[1] اورشلئمده پادشاهلیق ادن داوود اوغلو واعئظئن سؤزلری.
[2] واعئظ دیئر: باشدان باشا باطئلدئر! باشدان باشا باطئلدئر! هر شی باطئلدئر.
[3] ائنسانین گون آلتیندا چکدئیی بوتون زحمتلرئنئن نه فایداسی وار؟
[4] بئر نسئل گدئر، او بئری نسئل گلئر، آمّا یر دائم دورور.
[5] گون چیخیر، گون باتیر؛ تَله‌سئک یرئنه دؤنور کی، تزه‌دن چیخسین.
[6] یل جنوب سمتئنه اسئر، سونرا شئمال سمتئنه دؤنور، دؤنه-دؤنه گدئر؛ دؤنوشلرئنی تکرار ادئر.
[7] بوتون چایلار دهنزه آخیرلار، آمّا دهنز هچ دولمور. آخدیقلاری یره دؤنورلر کی، تزه‌دن آخسینلار.
[8] هر شی یورور؛ بئر آدامین دئیه‌بئله‌جَیئندن ده چوخ! گؤز گؤرمکدن دویمور، قولاق دا اشئتمکدن.
[9] نه اولوب، گئنه اولاجاق، نه ادئلئب، گئنه ادئله‌جک؛ اونا گؤره ده گون آلتیندا هچ تزه بئر شی یوخدور.
[10] مگر اِله بئر شی وار کی، اونون حاقّیندا دیئلسئن: «باخ، تزه بئر شی!» او دا چوخدان وار ائمئش، بئزئم زامانیمیزدان دا قاباق.
[11] قاباقکی شیلردن هچ نه خاطیرلانمیر، گله‌جکده باش ورن شیلردن ده، بوندان سونرا گلنلر آراسیندا هچ نه خاطیرلانمایاجاق.
[12] من واعئظ، ائسرایئل اوستونه اورشلئمده پادشاه ائدئم.
[13] اوره‌یئمی بونا قویدوم کی، بوتون گؤیون آلتیندا عمل ادئلنلری حئکمتله تفتئش ادئب آراشدیریم. تاری ائنسانلارا نه دردلی بئر وظئفه ورئب کی، اونون آلتیندا زحمت چکسئن!
[14] گون آلتیندا ادئلن بوتون ائشلری گؤردوم، و باخ، هامیسی باطئلدئر؛ یل دالینجا قاچماقدیر.
[15] اَیری اولان دوز اولا بئلمز، اسکئک اولان ساییلماز.
[16] قلبئمده ددئم: «باخ، من بؤیوک بئر آدام اولموشام و مندن قاباق اورشلئمده اولان پادشاهلارین هامیسیندان چوخ حئکمت آرتیرمیشام. اوره‌یئم چوخ حئکمت و معرئفت گؤروب.»
[17] سونرا، اوره‌یئمی بونا قویدوم کی، حئکمتی آنلاییم، دلئلئک و سفه‌لئیی بئلئم. و بئلدئم کی، بو دا یل دالینجا قاچماقدیر.
[18] چونکی حئکمت چوخ اولدوقجا کَدَر ده چوخالیر، معرئفت آرتدیقجا، درد ده آرتیر.