[1] آمّا بو ائش یونوسون هچ خوشونا گلمه‌دی و او حئرصلَندی.
[2] او، ربّه دوعا ادئب ددی: «یارب! من حله اؤلکَمده ائکن مگر بونو دِمئردئم؟ بونا گؤره ده من تَرشئشه قاچدیم، چونکی بئلئردئم کی، سن فیّاض و شَفقَتلی بئر تاریسان، گِج قضبله‌نَن و بول محبّتلی‌سن و رحم ادئب بلا گؤندَ‌رمَزسن.
[3] بونا گؤره ده یارب، یالواریرام، منئم جانیمی آل، چونکی منئم اوچون اؤلمَک یاشاماقدان داها یاخشی‌دیر.»
[4] رب ددی: «حئرصلَنمَکله مگر یاخشی ائش ادئرسن؟!»
[5] یونوس شهردن چیخدی و شهرئن شرق طرفئنده اوتوردو. اورادا اؤزونه چارداق دوزَ‌لدئب کؤلگه‌سئنده اوتوردو کی، شهرده نه باش وره‌جیئنی گؤرسون.
[6] رب تاری یونوسون باشی اوستونه گَنه‌گَرچک بئتکئسی بئتئردی کی، بؤیویوب یونوسون باشی اوستونه کؤلگه سالسین و اونو پئس حالیندان قورتارسین. یونوس بو بئتکئیه گؤره چوخ سِوئندی.
[7] لاکئن اِرته‌سی گون سحر تزدن تاری بئر بئتکی قوردو یتئردی. قورد بئتکئنی یِیئب قوروتدو.
[8] گونش چیخاندا تاری ائستی بئر کولَک شرقدن یتئردی. گونشئن ائستئسی یونوسون باشینی ووروب یاخدی و او، طاقتدن دوشدو. اؤزو اوچون اؤلوم آرزو ادئب ددی: «منئم اوچون اؤلمک یاشاماقدان داها یاخشی‌دیر.»
[9] تاری یونوسا ددی: «بو بئتکئیه گؤره حئرصلَنمکله مگر یاخشی ائش ادئرسن؟!» او ددی: «اؤلمه‌یه قدر حئرصلی اولماغیم منه یاخشی‌دیر.»
[10] او واخت رب ددی: «زحمتئنی چکمه‌دئیئن و یِتئشدئرمه‌دئیئن، بئر گجه‌ده بئتَن و بئر گجه‌ده محو اولان بئتکئیه سنئن اوره‌یئن یانیر.
[11] بس من نجه نِینَوایا، بو بؤیوک شهره اورک یاندیرماییم کی، صاغ اَلئنی سول اَلئندن آییرا بئلمه‌ین یوز ائیئرمی مئندن چوخ ائنسان و چوخلو حیوانی وار؟!»