[1] داوودا خبر ورئب ددئلر: «باخ، فئلئسطلی‌لر قِعئلایا هوجوم چکئب خرمنلری تالان ادئرلر.»
[2] داوود مصلحت اوچون ربّئن حوضورونا گلئب ددی: «آیا گدئب فئلئسطلی‌لرله ووروشوم؟» رب داوودا ددی: «گت فئلئسطلی‌لره هوجوم ات و قِعئلانی قورتار.»
[3] لاکئن داوودون آداملاری اونا ددئلر: «باخ بورادا، یهودادا بئز قورخو ائچئنده‌‌یئک. بس نه قدر چوخ قِعئلایا، فئلئسطلی قوشونلارینین ضئدّئنه چیخاندا اولاجاغیق؟»
[4] داوود تزه‌دن مصلحت اوچون ربّئن حوضورونا گلدی و رب اونا جاواب ورئب ددی: «قالخ قِعئلایا اِن، چونکی فئلئسطلی‌لری سنه تسلئم اده‌جیم.»
[5] داوودلا آداملاری قِعئلایا گدئب فئلئسطلی‌لره هوجوم اتدئلر. داوود اونلارین مال-حیوانلارینی آپاردی و فئلئسطلی‌لری بؤیوک بئر شکئلده قیردی و قِعئلا اهالئسئنی قورتاردی.
[6] اَخئمِلِکئن اوغلو اِبیاتار قِعئلایا، داوودون یانینا قاچاندا بئر اِفوددا اَلئنده آپارمیشدی.
[7] داوودون قِعئلایا گلمه‌سی شاعولا چاتدیریلدی. شاعول ددی: «تاری اونو منئم اووجومون ائچئنه قویوب، چونکی چفته‌لی دروازالاری اولان بئر شهره گئرمَکله او اؤزونو چیخیلماز بئر وضعئیّته سالیب.»
[8] شاعول بوتون خالقی موحارئبه‌یه چاغیردی کی، قِعئلایا اِنسئنلر و داوودلا آداملارینی موحاصئره‌یه آلسینلار.
[9] داوود بئلئردی کی، شاعول اونون ضئدّئنه پئس بئر فئتنه قورور. اونون اوچون ده کاهئن اِبیاتارا ددی: «اِفودو بورایا گتئر.»
[10] سونرا سؤزونه داوام وردی: «ای ائسرایئلئن تاریسی رب، بو قولون اشئدئب کی، شاعول منه گؤره شهری محو اتمک اوچون ائسته‌یئر قِعئلایا گلسئن.
[11] آیا قِعئلا ساکئنلری منی اونا تسلئم اده‌جکلر؟ آیا شاعول بو قولونون اشئتدئیی کئمی گله‌جک؟ ای ائسرایئلئن تاریسی رب، یالواریرام، بونو قولونا آگاه ات.»
[12] او واخت داوود سوروشدو: «آیا قِعئلالی‌لار منی و آداملاریمی شاعولا تسلئم اده‌جکلر؟» رب ددی: «تسلئم اده‌جکلر.»
[13] داوود و آداملاری، تخمئنَن آلتی یوز نفر، قالخیب قِعئلادان چیخدیلار و گده بئله‌جیی هر یره گتدئلر. داوودون قِعئلادان قاچدیغینی شاعولا خبر ورنده، او تعقئبدن اَل چکدی.
[14] داوود چؤللوکده قالالاردا قالیب، زئف صحراسینداکی داغلیق بؤلگه‌سئنده یاشادی. شاعول هر گون داوودو آختاریردی، لاکئن تاری اونو شاعولا تسلئم اتمه‌دی.
[15] داوود زئف صحراسینداکی خورِشده اولاندا گؤردو کی، شاعول اونون جا‌نینی آلماق اوچون یولا چیخیب.
[16] شاعولون اوغلو یوناتان قالخیب مِشه‌لئیه، داوودون یانینا گلدی و اونو تاری آدی ائله اورَکلَندئردی.
[17] اونا ددی: «قورخما، آتام شاعولون اَلئنه دوشمه‌یه‌جکسن، ائسرایئلئن پادشاهی سن اولاجاقسان، من سندن سونرا ائکئنجی اولاجاغام. بونو حتّا آتام شاعول دا بئلئر.»
[18] سونرا ائکئسی ده ربّئن حوضوروندا عهد باغلادیلار؛ داوود خورِشده قالدی، یوناتان دا اِوئنه قاییتدی.
[19] زئفلی‌لر گئبعایا، شاعولون یانینا گلئب ددئلر: «مگر داوود بئزئم یانیمیزدا، یِشئمونون جنوبونداکی تپه‌سئنده، خورِشده‌کی قالالاردا گئزلنمه‌یئب؟
[20] ائندی ای پادشاه، ائندی اورایا اِنه‌سن، اوره‌یئنده‌کی آرزونا چاتارسان. بئزئم پاییمیز بودور کی، اونو پادشاها تسلئم اِدَک.»
[21] شاعول ددی: «منه اورَک یاندیردیغینیز اوچون رب سئزه برکت ورسئن.
[22] گدئن، داها یاخشی آراشدیرین و اؤیره‌نئن کی، هارا آیاق باسیب، کئملر اونو اورادا گؤروب. چونکی دیئرلر کی، او چوخ حئیله‌گردئر.
[23] گئزلَندئیی یرلرئن هامیسینی تاپیب اؤیره‌نئن، دوغرو خبرله یانیما گلئن و من ده سئزئنله اورایا گده‌جیم. اگر او بؤلگه‌ده اولسا، اونو یهودا طایفالارینین هامیسی آراسیندا آختاراجاغام.»
[24] زئفلی‌لر قالخیب شاعولدان قاباق زئفه قاییتدیلار. داوودلا آداملاری یِشئمونون جنوبوندا، عَراباداکی ماعون صحراسیندا ائدئلر.
[25] شاعوللا آداملاری اونو آختارماق اوچون همئن یره گتدئلر. بو، داوودا خبر ورئلدی و او دا قایالیغا اِنئب ماعون صحراسیندا قالدی. شاعول بونو اشئدنده ماعون صحراسیندا داوودو تعقئب اتدی.
[26] شاعول داغین بئر طرفئندن گتدی، داوودلا آداملاری دا داغین او بئری طرفئندن. داوود تَله‌سئردی کی، شاعولون قاباغیندان قاچسین، چونکی شاعوللا آداملاری اورانی موحاصره‌یه آلدیلار کی، داوودلا آداملارینی توتسونلار.
[27] بو واخت شاعولون یانینا بئر قاصئد گلئب ددی: «تِز اول، گری قاییت، چونکی فئلئسطلی‌لر اؤلکه‌یه هوجوم ادئبلر.»
[28] بله‌جه شاعول داوودو تعقئب اتمکدن اَل چکئب فئلئسطلی‌لرئن ضئدّئنه دؤیوشه گتدی. اونا گؤره ده او یره «قاچماق قایاسی» آدی ورئلدی.
[29] داوود اورادان چیخیب عِین‌گِدی قالالاریندا قالدی.