[1] Yesu ye mɔgɔ kalan daminɛ ko kura Galile ba da la. Jamaba y'u lajɛ a fɛ, fo a donna kurun dɔ kɔnɔ k'i sigi. Kurun tun bɛ ji kan, jama bɛɛ tun bɛ gele kan ba da la.
[2] A tun bɛ u kalan fɛn caman na ni ntalenw ye. A y'a fɔ u ye a ka kalan na ko:
[3] «A' ye lamɛnni kɛ. Cɛ dɔ bɔra ka taa serili kɛ.
[4] Ka a to serili la, a ka kisɛ dɔw binna sira da la, kɔnɔw nana olu sogin.
[5] Kisɛ dɔw binna farama yɔrɔ la, bɔgɔ mugu bɛrɛ tun tɛ yen. Olu falenna joona, katuguni bɔgɔ tun man ca yen.
[6] Tile gannen, u fɔsɔnfɔsɔnna ka ja, k'a masɔrɔ dili bɛrɛ tun tɛ u la.
[7] Kisɛ dɔw binna ŋɔniw cɛma. Ŋɔniw wulila ka u degun, u ma den.
[8] Kisɛ dɔw binna dugukolo ɲuman la, olu falenna ka bonya ka kisɛ caman kɛ. Dɔ ye a ɲɔgɔn bisaba kɛ, dɔ biwɔɔrɔ, dɔ kɛmɛ.»
[9] Yesu y'a fɔ u ye ko: «Tulo bɛ min fɛ ka lamɛnni kɛ, o ka lamɛnni kɛ dɛ.»
[10] Yesu mabɔlen jama la, a kɛrɛfɛ mɔgɔw ni kalanden tan ni fila y'a ɲininka o ntalen kɔrɔ la.
[11] A y'u jaabi ko: «Ala ka masaya gundow dɔnniya dira aw de ma, nka minnu bɛ kɛnɛma, fɛn bɛɛ bɛ fɔ olu ye ntalenw de la,
[12] walisa ‘U filɛli kɛtɔ k'a filɛ, nka u kana a ye. U mɛnni kɛtɔ k'a mɛn, nka u kana a faamu. N'o tɛ, u na u cogo yɛlɛma ka u ɲɛ sin Ala ma, Ala na yafa u ma.’»
[13] O kɔ, Yesu ye u ɲininka ko: «Aw ma nin ntalen faamu wa? Aw dun na ntalen tɔw bɛɛ faamu cogo di?
[14] Serilikɛla bɛ Ala ka kuma de seri.
[15] Dɔw ye sira da yɔrɔ ye, kuma serila yɔrɔ min na. O mɔgɔw ye o kuma mɛn minkɛ, o yɔrɔnin bɛɛ, Sitanɛ bɛ na ka o kuma serilen bɔ u kɔnɔ.
[16] O cogo la farama yɔrɔ taw ye minnu ye, olu bɛ o kuma mɛn k'a minɛ joona ni ɲagali ye.
[17] Nka dili tɛ u la, u tɛ mɛn a la. Ni u degunna, wala ni mɔgɔw bɛ tugu u nɔfɛ ka u tɔɔrɔ o kuma kosɔn, u bɛ sin ka kunnatiɲɛ.
[18] Ŋɔniw cɛma taw ye minnu ye, olu bɛ o kuma mɛn,
[19] nka nin diɲɛ hami kow ni nafolo lafilibanciya ani fɛn wɛrɛw nege bɛ o kuma degun, fo a tɛ den.
[20] Dugukolo ɲuman taw ye minnu ye, olu bɛ o kuma mɛn k'a minɛ ka den. Dɔ bɛ a ɲɔgɔn bisaba kɛ, dɔ biwɔɔrɔ, dɔ kɛmɛ.»
[21] O kɔ, Yesu y'a fɔ u ye ko: «Mɔgɔ bɛ lanpa mana ka minɛn dɔ biri a da la wala k'a bila dalan dɔ jukɔrɔ wa? A t'a sigi fɛn dɔ kan wa?
[22] Foyi dogolen tɛ min tɛna bɔ kɛnɛ kan. Gundo si tɛ ni a tɛna dɔn.
[23] Tulo bɛ min fɛ ka lamɛnni kɛ, o ka lamɛnni kɛ dɛ.»
[24] Yesu y'a fɔ u ye ko kura ko: «Aw bɛ ko min mɛn, a' ye aw cogo dɔn o la. Aw bɛ tɔw ta suma ni minɛn min ye, aw ta na suma ni o minɛn yɛrɛ de ye, dɔ na fara aw ta kan.
[25] Fɛn bɛ min bolo, dɔ na di o ma ka fara a ta kan, nka fɛn tɛ min bolo, hali o dɔɔnin min b'a bolo, o na bɔsi a la.»
[26] Yesu y'a fɔ tun ko: «Ala ka masaya bɔlen bɛ ko min fɛ, o filɛ. Cɛ dɔ bɛ serili kɛ a ka foro la.
[27] Ka a to sunɔgɔ la su fɛ ka wuli tile fɛ don o don, kisɛw bɛ falen ka bonya k'a sɔrɔ a ma a cogo dɔn.
[28] Kisɛ bɛ falen ka bɔ duguma ka sun sɔrɔ, tinsan bɛ bɔ sun na ka kisɛ kosɛbɛ.
[29] A mana kɔgɔ, cɛ bɛ a kan ni a ka wɔlɔsɔ ye, k'a masɔrɔ suman tigɛ tuma sera.»
[30] Yesu y'a fɔ tun ko: «An bɛ se ka Ala ka masaya kɛɲɛ ni mun ye? An na ntalen jumɛn da ka a ko jira?
[31] A bɔlen bɛ mutarde kisɛ fɛ. Ni i bɛ a seri duguma, a ka dɔgɔ ni dugukolo kan kisɛ serita tɔw bɛɛ ye.
[32] Nka a serilen kɔ, a bɛ falen ka bonya ka tɛmɛn nakɔ ɲugu tɔw bɛɛ kan. A bolow bɛ bonya fo kɔnɔw bɛ se ka u ka ɲaaw da a suma la.»
[33] Yesu ye mɔgɔw kalan ni o bɔɲɔgɔnko ntalen caman ye. A lamɛnbaaw tun bɛ se ka min faamu, a tun bɛ u kalan ka kɛɲɛ ni o ye.
[34] A tun tɛ kuma u fɛ ni ntalenw tɛ. Ni a ni a ka kalandenw tun bɛ u dan na, a tun bɛ o ntalenw bɛɛ kɔrɔ fɔ olu ye.
[35] O don yɛrɛ wula da fɛ, Yesu y'a fɔ a ka kalandenw ye ko: «An ka taa ba kɔ.»
[36] U ye jama labila. Yesu tun bɛ kurun min kɔnɔ, a ka kalandenw taara n'a ye o kɔnɔ. Kurun dɔw fana taara a fɛ.
[37] Fiɲɛba wulila, jikuruw tun bɛ bin kurun kɔnɔ fo kurun tun bɛ ɲini ka fa ji la.
[38] Yesu tun bɛ sunɔgɔ kurun kɔfɛla la, a kun dalen tun bɛ kunkɔrɔ dalan kan. A ka kalandenw y'a kunun k'a fɔ a ye ko: «Karamɔgɔ, an tɔ to filɛ ji la, i tɛ o jate fɛn ye wa?»
[39] Yesu kununna ka fiɲɛ kɔrɔfɔ k'a fɔ baji ye ko: «I mada ka sumaya.» O fɔlen, fiɲɛ jɔra, ji madara.
[40] O kɔ, Yesu y'a fɔ a ka kalandenw ye ko: «Mun na aw siranna? Mun y'a to dannaya tɛ aw fɛ?»
[41] Nka u siranna kosɛbɛ k'a fɔ ɲɔgɔn ye ko: «Nin cɛ ye jɔn ye, fo fiɲɛ ni ji b'a kan minɛ?»