[1] Yesu donna Alabatoso kɔnɔ ko kura. Cɛ bolojalen dɔ tun bɛ yen.
[2] Minnu tun bɛ yen, u tun bɛ Yesu kɔlɔsi k'a filɛ ni a na o cɛ kɛnɛya lafiɲɛ don na, walisa u k'a sendon sababu sɔrɔ.
[3] Yesu y'a fɔ o cɛ bolojalen ye ko: «Wuli k'i jɔ mɔgɔw cɛma.»
[4] O kɔ, a y'a fɔ u ye ko: «A dagalen bɛ ka ko ɲuman kɛ lafiɲɛ don na wa, wala ka ko jugu kɛ? Ka mɔgɔ kisi wa, wala ka mɔgɔ faga?» U ye u makun.
[5] Yesu diminnen ye a ɲɛ yaala ka u filɛ, a ɲɛnasisilen tun don u ka dusukun gɛlɛya kosɔn. A y'a fɔ o cɛ ye ko: «I bolo mɔɔnɔbɔ.» A y'a mɔɔnɔbɔ, a bolo kɛnɛyara.
[6] O yɔrɔnin bɛɛ Farisiɛnw bɔra ka taa, u ni Hɛrɔde ka mɔgɔw ye ɲɔgɔn ye ka cogo ɲini Yesu fagali ko la.
[7] Yesu ni a ka kalandenw bɔra yen ka taa Galile ba da la. Jamaba tugura a nɔfɛ. Dɔw bɔra Galile jamana ni Jude jamana la,
[8] ani Jerusalɛm ni Idumɛ jamana ni Jurdɛn ba kɔfɛ jamanaw ani Tir ni Sidɔn kɛrɛfɛ duguw. O jamaba taara Yesu sɛgɛrɛ, katuguni u tun ye a ka ko kɛlenw kibaru mɛn.
[9] Yesu y'a fɔ a ka kalandenw ye ko u ka kurun misɛn bila a ye walisa jama kana a ɲɔni k'a degun.
[10] A ye mɔgɔ caman kɛnɛya. O de kosɔn banabaatɔw bɛɛ tun bɛ girin a nɔfɛ walisa u ka maga a la.
[11] Jinɛw y'a ye tuma min na, u tun bɛ bin a sen kɔrɔ ka pɛrɛn ko: «I ye Ala Denkɛ ye!»
[12] Nka ale yɛrɛ ye min ye, a y'a gɛlɛya u ma ko u kana o fɔ mɔgɔ si ye.
[13] O kɔ, Yesu yɛlɛnna kulu kan ka a sagola mɔgɔw wele. U taara a fɛ.
[14] A ye tan ni fila ɲɛnatɔmɔ ka to a fɛ ani ka u ci ka taa waajuli kɛ.
[15] A ye fanga di u ma ka jinɛw gɛn ka bɔ mɔgɔw la.
[16] A ye tan ni fila minnu ɲɛnatɔmɔ, olu filɛ ninnu ye:
[17] Simɔn (Yesu ye o wele Piɛrɛ), ani Zebede denkɛ fila Yakuba ni Yuhana (Yesu ye olu wele Boanɛrjɛs, o kɔrɔ, u ka fari i ko sanpɛrɛn),
[18] ani Andre, ni Filipe ani Bartɛlɛmi ni Matiyu ani Tɔma ni Alifɛ denkɛ Yakuba, ani Tade ni Simɔn Zelote
[19] ani Juda Isikariɔti, o de ye Yesu don bolo la.
[20] O kɛlen kɔ, Yesu jiginna so dɔ kɔnɔ. Jamaba y'u lajɛ ko kura fo a ni a ka kalandenw ma se ka dumuni kɛ yɛrɛ.
[21] A so mɔgɔw ye o kibaru mɛn minkɛ, u ye sira minɛ ko u bɛ taa a minɛ. U ko: «A hakili wulila.»
[22] Sariya karamɔgɔ minnu nana ka bɔ Jerusalɛm, olu ko: «Bɛlzebul b'a la, a bɛ jinɛw gɛn ka bɔ mɔgɔw la jinɛw kuntigi de barika la.»
[23] O fɔlen, Yesu ye u wele ka ntalen da u ye ko: «Sitanɛ bɛ se ka Sitanɛ gɛn cogo di?
[24] Masaya o masaya, ni a fan kelen wulila a fan dɔ kama, o masaya bɛ tiɲɛ.
[25] So o so, ni a ka mɔgɔw wulila ɲɔgɔn kama, o so tɛna se ka sigi.
[26] Ayiwa, ni Sitanɛ wulila a yɛrɛ kama, a ka masaya tilalen don, a tɛ se ka sigi, nka o masaya na ban.
[27] «Mɔgɔ si tɛ se ka don cɛ barikama ka so kɔnɔ ka a bolofɛnw cɛ, ni a ma o cɛ barikama siri fɔlɔ. Nka n'a y'a siri tuma min na, a bɛ se ka so kɔnɔ fɛnw bɛɛ cɛ.
[28] «Tiɲɛ la ne b'a fɔ aw ye, mɔgɔw ka jurumuw ani u ka Ala tɔgɔ tiɲɛni kow bɛɛ bɛ se ka yafa u ma.
[29] Nka mɔgɔ min mana Ni Senu tɔgɔ tiɲɛ, o tɛna yafa a ma, a ka jurumu bɛ to a kun badaa-badaa.»
[30] Yesu y'o fɔ katuguni u ko: «Jinɛ b'a la.»
[31] Yesu ba ni a balimakɛw nana ka u jɔ kɛnɛma, ka mɔgɔ bila ka Yesu wele.
[32] Mɔgɔ caman sigilen tun bɛ Yesu kɔrɔ ka a lamini. Dɔw y'a fɔ a ye ko: «I ba ni i balimakɛw filɛ kɛnɛma. U b'i ɲini.»
[33] Yesu y'u jaabi ko: «Jɔn ni jɔn ye ne ba ni ne balimakɛw ye?»
[34] O kɔ, a ye a lamini mɔgɔ sigilenw filɛ, a ko: «Ne ba ni ne balimakɛw filɛ yan.
[35] Mɔgɔ o mɔgɔ bɛ Ala sago kɛ, o de ye ne balimakɛ ni ne balimamuso ani ne ba ye.»