[1] قارداشلارینیزی عَمّی، باجیلارینیزی دا روخاما دیئب چاغیرین.
[2] باشلایین آنانیزین ضئدّئنه اولان داعوانی، باشلایین، چونکی او، منئم آروادیم دیئل، من ده اونون اَری دیئلم. قوی اوزونده گؤرونَن فاحئشه‌لئیی، سئنه‌لرئنئن آراسیندا اولان فاحئشه‌لئیی آتسین.
[3] یوخسا اونو چیل-چیلپاق سویوندوروب لوت، آنادان‌گلمه ادهجیم. من اونو صحرا کئمی، قورو تورپاق کئمی ادهجیم، سوسوزلوقدان اؤلدوره‌جیم.
[4] اونون بالالارینا دا رحم اتمیه‌جیم، چونکی اونلار زئنا اؤولادی‌دیرلار.
[5] اونلارین آناسی فاحئشه‌لئک اتدی. اونلارا بویلو قالان آرواد رذئل‌لئک اتدی، چونکی ددی: ”اویناشلاریمین دالینجا گده‌جیم، چؤره‌یئمی ورن، سویومو ورن، یونومو ورن، کتانیمی ورن، زیتون یاغیمی و ائچکئمی ورن اونلاردیر.“
[6] بونا گؤره ده، باخ، اونون یولونو تئکانلارلا کَسئب قاباغینا حاصار چکه‌جیم، اِله کی، اؤز یولونو تاپا بئلمیه‌جک.
[7] اویناشلارینین دالینجا گده‌جک، لاکئن اونلارا چاتمایاجاق. اونلاری آختاراجاق، آمّا تاپمایاجاق. او زامان دئیه‌جک: ”قوی اؤز اوّلکی اَرئمئن یانینا قاییدیم، چونکی او واخت حالیم ائندئکئندن یاخشی ائدی.“
[8] آمّا او بئلمئردی کی، اونا تاخیلی، تزه شرابی، زیتون یاغینی ورن منم. بَعَل بوتو اوچون صرف اتدئکلری قیزیل-گوموشو چوخالدان منم.
[9] بونا گؤره ده محصول واختیندا تاخیلیمی، اؤز مؤوسومونده تزه شرابیمی گری آلاجاغام. چیلپاقلیغینی اؤرتمک اوچون اونا وردئیئم یونو و کتانی اَلئندن آلاجاغام.
[10] سونرا اویناشلارینین قاباغیندا اونون عاییبینی اوزه چیخارداجاغام. کئمسه اونو اَلئمدن قورتارا بئلمیه‌جک.
[11] اونون بوتون شادلیقلارینا، بایراملارینا، تزه آی مراسئملرئنه، سَبّت گونلرئنه و بوتون طنطنه‌لی ییغیناقلارینا آخیر قویاجاغام.
[12] مِینه‌لرئنی، اَنجئر آغاجلارینی محو ادهجیم. او بونلار باره‌ده دیئردی: ”بو، اویناشلاریمین منه وردئیی اوجرتدئر.“ باغلارینی تئکانلیغا چِوئره‌جیم، وحشی حیوانلار اونلاری یئیه‌جکلر.
[13] بَعَل بوتلرئنه بوخور یاندیردیغی گونلر اوچون اونو جزالاندیرجاغام. او واخت گوشوارالار و جواهئراتلا اؤزونو بَزه‌یه‌رک اویناشلارینین دالینجا گتدی، لاکئن منی یاددان چیخارتدی.» رب بله بویورور.
[14] «بونا گؤره ده، باخ، من اونو دئله توتوب صحرایا آپاراجاغام، اونونلا مهرئبان دانیشاجاغام.
[15] اورادا اونا اوزوم باغلارینی وره‌جیم، آکور دره‌سئنی اومئد قاپیسینا چِوئره‌جیم. جاوانلیق گونلرئنده اولدوغو کئمی، مئصئر تورپاغیندان چیخدیغی گون کئمی، اورادا نغمه اوخویاجاق.»
[16] رب بویورور: «همئن گون منه ”منئم اَرئم“ دئیه‌جکسن، آرتیق ”منئم بَعه‌لئم“ دِمیه‌جکسن.
[17] چونکی بَعَل بوتلرئنئن آدلارینی دئلئندن سئله‌جیم، اِله کی، اونلارین آدی بئر داها یادا سالینمایاجاق.
[18] او گون سنئن اوچون چؤل حیوانلاری ائله، گؤی قوشلاری ائله، یرده سوروننلرله عهد کَسه‌جیم. اؤلکه‌دن کامانی، قیلینجی، موحارئبه‌نی گؤتوره‌جیم، سنی اَمئن-آمانلیقدا یاتیرداجاغام.
[19] سنی ابدی اولاراق اؤزومه نئشانلایاجاغام، صالحلئکله، عدالتله، مهرئبانلیقلا، شَفقَتله سنی اؤزومه نئشانلایاجاغام.
[20] سنی صداقتله اؤزومه نئشانلایاجاغام، و سن ربّی تانییاجاقسان.»
[21] رب بویورور: «او گون جاواب وره‌جیم، گؤیلره جاواب وره‌جیم، اونلار دا یِره جاواب وره‌جکلر.
[22] یِر تاخیلا، تزه شرابا و زیتون یاغینا جاواب وره‌جک، اونلار دا یئزرِعِله جاواب وره‌جکلر.
[23] خالقیمی اؤلکه‌ده اؤزوم اوچون اَکه‌جیم، مرحمت تاپمامیش اولانا دا مرحمت گؤرسده‌جیم. ”خالقیم دیئل“ دِدئیئمه خالقیم اولمایانا ”سئز خالقیمسینیز!“ دئیه‌جیم. اونلار دا منه ”تاریمیزسان“ دئیه‌جکلر.»