[1] اوره‌یئمده فئکئرلَشدئم: «گل ائندی، سنی لذّتله ائمتاحان ادئم، کفه باخ.» و گؤردوم کی، بو دا باطئلدئر.
[2] گولمک حاقّیندا ددئم: «دلئلئکدئر!» و لذّت حاقّیندا ددئم: «نه فایداسی وار؟»
[3] اوره‌یئمده بونو آراشدیردیم کی، نجه بدنئمی شرابلا شادلاندیریم و نجه عاغیلسیزلیغی اَله گتئرئم. اوره‌یئم حله ده منی حئکمتله هئدایت ادئردی. ائسته‌یئردئم گؤروم گؤیون آلتیندا ائنسانلار اوچون اونلارین بو نچه گون عؤمورلرئنده دَیَرلی اولان نه وار.
[4] بؤیوک ائشلر اتدئم: اؤزومه اِولر تئکدئم، اؤزومه اوزوم باغلاری سالدیم،
[5] اؤزومه باغچالار و باغلار دوزَلتدئم و اونلاردا هر جور میوه آغاجی اَکدئم.
[6] اؤزومه سو حوووضلاری قاییردیم کی، مشه‌ده بئتن آغاجلاری سووارسین.
[7] نؤکرلر و کنئزلر آلدیم، اِوئمده دوغولان قوللاریم دا وار ائدی. هم ده مال-حیوانیم و سورولرئم، او قدر کی، بوتون مندن ائره‌لی اورشلئمده اولانلارینکیندان چوخ ائدی.
[8] اؤزومه قیزیل و گوموش، پادشاهلار و وئلایتلرئن خزئنه‌لرئنی ده ییغدیم. اؤزومه کئشی و آرواد خانَنده‌لر آلدیم، اؤزومه کئشئلرئن لذّت آلدیغی حرملری ده چوخالتدیم.
[9] بله‌جه بؤیودوم و بوتون مندن ائره‌لی اورشلئمده اولانلاردان داها بؤیوک اولدوم. حئکمتئم ده یانیمدا قالدی.
[10] گؤزلرئمئن بوتون آرزو اتدئیئنی اونلاردان اسئرگَمه‌دئم، اوره‌یئمی هچ بئر حظّدن محروم اتمه‌دئم. قلبئم چکدئیئم بوتون مشقّتلردن راضی ائدی. بو، چکدئیئم بوتون مشقّتلرئن پایی ائدی.
[11] دؤنوب اَللرئمئن اتدئیی بوتون ائشلره، اتدئکلرئمده چکدئیئم بوتون مشقّته باخدیم. باخ، هامیسی باطئل ائدی، یل دالینجا قاچماق ائدی، گون آلتیندا هچ فایداسی یوخ ائدی.
[12] سونرا دؤنوب حئکمته باخدیم، دلئلئیه و عاغیلسیزلیغا باخدیم. پادشاهین یرئنه اوتوران جانئشئن نه اده‌بئله‌جک کی، چوخدان ادئلمه‌مئش اولماسین.
[13] و گؤردوم کی، نجه ائشیق قارانلیقدان اوستوندور، حئکمت ده عاغیلسیزلیقدان اِله اوستوندور.
[14] حئکمتلی آدامین گؤزلری باشیندادیر، لاکئن سَفِه آدام قارانلیقدا گزئر. آمّا بونو دا بئلئرم کی، هر ائکئسئنئن باشینا گلن احوالات بئردئر.
[15] اوره‌یئمده فئکئرلشدئم: «سَفِه آدامین باشینا گلن احوالات منئم ده باشیما گله‌جک؛ بس حئکمتلی اولماغیمین نه فایداسی وار؟» اونا گؤره ده اوره‌یئمده ددئم: «بو دا باطئلدئر.»
[16] چونکی حئکمتلی آدام دا سَفِه آدام کئمی، بئر داها خاطیرلانمایاجاق، گله‌جک گونلرده هامیسی یادلاردان چیخاجاق. وای کی، حئکمتلی آدام دا سَفِه کئمی اؤلور!
[17] بله‌جه حیاتدان نئفرت اتدئم، چونکی گون آلتیندا ادئلن ائشلر منه یامان گؤروندو. هر شی باطئلدئر، یل دالینجا قاچماقدیر.
[18] بله اولدو کی، گون آلتیندا چکدئیئم زحمتلرئن بوتون ثمره‌سئندن نئفرت اتدئم، چونکی اونو مندن سونرا گلن آداما بوراخمالی‌یام.
[19] و کئم بئلئر کی، او، حئکمتلی بئر آدام اولاجاق، یوخسا عاغیلسیزین بئری؟ لاکئن هر حالدا، گون آلتیندا حئکمتلی رفتار ادئب چکدئیئم بوتون زحمتلرئن ثمره‌سئنی اَلی آلتینا آلاجاق. بو دا باطئلدئر.
[20] اونا گؤره ده اوره‌یئم گون آلتیندا چکدئیئم بوتون مشقّتلردن اومئدئنی ائتئردی.
[21] آدام وار کی، حئکمتله، معرئفتله، مهارتله زحمت چکئب، سونرا دا پایینی اونون اوچون زحمت چکمه‌مئش بئر آداما بوراخیر. بو دا باطئلدئر، بؤیوک بئر درددئر.
[22] چونکی آدامین گون آلتیندا چکدئیی بوتون زحمتئندن، اوره‌یئنئن آرزو اتدئیئندن اونا نه فایدا وار؟
[23] هامی گونلری آنجاق درددئر، ائشلری آنجاق کَدَردئر. حتّا گجه بله اوره‌یی راحاتلامیر. بو دا باطئلدئر.
[24] آدام اوچون داها یاخشی بئر شی نه وار؟ مگر بو کی، ییئب ائچسئن و چکدئیی زحمتئندن جانینا کِف قازانسین. گؤردوم کی، بو دا تاری طرفئندن گلئر.
[25] چونکی مندن باشقا کئم یئیه بئلر؟ کئم کف اده‌بئلر؟
[26] چونکی نظرئنده یاخشی اولان آداما، تاری حئکمت، معرئفت، و شادلیق ورئر، آمّا گوناهکارلارا ییغماق و آنبار اتمک زحمتئنی. اِله کی، اونلاری تارینین نظرئنده یاخشی اولانا ورسئن. بو دا باطئلدئر، یل دالینجا قاچماقدیر.