[1] یهودا پادشاهلاری یوتام، آخاز و خئزقئیانین دؤورونده، سامئره و اورشلئم باره‌سئنده، مورِشِتلی مئکایا رؤیا واسئطه‌سی‌ائله ربّئن بو سؤزو نازئل اولدو.
[2] اِشئدئن، سئز، ای بوتون خالقلار، قولاق آسین، ای یر اوزو و اورادا یاشایانلار! قوی پروردئگار رب سئزئن ضئدّئنئزه شهادت ورسئن؛ پروردئگار موقدّس معبدئندن.
[3] چونکی باخ، رب یِرئندن چیخیب گلئر، او یِر اوزونه اِنه‌جک، داغلارین زئروه‌لرئنده یِرئیه‌جک.
[4] داغلار اونون آیاقلاری آلتیندا اود یانیندا اَرئیَن موم کئمی اَرئیه‌جکلر، دره‌لر، تپه‌لردن آشاغی آخان سِللر کئمی، یاریلاجاق.
[5] بوتون بونلار یعقوب اؤولادلارینین عاصئلئیئنه، ائسرایئل خالقینین گوناهلارینا گؤره‌دئر. یعقوب اؤولادلارینین عاصئلئیی نه‌دئر؟ مگر سامئره دیئل؟! یهودانین بوت پرستئشگاهی نه‌دئر؟ مگر اورشلئم دیئل؟!
[6] «بونا گؤره من سامئره‌نی یِرله بئر اده‌جیم، یِرئنده اوزوملوک سالیناجاق. داشلارینی دره‌یه تؤکه‌جیم، بونؤوره‌لرئنی آچیق قویاجاغام.
[7] سامئره‌نئن بوتون بوتلری پارچا-پارچا قیریلاجاق، معبدئنه ورئلَن هدئیّه‌لر یاندیریلاجاق، بوتون تئمثال‌لارینی داغیداجاغام. بو هدئیّه‌لر فاحئشه‌لئک موزدو ائله ییغیلدیغینا گؤره، گئنه ده فاحئشه‌لر اوچون ائشله‌دئله‌جک.»
[8] بونا گؤره ده من مئکا، گرک آغلاییب گؤزیاشی تؤکوم، آیاق‌یالین، لوت-عوریان گَزئم، چاقّال کئمی اولاییم، بایقوش کئمی شئون چکئم.
[9] چونکی سامئره‌نئن یارالاری صاغالان دیئل، یهودایاجاق یاییلیب، خالقیمین دروازالاریناجاق، حتّا اورشلئمه‌جک چاتیب.
[10] بونو گَتده بئلدئرمه‌یئن، اصلا آغلامایین. بِیت‌عوفرادا توز-تورپاقدا یووارلانین.
[11] سئز ای شافئر ساکئنلری، لوت-عوریان، خجالت ائچئنده کچئب گدئن! صَعَناندا یاشایانلار اورادان قاچا بئلمیه‌جکلر. بِیت‌اِصِل اَهلی یاس توتاجاق؛ او، کؤمه‌یئنی سئزدن کَسه‌جک.
[12] ماروت اهالئسی یاخشیلیق آرزولایاراق، ضعئف اولورلار، چونکی رب اورشلئمئن دروازاسینا بلا سالیب.
[13] ای لاکئش ساکئنلری، آتلارینیزی دؤیوش عاربا‌لارینا قوشون. صحیون قیزینی سئز گوناها باتیردینیز، چونکی سئزده ائسرایئلئن عاصئلئیی تاپیلدی!
[14] بونا گؤره مورِشِت‌گَته آیریلماق هدئیّه‌‌لری وره‌جکسئنئز، اَکزئب شهری ائسرایئل پادشاهلارینی آلداداجاق.
[15] ای مارِشا ساکئنلری، رب اوستونوزه گئنه ائستئلاچی گتئره‌جک، عَدوللام ماغاراسینا ائسرایئلئن آدلی-سانلی آداملاری سیغیناجاق.
[16] ای یهودا، عَزئز بالالاریندان اؤتری ساچینی قیرخ، قوی باشین کَرکس باشی کئمی کِچَل اولسون، چونکی اؤولادلارین اسئرلئیه آپاریلاجاق!