[1] O kɔ, Yesu taara Galile ba kɔ, o ye Tibɛriyade ba ye.
[2] Jamaba tugura a nɔfɛ, katuguni a tun bɛ banabaatɔw kɛnɛya cogo min na, u tun bɛ o kabakow ye.
[3] Yesu yɛlɛnna kulu kan, a ni a ka kalandenw y'u sigi yen.
[4] Yahutuw ka Tɛmɛnkan seli surunyalen tun don.
[5] Yesu y'a ɲɛ kɔrɔta ka jamaba natɔ ye a yɔrɔ. A y'a fɔ Filipe ye ko: «An bɛ nbuuru san min, walisa nin mɔgɔw ka dumuni kɛ?»
[6] A ye o fɔ ka Filipe dakɔrɔbɔ, katuguni a tun bɛna min kɛ, a yɛrɛ ye o dɔn ka ban.
[7] Filipe y'a jaabi ko: «Hali ni wari dɛɲɛ kɛmɛ fila nbuuru sanna ka dɔɔnin-dɔɔnin di u ma, u bɛɛ tɛna dɔ sɔrɔ o la.»
[8] Simɔn Pierɛ balimakɛ Andre, min tun ye a ka kalanden dɔ ye, o y'a fɔ a ye ko:
[9] «Nbuurukun duuru ni jɛgɛ fila bɛ cɛnin dɔ bolo yan, nka o bɛ mun ɲɛ nin mɔgɔ caman ɲɛ?»
[10] Yesu y'a fɔ u ye ko: «A' ye jama lasigi.» Bin caman tun bɛ o yɔrɔ la. U y'u sigi, u tun bɛ cɛ waa duuru ɲɔgɔn bɔ.
[11] Yesu ye o nbuuru ta ka barika da Ala ye ka o nbuurukunw tilatila o mɔgɔ sigilenw cɛ. A ye jɛgɛ fana di u ma ten, bɛɛ kelen-kelen ye u sagola ta sɔrɔ.
[12] U bɛɛ falen kɔ dumuni la, Yesu y'a fɔ a ka kalandenw ye ko: «A' ye nbuuru kunkurun tɔ tolenw cɛ walisa u si kana tiɲɛ.»
[13] U ye o nbuurukun duuru tɔ tolenw cɛ ka segi tan ni fila fa, minnu tora dumunikɛlaw kɔ.
[14] Mɔgɔw ye Yesu ka taamashyɛn kɛlen ye tuma min na, u ko: «kira min ka kan ka na diɲɛ la, nin cɛ yɛrɛ don!»
[15] Yesu y'a dɔn ko u tun b'a fɛ k'a minɛ diyagoya la k'a kɛ masakɛ ye, o de y'a to a y'i mabɔ u la ka taa kulu kan ko kura a dan na.
[16] Tilebin tuma la, Yesu ka kalandenw jiginna ka taa ba da la.
[17] U donna kurun dɔ kɔnɔ ka ba tigɛ daminɛ ka taa Kapɛrnaum fan fɛ. Dibi donna k'a sɔrɔ Yesu tun ma na u fɛ fɔlɔ.
[18] Fiɲɛba wulila baji kan fo ka ji lamaga kosɛbɛ.
[19] U taara ɲɛfɛ ni kurun ye baji kan ka kilomɛtɛrɛ duuru wala wɔɔrɔ ɲɔgɔn kɛ. O tuma la u ye Yesu ye, a tun bɛ taama ji kan ka gɛrɛ kurun la, u siranna.
[20] Nka Yesu y'a fɔ u ye ko: «Ne don, aw kana siran.»
[21] O tuma la a diyara u ye a ka don u fɛ kurun kɔnɔ. O yɔrɔnin bɛɛ, kurun sera u taa yɔrɔ dankan na.
[22] O dugusajɛ, jama min tora ba kɔfɛ, olu y'a kɔlɔsi ko kurun kelenpe tun bɛ yen. U y'a dɔn ko Yesu ma don o kurun kɔnɔ a ka kalandenw fɛ, nka kalandenw dama tun bɔra yen.
[23] O y'a sɔrɔ Matigi ye barika da Ala ye ka nbuuru di u ma u k'a dun yɔrɔ min na, kurun dɔ wɛrɛw sera o yɔrɔ la ka bɔ Tibɛriyade dugu la.
[24] Jama y'a ye ko Yesu ni a ka kalandenw si tɛ yen, u donna o kurunw kɔnɔ ka taa Kapɛrnaum ka Yesu ɲini.
[25] U ye Yesu sɔrɔ ba kɔ minkɛ, u y'a fɔ a ye ko: «Karamɔgɔ, i sera yan tuma jumɛn?»
[26] Yesu ye u jaabi ko: «Tiɲɛ tiɲɛ la ne b'a fɔ aw ye ko: Aw ye taamashyɛn minnu ye, aw tɛ ne ɲini olu kosɔn dɛ. Aw bɛ ne ɲini katuguni aw ye dumuni kɛ ka aw fa.
[27] Dumuni min bɛ ban, aw kana baara kɛ o sɔrɔli dɔrɔn kosɔn, fɔ dumuni min bɛ to badaa ka ɲɛnamaya banbali di. Mɔgɔ Denkɛ na o dumuni di aw ma, katuguni Fa Ala y'a ka taamashyɛn da ale kan.»
[28] U y'a ɲininka ko: «An ka kan ka mun kɛ walisa ka Ala sago kɛ?»
[29] Yesu ye u jaabi ko: «Ala sago ye nin de ye, ko Ala ye min ci, aw ka da o la.»
[30] U y'a ɲininka ko: «I bɛ se ka taamashyɛn jumɛn jira an na, walisa an ka da i la? I na kɛwale jumɛn kɛ?
[31] An bɛnbaw ye manɛ dun kongokolon kɔnɔ, i ko a sɛbɛnnen bɛ Kitabu la cogo min na ko: ‘A ye dumunifɛn di u ma ka bɔ sankolo la.’»
[32] Yesu ye u jaabi ko: «Tiɲɛ tiɲɛ la ne b'a fɔ aw ye ko: Musa ma dumunifɛn di aw ma ka bɔ sankolo la, nka ne Fa bɛ dumunifɛn sɛbɛ di aw ma ka bɔ sankolo la.
[33] Katuguni min jiginna ka bɔ sankolo la ka ɲɛnamaya di diɲɛ ma, o ye Ala ka dumunifɛn ye.»
[34] U y'a fɔ a ye ko: «Matigi, i ka o dumunifɛn di an ma tuma bɛɛ.»
[35] Yesu y'a fɔ u ye ko: «Ne de ye ɲɛnamaya dumunifɛn ye. Mɔgɔ min nana ne ma, kɔngɔ tɛna o minɛ fewu. Min dara ne la, minnɔgɔ tɛna o minɛ abada.
[36] Nka ne y'a fɔ aw ye ka ban ko, aw ye ne ye, hali o, aw ma dannaya kɛ.
[37] Ne Fa bɛ minnu di ne ma, olu bɛɛ bɛ na ne ma. Min mana na ne ma, ne tɛna o tigi gɛn ka bɔ kɛnɛma fewu.
[38] Katuguni ne ma jigin ka bɔ sankolo la ne yɛrɛ sago kɛli kama, fɔ ne cibaa sago.
[39] Ne cibaa sago filɛ nin ye ko, a ye minnu di ne ma, olu si kana tunun ne ma, nka ne ka u lakunun ɲɛnamaya kama laban don na.
[40] Ne Fa sago filɛ nin ye ko, mɔgɔ minnu ye a Denkɛ lajɛ ka da a la, olu ka ɲɛnamaya banbali sɔrɔ, ne na u lakunun laban don na.»
[41] Yahutuw ye dajukɔrɔ kuma fɔ Yesu kama, katuguni ale tun y'a fɔ ko a ye dumunifɛn ye min jiginna ka bɔ sankolo la.
[42] U ko: «Nin tɛ Yusufu denkɛ Yesu ye wa, an bɛ min fa ni a ba dɔn? Sisan a b'a fɔ cogo di ko a jiginna ka bɔ sankolo la?»
[43] Yesu ye u jaabi ko: «A' ye dajukɔrɔ kuma dabila.
[44] Mɔgɔ si tɛ se ka na ne ma ni ne Fa min ye ne ci, ni o m'a sama. Ne na a lakunun laban don na.
[45] Kiraw ye nin kuma sɛbɛn ko: ‘U bɛɛ na kalan Ala fɛ.’ Mɔgɔ o mɔgɔ ye ne Fa lamɛn ka kalan a fɛ, o bɛ na ne ma.
[46] A tɛ i ko mɔgɔ ɲɛ dara ne Fa kan. Min nana ka bɔ Ala la, o kelenpe ɲɛ dara ne Fa kan.
[47] «Tiɲɛ tiɲɛ la ne b'a fɔ aw ye ko: Min dara ne la, ɲɛnamaya banbali bɛ o tigi fɛ.
[48] Ne de ye ɲɛnamaya dumunifɛn ye.
[49] Ka aw bɛnbaw to kungokolon kɔnɔ, u ye manɛ dun, u sara.
[50] Nka dumunifɛn min bɛ jigin ka bɔ sankolo la, nin don. Ni min ye o dun, o tɛna sa.
[51] Ne ye dumunifɛn ɲɛnama ye min jiginna ka bɔ sankolo la, walisa ni mɔgɔ dɔ ye o dumunifɛn dun, o ɲɛnama ka to badaa. Ne na dumunifɛn min di, o ye ne farisogo ye, ne na o di walisa diɲɛ ka ɲɛnamaya.»
[52] O kuma kosɔn, sɔsɔliba wulila Yahutuw cɛma. U tun b'a fɔ ko: «Nin cɛ bɛ se k'a farisogo di an ma cogo di, an k'a dun?»
[53] Yesu y'a fɔ u ye ko: «Tiɲɛ tiɲɛ la ne b'a fɔ aw ye ko: Ni aw ma Mɔgɔ Denkɛ farisogo dun k'a joli min, ɲɛnamaya tɛ aw kɔnɔ fewu.
[54] Min bɛ ne farisogo dun ka ne joli min, ɲɛnamaya banbali bɛ o tigi fɛ, ne n'a lakunun laban don na.
[55] Katuguni ne farisogo ye dumunifɛn sɛbɛ ye, ne joli ye minnifɛn sɛbɛ ye.
[56] Min bɛ ne farisogo dun ka ne joli min, o tolen bɛ ne la, ne tolen bɛ o la.
[57] Ne Fa min ye ne ci, o ɲɛnama don cogo min na, ne bɛ ɲɛnamaya ale la, o cogo la min bɛ ne dun, o bɛ ɲɛnamaya ne la.
[58] Dumunifɛn min jiginna ka bɔ sankolo la, nin don. Aw bɛnbaw ye manɛ min dun ka sɔrɔ ka sa, a ni o tɛ kelen ye. Min bɛ nin dumunifɛn dun, o ɲɛnama na to badaa.»
[59] Ka Yesu to Alabatoso kɔnɔ Kapɛrnaum mɔgɔw kalanni la, a ye o kumaw fɔ.
[60] Yesu ka kalanden caman y'a ka kumaw mɛn minkɛ, u ko: «Nin kuma ka gɛlɛn dɛ. Mɔgɔ jumɛn bɛ se ka o minɛ?»
[61] Yesu y'a dɔn a yɛrɛma ko a ka kalandenw bɛ dajukɔrɔ kuma fɔ o ko la, a y'a fɔ u ye ko: «O bɛ aw kunnatiɲɛ wa?
[62] Mɔgɔ Denkɛ tun bɛ yɔrɔ min na fɔlɔ, ni aw ye a yɛlɛntɔ ye ka taa yen dun?
[63] Ni de bɛ mɔgɔ ɲɛnamaya, farisogo tɛ foyi ɲɛ. Ne bɛ kuma minnu fɔ aw ye, olu ye Ni ni ɲɛnamaya de ye.
[64] Nka dɔw bɛ aw cɛma minnu ma dannaya kɛ.» Mɔgɔ minnu ma dannaya kɛ ani min bɛ a don bolo la, Yesu ye olu bɛɛ dɔn kabini fɔlɔ la.
[65] A ye nin fana fɔ ko: «O de y'a to ne y'a fɔ aw ye ko, mɔgɔ si tɛ se ka na ne ma ni ne Fa ma o se di a ma.»
[66] Kabini o tuma la, a ka kalanden caman seginna kɔ, u ma taama a fɛ tun.
[67] Yesu y'a fɔ a ka kalanden tan ni fila ye ko: «Aw fana b'a fɛ ka segin wa?»
[68] Simɔn Pierɛ y'a jaabi ko: «Matigi, an na taa jɔni yɔrɔ? ɲɛnamaya banbali kumaw bɛ sɔrɔ e de fɛ.
[69] Sisan an dara a la k'a dɔn ko i ye Ala ka Senuma ye.»
[70] Yesu ye u jaabi ko: «Ne ma aw tan ni fila ɲɛnatɔmɔ wa? O bɛɛ n'a ta, aw la kelen ye Sitanɛ ye!»
[71] A tun bɛ kuma Simɔn Isikariɔti denkɛ Juda ko la, o de tun bɛna Yesu don bolo la, a ka kalanden tan ni fila la kelen tun don.