[1] قوجا کئشئنی شئدّتله توبئخ اتمه، لاکئن اونو آتایا اِدَن کئمی تشوئق ات، جاوانلارا قارداشلارا ادن کئمی،
[2] قوجا آروادلارا آنالارا ادن کئمی، جاوان آروادلارا باجیلارا ادن کئمی، بوتون پاکلیقدا.
[3] دول آروادلارا اگر حقئقتن دول اولسالار، احتئرام ات.
[4] آمّا اگر بئر دول آروادین اؤولادلاری یا دا نوه‌لری وارسا، اونلار گرک هر شیدن اوّل اؤیر‌نسئنلر کی، اؤز قوحوملارینا اورَک یاندیرالار و آتا-آنالارینا کؤمک اده‌لر. چونکی تارینین نظرئنده بو مقبولدور.
[5] دوغرودان دول آرواد اولان و یالقوز بوراخیلان، اومئدئنی تارییا باغلاییب، گجه-گوندوز نئیازلار و دوعالارا مشغولدور.
[6] لاکئن عیّاشلیقدا کچئنن آرواد، دئری ائکن اؤلودور.
[7] بو شیلری ده اونلارا تعلئم ور، اِله کی، مذمّت آلتیندا قالماسینلار.
[8] آمّا اؤزونونکولر اوچون، خوصوصَن ده اؤز اِو اهلی اوچون تداروک گؤرمه‌ین آدام، ائمانی ردّ ادئب و ائمانسیز بئرئندن داها دا پئسدئر.
[9] دول آرواد آنجاق او زامان سئیاهی‌یا آلینسین، اگر یاشی آلتمیشدان اسکئک دیئل، بئر کئشئیه آرواد ائمئش
[10] و یاخشی ائشلرده آد آچیب. اگر اؤولادلار بؤیودوب، اگر قرئب‌نوازلیق ادئب، اگر موقدّسلرئن آیاقلارینی یویوب، اگر ذئلّت چکنلره کؤمک ادئب، اگر اؤزونو هر یاخشی ائشه وقف ادئبدئر.
[11] لاکئن جاوان دوللاری ائمتئناع ات، چونکی مسئحله جور گلمه‌ین هاوا-هوسلره دوشدوکده، اَره گتمک ائسته‌یئرلر،
[12] و محکومئیّت آلتینا گئرئرلر، چونکی اوّلکی ائمانلارینی بئر یانا آتیبلار.
[13] همن حالدا اِولری دولانا-دولانا، بکارلیغی دا اؤیره‌نئرلر. آنجاق بکارلیغی یوخ، قیبت اِتمه‌یی، هر شیه بورونلارینی سوخماغی، و ناروا دانیشماغی.
[14] بونا گؤره، ائسته‌یئرم جاوان دوللار اَره گتسئنلر، اؤولاد دوغسونلار، اِو دولاندیرسینلار و دوشمنه مذمّت اوچون فورصت ورمه‌سئنلر.
[15] چونکی اِله ائندی ده بعضئلری دؤنوبلر کی، شیطانین دالینجا گتسئنلر.
[16] اگر ائمانلی بئر آروادین دول اولان یاخینلاری وارسا، او گرک اونا کؤمک اتسئن و کئلئسایا یوک قویولماسین. اِله کی، کئلئسا دوغرودان دول اولانلارا کؤمک اده بئلسئن.
[17] یاخشی پئشوالیق ادن آغساقّاللار ائکی قات احتئراما لایئقدئرلر، خوصوصَن اونلار کی، وعظ اتمک و تعلئم ورمکده چوخ زحمت چکئرلر.
[18] چونکی موقدّس یازی دیئر: «خرمن دؤین اؤکوزون آغزینی باغلاما.» و «فحله موزدونه موستحقدئر.»
[19] آغساقّالین ضئدّئنه بئر بؤهتانی قبول اتمه، مگر ائکی و یا اوچ شاهئد شهادت ورسئنلر.
[20] گوناهدا داوام ورنلری هامینین قاباغیندا توبئخ ات. اِله کی، او بئرئلر ده دهشت اتسئنلر.
[21] سنی تاری و مسئح عئسا و سچئلمئش ملکلرئن حوضوروندا آند ورئرم کی، بو اوصوللاری قَرَضسئز ساخلایاسان و طرفدارلیق اوزوندن هچ بئر شی اتمه‌یه‌سن.
[22] هچ کسئن اوستونه چوخ عجله ائله اَل قویما و بله‌جه اؤزگه‌لرئن گوناهیندا شرئک اولما. اؤزونو طاهئر ساخلا.
[23] داها آنجاق سو ائچمه، لاکئن مِعدن و تز-تز ضعئفله‌دئیئن اوچون بئر آز شراب دا ائچ.
[24] بعضی آداملارین گوناهلاری چوخ آیدیندیر و اونلارین قاباقلاریندا موحاکئمه‌یه طرف گدئر. اؤزگه‌لرئنکی اونلارین دالینجا گلئر.
[25] اله‌جه ده، یاخشی عمللر بلّی‌دئر، و بلّی اولمایانلاری گئزلتمک اولماز.