[1] قوی قوللوق آلتیندا اولان بوتون قوللار، اؤز آغالارینی هر جور حؤرمته لایئق بئلسئنلر، اِله کی، تارینین آدینا و تعلئمئن ضئدّئنه کوفر دیئلمه‌سئن.
[2] اونلار دا کی، ائمانلی آغالاری وار، اونلارا گرک حؤرمتسئزلئک اتمه‌سئنلر، چونکی اونلار قارداشدیرلار. آمّا گرک اونلارا داها دا چوخ قوللوق اتسئنلر، چونکی فایدایا شرئک اولانلار ائمانلی و سوگئلئدئرلر. بو شیلری تعلئم ورئب، وعظ ات.
[3] اگر کئمسه اؤزگه بئر تعلئم ورسه و ربّئمئز عئسا مسئحئن صحئح سؤزلری ائله و دئندارلیغا دؤندَ‌رَن تعلئمله مووافئق اولماسا،
[4] او، کئبئرله‌نئب و هچ بئر شی آنلامیر. لاکئن داعوا سالان سوآللارا و سؤزلر باره‌سئنده اولان موباحئثه‌لره چوخ علاقه‌لری وار کی، اونلاردان حسد، داعوا، سؤیوش، و پئس گومانلار قالخیر
[5] و فئکئرلری فاسئد اولان و حقئقتدن محروم اولان آداملارین آراسیندا کی، دئندارلیغی قازانج اوچون بئر وسئله بئلئرلر، دائم چکئشمه قالدیریرلار.
[6] البتّه کی، دئندارلیق بؤیوک بئر قازانج اوچون وسئله‌دئر، اگر قَناعتله همراه اولسا.
[7] چونکی بو دونیایا هچ بئر شی گتئرمه‌دئک، اونون اوچون ده اوندان هچ بئر شی گؤتوره‌بئلمه‌رئک.
[8] اگر یئیه‌جه‌یئمئز و اؤرتونه‌جه‌یئمئز وارسا، بونلارلا قناعت ادئرئک.
[9] آمّا وارلی اولماق ائسته‌ینلر وسوسه‌یه، تورا، آخماقلیق و زئیان یتئرن چوخ هاوا-هوسلره دوشورلر کی، ائنسانلاری تباه و هلاکتده قرق ادئر.
[10] چونکی پول سوگئسی هر جور شرئن کؤکودور و اونون آرزوسوندا اولان بعضئلر ائماندان آزیبلار و اؤزلری اؤزلرئنه چوخ آجی چکدئرئبلر.
[11] سن ای تاری آدامی، بونلاردان قاچ و صالحلئک، دئندارلیق، ائمان، محبّت، صبر و حلم دالینجا اول.
[12] ائمانین یاخشی ساواشینی ساواش و ابدی حیاتی توت کی، اونون اوچون دعوت اولوندون و چوخ شاهئدلرئن حوضوروندا یاخشی اعتئراف اتدئن.
[13] هر شیه حیات ورن تارینین حوضوروندا و او مسئح عئسانین حوضوروندا کی، پونطئیوس پئلاطین قاباغیندا یاخشی اعتئرافلا شهادت وردی، سنه امر ادئرم کی،
[14] ربّئمئز عئسا مسئحئن ظوهورونا کئمی احکامی لکه‌سئز و مذمّتسئز ساخلایاسان.
[15] کی، اونو اؤز واختیندا یرئنه یتئره‌جک؛ او کی، موتبارک و تک بئر سولطاندیر، پادشاهلارین پادشاهی و ربلرئن ربّی.
[16] کی، اؤلومسوزلویه محض او مالئکدئر و یاخینلاشا بئلمه‌مه‌لی نوردا ساکئندئر کی، اونو نه بئر آدام گؤروب نه ده گؤره بئلر. اونا ابدی حؤرمت و قودرت اولسون. آمئن.
[17] بو حاضیر دونیادا وارلی اولانلارا نصئحت ور کی، کئبئرلنمه‌سئنلر، یا دا اَلدن گدن وار-دؤولته اومئد باغلاماسینلار. اومئدلرئنی تارییا باغلاسینلار کی، بهره آلماق اوچون هر شیی بئزه بوللوقلا عطا ادئر.
[18] نصئحت ور کی، یاخشیلیق اتسئنلر، یاخشی ائشلرده وارلی اولسونلار، سخاوتلی اولوب پایلاشماغا حاضیر اولسونلار.
[19] و اؤزلری اوچون گله‌جه‌یه یاخشی خزئنه‌نئن بونؤوره‌سئنی قورسونلار، اِله کی، حقئقی حیاتا مالئک اولسونلار.
[20] ای تئموتاعوس، سنه امانت ورئله‌نی حئفظ ات. دونیه‌وی و باطئل دانیشماقلاردان و ضئدّ دوران موباحئثه‌لردن کی، یالاندان اونا معرئفت دیئرلر، اؤزونو اوزاق ساخلا
[21] کی، بعضئلری اونو اعتئراف ادئب بله‌جه ائماندان آزدیلار. فیض سنئنله اولسون.