ɔ n'ɩ bɛ za ɩ?
[8] Ɛ ŋmɩŋmɩn n'a tɩ za been been wa wone a bɛ ƴɛrʋ, ŋa za a ʋ sãà bʋʋrɛ kɔkɔr pʋɔ?
[9] Pártɩ̀ mɩnɛ n'ɩ bɛ ŋa, Mɛ́dɩ̀ nɩ Elamɩtɩ mɩnɛ, a Mezopotami tẽw dem, Zude nɩ Kapadɔsɩ nɩbɛ, Pɔ̃w nɩbɛ, Azi nɩbɛ,
[10] Firizi nɩ Pãfili ten dem mɩ̀, Eziptɩ tẽw nɩbɛ nɩ Libi na pɩɛlɩ a Sɩɩrɛn tẽw a nɩbɛ, Ʋrɔm tẽw dem na kpɩɛr a ka a,
[11] a bɛl na dɔw ɩ a Zifʋ mɩnɛ bʋʋrɛ a, nɩ a bɛl na kpɛ a Zifʋ mɩnɛ puoru a, Kɩrɛtɩ tẽw dem nɩ Arabʋ mɩnɛ za, tɩ za wone na bɛ hiere a Naaŋmɩn nɔ-ɓãa-yele a tɩ bʋʋrɛ ƴɛrʋ pʋɔ.»
[12] A bɛ tɩɛrʋ za tɩ nyaw nɩ taa, ɛ́ bɛ na bɛ tɩ bãw lɛ bɛ na na tɩɛrɛ a, bɛ sowre nɩ taa: «A yel ŋa pɛr ɩ bo?»
[13] Ɛ cɛ bɛ mɩnɛ tɩ ɩrɛ bɛ na laar hele yere nɩ: «Bɛ kuol ɩ dãa bɛ za!»
[14] Lɛ n'a a Pɩɛr tɩ ìr ar, ʋlɛ nɩ a nɩ-toni pie nɩ been bɛl na tɩ cɛ a, ɛ́ zɛw kɔkɔr ƴɛr a ŋa: «Zude tẽw dem i, nɩ nyɩɩm za na kpɩɛr a Zeruzalɛm ka a, nyɩ bãw a yel ŋa na ɩrɛ a vla, nyɩ ƴãw tobr a ɩ̃ ƴɛrʋ ƴãw.
[15] Nyɩ na tɩɛr kɛ a nɩbɛ bɛ ŋa kuol a a, lɛ bɛ n'a ɩ. Bɛ bɛ nyũ ɛ, biɓaara gbele pi-waɩ sob tɛwr n'ɩ a ŋa na ŋmɛ a.
[16] Ɛ cɛ, a lɛ a Naaŋmɩn-ƴɛr-manɛ Zowɛl na tɩ dãw yel a, alɛ n'ɩ a a ŋa na tuur a:
[17] ‹A ŋa n'a a Naaŋmɩn ƴɛrɛ: a bibi-pɛ-baarɩ wa vɩɛ a, ɩ̃ na ƴãw nɩ a ɩ̃ Vʋʋrʋ nɩsaal za; a nyɩ bi-dɛbr nɩ a nyɩ pɔwyaar na lɩɛb ɩ Naaŋmɩn-ƴɛr-manbɛ, a nyɩ pɔl-bili na nyɛrɛ nɩ bʋ̃-nyɛrɩ, zánʋ na waar ɩ a nyɩ dɛ-nyamɛ,
[18] mɔ̃ mɩ̀, a alɩ bibie nɛ pʋɔ, ɩ̃ na ƴãw nɩ a ɩ̃ Vʋʋrʋ a ɩ̃ tõ-tõ-biir, a dɛbr nɩ a pɔwbɛ, ɛ́ bɛ na lɩɛb ɩ Naaŋmɩn-ƴɛr-manbɛ.
[19] Ɩ̃ na maal ɩ yel-bãw-guuri a salom zu, nɩ nɔ-ɓãa-yele a tẽw zu: zɩ̃ɩ, vũu nɩ zʋ̀ʋ́r na ŋmɛlɛ duor a.
[20] A mʋ̃tɔ̃w na lɩɛb ɩ lige ɛ a cuw mʋ̃ɔ mɛ̃ zɩ̃ɩ a, ɛ a Sore bibir wa bãw vɩɛ, bibi-kpɛ̃ɛ, yúor-vɩɛlʋ-danʋ bibir.
[21] Lɛ n'a, sob nɛ za nãa wa bʋɔlɛ a Sore a, na nyɛ̃ a faafʋ.› »
[22] «Ɩsɩrayɛl biir i, nyɩ ƴãw tobr a ɩ̃ ƴɛrʋ ƴãw: a Nazarɛtɩ tẽw Yeezu, a dɛb ŋa a Naaŋmɩn na de a yele, ɛ ƴãw k'ʋ maalɩ nɔ-ɓãa-yele a nyɩ sɔgɔ, lãw nɩ yel-bãw-guuri nɩ yele na ɩ bãwfʋ sãá a, mɛ̃ a lɛ nyɩɩm mɩŋa na bãw a,
[23] a dɛb ŋa nyɩ na mɩl nyɔw, a tu a lɛ a Naaŋmɩn pʋ-tɩɛrʋ na tɩ dãw bãwnɩ a yele cɔbrɩ a, nyɩ kʋ́ ʋ na, ƴãw nɩ-faar kpa ʋ da-gara zu.
[24] Ɛ cɛ Naaŋmɩn ɩ na ʋ lɛb yi a kũu pʋɔ, ɩ a ʋ kũu kpɩɛrʋ za baarɩ: a bɛ tɩ tɛr sɔr kɛ a kũu tɛr fãw ʋ zu ɛ.
[25] Daviir tɩ yel ɩ a ʋ ƴãw kɛ: ‹Ɩ̃ tɩ nyɛ̃ nɩ a Sore ʋ be a ɩ̃ niŋé kʋra lɛ, ʋ be n a ɩ̃ lõbówrí k'ɩ̃ɩ taa lore ɩ.
[26] Alɛ n'a so, a ɩ̃ socir cɩlɛ, ɛ a ɩ̃ nʋɔr yiele nʋ̃ɔ̀ yielu. A ɩ̃ ƴãgan tɔr za na bɛr ɩ tɩɛrʋ, ɛ ɓãa ƴãw pɩɛnɛ:
[27] fʋ kʋ̃ tʋ̃ɔ jɛ mɛ̃ bɛr a kpɩmɛ tẽw ɛ, fʋ mɩ̀ kʋ̃ tʋ̃ɔ bɛr a fʋ Nɩ-sõw k'ʋ pʋ̃ɔ ɩ.
[28] Fʋ wul mɛ̃ nɩ a nyɔ-vʋʋrʋ sɛɛ, fʋ na ɩ na k'ɩ̃ be a fʋ zie cɩlɛ yaga.› »
[29] «Yɛbr ɩ, ɩ̃ na tʋ̃ɔ na ɓãa ƴãw yel kʋ̀ nyɩ: a tɩ sãakʋ̃-kʋra Daviir kpi na, bɛ ũù ʋ na, nɩ dɩ̃a, a ʋ yaa cãa na be a tɩ zie.
[30] Ɛ cɛ, ʋ tɩ ɩ n Naaŋmɩn-ƴɛr-manɛ, ɛ́ tɩ bãwnɩ a kɛ Naaŋmɩn tɩ pɔ na yel k'ʋʋ na zɩɩlɩ nɩ a ʋ bʋ̃-dɔwra kãw a ʋ naalʋ da-kɔw zu.
[31] A na ɩ a ŋa a, ʋ de nɩ niwn nyɛ̃ a Kɩrɩtakũu-pʋɔ-lɛ-yib. Ɛ a ʋl ƴãw n'a ʋ tɩ yel: ‹Bɛ bɛ jɛ ʋ bɛr a kpɩmɛ tẽw ɛ, ɛ a ʋ ƴãgan bɛ pʋ̃ɔ ɩ.› »
[32] «A Yeezu ŋa a, Naaŋmɩn ɩ na ʋ lɛb yi a kũu pʋɔ, tɩɩm za dɩ n a dãsɩɛ.
[33] A Naaŋmɩn dʋrʋ zɛw ʋ na ʋ do. Lɛ so ʋ páw a Vʋʋrʋ Sõw a Naaŋmɩn na ƴãw nʋɔr k'ʋʋ na tɩr a a; ʋlɛ n'ʋ ɩ a Vʋʋrʋ Sõw siw põ yaarɩ a tɩ zu, ɛ alɛ n'a nyɩ nyɛrɛ ɛ wone.
[34] A Daviir tɔr za bɛ do a salom zu ɛ, ɛ cɛ ʋ yel a: ‹A Sore yel ɩ a ɩ̃ Sore: zɩ̃ a ɩ̃ dʋrʋ lowr,
[35] ɛ gu ɩ̃ wa tɩ nɛb a fʋ dɔ̃ dem bin a fʋ pile fʋ dɔwlɩ a fʋ gbɛɛ.›
[36] A Ɩsɩrayɛl bʋʋrɛ za, bɛ bãwnɩ a vla: a Yeezu ŋa tɔr za nyɩ na kpa a da-gara zu a, Naaŋmɩn ɩ na ʋ ɩ Sore nɩ Kɩrɩta.»
[37] Bɛ na tɩ wõ a lɛ a, a tɩ dam bɛ nɩ yaga, bɛ yel a Pɩɛr nɩ a nɩ-toni ŋmãa bɛl na cɛ a: «Yɛbr ɩ, bʋ̃ʋ n'ʋ tɩ na ɩ?»
[38] A Pɩɛr tɩ yel bɛ na: «Nyɩ lɩɛbɩ a nyɩ ɩb, ɛ́ ŋa za mɩ́ de a suob a Yeezu Kɩrɩta yúor ƴãw, a nyɩ yel-bebe suur pawfʋ ƴãw, ɛ nyɩ na páw nɩ a Naaŋmɩn maalʋ na ɩ a Vʋʋrʋ Sõw a.
[39] A nyɩɩm nɩ a nyɩ bibiir ƴãw n'a a Naaŋmɩn tɩ dãw ƴãw a nʋɔr ŋa, nɩ a bɛlɩ dem na zãá a ƴãw, a bɛlɩ dem za a Sore tɩ Naaŋmɩn na na bʋɔlɩ a.»
[40] A Pɩɛr tɩ cãa na ƴɛr ƴɛr-bie a mɩnɛ dɩ n a Yeezu dãsɩɛ, ɛ́ tɩ kpaalɛ bɛ yere nɩ: «Nyɩ faa nyɩ tʋɔra yi zaa a dɩ̃a nɩbɛ bɛ ŋa pʋɔ na ɩ nɩ-faar a.»
[41] A bɛlɩ dem na tɩ saw a Pɩɛr ƴɛrʋ a tɩ de nɩ a suob. A ʋlɩ bibir nɛ a, a nɩbɛ na tɩ saw de pʋɔ a bɛ pʋɔ a, tɩ faar a na ta tur ata.
[42] Bɛ za tɩ ƴãw nɩ fãw tuur a nɩ-toni wulu kʋra lɛ, ɛ lãw pone a dipɛ̃, ɛ lãw puore mɩ̀.
[43] Dɛ̃bɩ̃ɛ tɩ tɛr ɩ a nɩbɛ za: a nɩ-toni tɩ sɩrɩ na maalɛ yel-bãw-guuri nɩ nɔ-ɓãa-yele yaga.
[44] A bɛlɩ dem za na tɩ saw de a Yeezu yele a, tɩ lãw nɩ taa, ɛ́ mɩ́ tɩ de a bɛ bome za ɓã taa lãw.
[45] Bɛ mɩ́ tɩ de nɩ a bɛ bʋ̃-sori nɩ a bɛ bʋ̃-tɛrɩ za kʋɔrɩ, lãw põ a libie: bɛ mɩ́ tɩ kʋ̀ n ŋa za man a ʋ yel-fɛrɩ.
[46] Bibi-vɩɛrɩ za, bɛ mɩ́ tɩ lãw nɩ soci-been cere nɩ a Ŋmɩn-yi-kpɛ̃ɛ pʋɔ bɛ tɛr nawfʋ ɛ, bɛ mɩ́ tɩ lãw na ŋmarɛ a dipɛ̃ pone a yie pʋɔ, ɛ lãw dɩrɛ a bɛ bʋ̃-dɩrɩ nɩ nʋ̃ɔ̀ nɩ pʋ-pɩɛlʋ.
[47] Bɛ tɩ danɛ nɩ a Naaŋmɩn, ɛ a nɩbɛ za nɔnɛ bɛ ɛ ƴãwnɛ bɛ. Bibie za, a Sore tɩ ɩrɛ na a bɛlɩ dem na nyɛ̃ a faafʋ a, bɛ kpɩɛr pʋɔrɛ a lãw pʋɔ.