[1] قورتاریجیمیز تارینین و اومئدئمئز مسئح عئسانین امرئنه گؤره، مسئح عئسانین حوارئسی پولوسدان،
[2] ائماندا حقئقی اوغلوم تئموتاعوسا: آتا تاری و ربّئمئز مسئح عئسادان فیض، رحمت، و باریش اولسون.
[3] مقدونئیّه‌یه گتدئیئم واخت سندن خاهئش اتدئم کی، افسوسدا قالاسان و بعضئلره نصئحت وره‌سن کی، اؤزگه تعلئملر اؤیرتمه‌سئنلر،
[4] افسانه‌لر و ساییسیز-حسابسیز نسئل‌نامه‌لره ده قولاق آسماسینلار کی، تارینین بئنا اتمه‌سئنئن ترقّئسئنه کی، ائمانداندیر، سبب اولمورلار. اونلار آنجاق موباحئثه‌لره سبب اولورلار.
[5] آمّا بئزئم حؤکموموزون آماجی او محبّتدئر کی، پاک اورَکدن، یاخشی وئجداندان و رئیاسیز ائماندان گلئر.
[6] چونکی بعضی آداملار بونلاردان آزیب، ثمره‌سئز موباحئثه‌لره اوز گتئرئبلر
[7] و ائسته‌یئرلر کی، شرئعت موعلّئمی اولسونلار. حال بو کی، نه ددئکلرئنی آنلاییرلار، نه ده یقئنلئکله ائدّئعا اتدئکلرئنی!
[8] لاکئن بئز بئلئرئک کی، شرئعت یاخشی‌دیر اگر کئمسه اونو شرئعته موناسئب بئر شکئلده ائستئفاده اتسه،
[9] بونو دا بئلسه کی، شرئعت صالح بئر آدام اوچون قویولماییب؛ شرئعتسئزلر، عاصئلر، دئنسئزلر، گوناهکارلار، موقدّس اولمایانلار، نجئسلر، آتا و یا آنالارینی اؤلدورنلر، قاتئل‌لر،
[10] زئناکارلار، همجئنسبازلار، آدام اوغورلایانلار، یالان دانیشانلار، آندی پوزانلار و صحئح تعلئمئن ضئدّئنه اولان اؤزگه هر شی اوچون قویولوب.
[11] او تعلئم کی، موتبارک تارینین شؤوکتلی ائنجئلئنه گؤره منه تاپشیریلیب.
[12] ربّئمئز مسئح عئسایا شوکور ادئرم کی، منه قووّت ورئب. چونکی منی امئن بئلئب، خئدمته تعیئن اتدی؛
[13] گرچی اوّل‌لر کوفر دانیشان، عذاب ورن و ظولم اِده‌نئن بئری ائدئم. آمّا گئنه ده منه رحمت گؤرستدی، بو سببدن کی، ائمانسیزلیقدا، آنلامازلیقدان بونلاری اتدئم.
[14] و مسئح عئسادا اولان ائمان و محبّتله ربّئمئزئن فیضی حددن داها دا چوخ ائدی.
[15] بو سؤز اعتئمادا و هر وجه‌‌له قبول اولونماغا لایئقدئر کی، مسئح عئسا گوناهکارلاری قورتارماق اوچون دونیایا گلدی کی، اونلارین آراسیندا لاپ یامانی منم.
[16] لاکئن من محض بو سببه رحمت تاپدیم کی، عئسا مسئح اؤز کامئل صبرئنی ائلک اولاراق منده ظاهئر اتسئن. اِله کی، ابدی حیات اوچون سونرادا اونا ائنانانلارا نومونه اولوم.
[17] ائندی ابدی پادشاها، قیری‌‌فانی، گؤرونمه‌ین، واحئد اولان تارییا ابددن ابده‌جک حؤرمت و شؤوکت اولسون. آمئن.
[18] اؤولادیم تئموتاعوس، بونلاری، سنئن حاقّیندا اوّلجه دیئلن نبئلئک سؤزلرئنه گؤره، سنه تاپشیریرام کی، اونلارین واسئطه‌‌سی‌ائله یاخشی بئر موبارئزه قاباغا آپاراسان
[19] و ائمان و یاخشی وئجدانی حئفظ اده‌سن کی، بعضئلری ردّ ادئب، ائمانلاری حاقدا سینیق گمی کئمی باتیبلار.
[20] بونلارین آراسیندا هئمنایوس و ائسکندردئر. اونلاری شیطانا تسلئم اتدئم کی، کوفر دمه‌مه‌یی اؤیرنسئنلر.