[1] Jesusasti jakenacamp parlañ tucuyjjasinjja, Capernaum marcaruw sarjje.
[2] Ucansti mä romano capitanaw utjäna mä uywatani, juparusti wal munasïna. Uca uywatasti usuntata niya jiwirjamäscänwa.
[3] Cunapachatï capitanajj Jesusjjat parlir ist’äna ucqhasti, judionacan mä kawkha jilïri jakenacap achict’iriw qhitäna uca uywata c’umaraptayir jutañapataqui.
[4] Jupanacasti Jesusar jac’achasisinjja wal achict’apjjäna: --Aca capitanaru yanapt’añamajj waquisiwa;
[5] jupajj marcasar muniriwa, jupa quicparaquiw jiwasan sinagogasa lurayaraqui --sasa.
[6] Ucatwa Jesusajj jupanacamp saräna. Niya utar jac’achquïpanwa capitanajj mä kawkhan amigonacap qhitsunïna Jesusar aqham siri: --Tata, jan mayjt’asimti, janiw nayajj asquïcti utajjar mantañamataquejja.
[7] Ucatwa jan naya quicpasa jumar jicjjatiri jutañarojj uchascti. Arsu mayac arsum, uywatajjasti c’umaräjjaniwa.
[8] Naya quicparaquiw jilïrinacan munañapancaractsa, uqhamaraqui soldadonacas nayan apnakataraquiwa. Cunapachatejj jupanacat mayniru nayajj sistjja ‘Saram’ sasajja, ucspachaw sari. Maynirutejj ‘Jutam’ sistjja, ucspacharaquiw juti. Uywatajjarutejj cuna lurañarus qhitta ucqhajja, luraraquiwa --sasa.
[9] Uc ist’asinsti Jesusajj wali muspharataw uca jaketjj uñjasïna, ucat jupar arquir jakenacaru uñtasinjja saraqui: --Chekpachansa, janiw israelitanac taypinsa aca jakjam wali iyawsañanjj jicjjatcti --sasa.
[10] Qhitatanacajj utar cuttjjasinsti uca uywatarojj c’umar jicjjatjjapjjäna.
[11] Uca khepatsti Jesusajj Naín sat marcaruw saräna discipulonacapampi, uqhamarac walja jakenacampi.
[12] Marca jac’aru purquipansti, mä jiwatar imt’anjjañatac callasipquir uñjäna; ucasti mä sapa wawaquiraquïnwa. Uca taycasti ijmaraquïnwa, marcatsti walja jakenacaw jupampi chicajj sarapjjaraquïna.
[13] Uc uñjasinsti Tatitojj jupatjja qhuyapt’ayasïnwa, ucat saraqui: --Jan jachamti --sasa.
[14] Ucatwa Jesusajj jiwatar jac’achasisinjja llamct’äna, uca apirinacasti sayt’apjjaraquïnwa. Jesusasti jiwatarojj sänwa: --Wayna, nayaw sisma, ¡sartam! --sasa.
[15] Ucatwa jiwatäcän ucajj konthapïna, parlañ kalltaraquïna; ucat Jesusajj taycaparuw catuyjjäna.
[16] Uc uñjasinjja takeniw ajjsarthapipjjäna, ucat Diosar yupaychañ kalltapjje: “Mä jach’a profetaw jiwas taypin uñsti. Diosaw juti marcapar yanapt’iri” sasa.
[17] Take Judeapachanwa, uqhamarac uca jac’anacamppachana cuntï Jesusajj lurcatayna ucajj yatisïna.
[18] Juanasti take acanac yatjjatäna, juparusti arquirinacapaw yatiyapjjatayna. Ucatwa jupanacat panin jawsi.
[19] Jupanacarusti Jesusan ucaruw qhiti, chekpachapunit jupäpacha jutañapäcänsa uca Cristojj, jan ucajj yakharuch suyañanacapäsipqui uc yatjjatiri.
[20] Juanan qhitanitanacasti Jesusar jac’achasisinjja sapjjänwa: --Bautisiri Juanaw qhitanipjjetu jumar jisct’añataqui: ‘¿Jumätati jutañapäqui uca Cristojja jan ucajj yakharuch suyasipcäjja?’ --sasa.
[21] Puripcäna uca horasanracwa Jesusajj walja usutanacaru c’umaraptayäna, uqhamarac t’akhesiñanacata, ñankha ajayunacata khespiyäna. Walja juyqhunacaruw uñjayaraquïna.
[22] Uqhamasti Jesusajj jupanacarojj sänwa: --Sarapjjam, ucatsti cuntejj uñjapcta, ist’apcaracta ucanac Juanarojj khanañchapjjam. Yatiyapjjaraquim cunjämtï juyqhunacajj uñjapjje, cojonacas sarnakapqui, lepra usuninacas c’umaräjjapjje, okaranacas ist’apcaraqui, jiwatanacas jactayataraqui, uqhamarac pobrenacaruw khespiyasiñ arunacajj churasiscaraqui ucanaca.
[23] ¡Cusisiñaniwa nayaru arcasina jan mayjt’asirejja! --sasa.
[24] Juanajj qhitancatayna ucanac sarjjepansti, Jesusajj jakenacaruw Juanat parlañ kalltäna, aqham sasa: --¿Cuna uñjiris jumanacajj wasararu sarapjjta? ¿Thayan onokeyat mä sokosar uñjiriti?
[25] Jan ucajj, ¿cun uñjirich sarapjjta? ¿Mä suma isimp ist’at jakerucha? Jumanacajj yatipjjtawa, suma isimp ist’asirinaca uqhamarac cusisiñanacana jaquirinacajj reyinacan utapancapjjewa.
[26] Uqhamasti, ¿cun uñjiripunirac sarapjjtasti? ¿Mä profetaru uñjiri? Jïsa, chekawa, ucasti mä profetatsa juc’ampiwa.
[27] Qhitittï Kellkatan aqham sisquis ucajj Juanawa: ‘Qhitatajjwa juman nayrakatamar qhitanta, jumatac thaqui waquichañapataqui.’
[28] Sapjjsmawa, take jakenac taypinjja janiw utjquiti Bautisir Juanat sipan juc’amp jach’a profetajja; ucampis, Diosan reinopan juc’amp jisc’äqui ucajj jupat sipans juc’amp jach’awa --sasa.
[29] Uc ist’asinjja take jakenacas, uqhamarac Juanan bautismop catokeri, impuesto cobririnacasa amuyapjjänwa Diosajj chekätapa.
[30] Ucampis Juanan jan bautisata fariseonacampi, ley yatichirinacampisti janiw yäkapcänti cuntejj Diosajj jupanac toke lurañ muncän ucjja.
[31] Tatitusti sänwa: --¿Cunampis uñtasiyäjja aca urunacan jakjja? ¿Cunar uñtatäpjjesa?
[32] May wawanacajj plazan kont’asisin anatapjje ucatsti masinacapar arnakasipqui ucaru uñtatawa: ‘Pinquillo phust’arapipjjsma ucampis jumanacajj janiw thokopctati; llaquiscañ k’ochunac k’ochurapipjjsma ucatsti janiraquiw jachapctasa.’
[33] Bautisir Juanaw juti, ucasti janiraquiw t’ant’a mank’cänti, vins umcaraquïnti; jumanacasti: ‘ñankha ajayuniw’ sapjjaractawa.
[34] Ucjjarusti Jaken Yokapaw jutaraqui, jupasti mank’ewa, umaraquiwa, jumanacasti: ‘Wali mank’eri, umiriraquiwa’ sapjjtawa; juchararanacampin, impuesto cobririnacampin amigopawa sapjjaractawa.
[35] Ucampis Diosan yatiñapajj qhitinacatejj yatiñanïpqui ucanac tokew uñacht’ayasiraqui --sasa.
[36] Fariseonacat mayniw Jesusar jupampi mank’añataqui jawsayäna, ucat Jesusajj utapar saräna. Purisinsti mesaruw kont’asïna.
[37] Ucatsti uca pachpa marcana mä jan wali sarnaker warmiw utjäna. Jupasti Jesusan mä fariseon utapar mank’er saratap yatisinwa purini mä jank’o kalat lurat botellar mä suma k’apquir aceite apt’ata.
[38] Ucat jacht’asisaw Jesusan cayupawjaru kont’asi, ucatsti jachapampiw Jesusan cayupjja jarekäna. Ucatjja ñic’utapampiraquiw ucjja wañsuyaraquïna, ucat jamp’att’asinwa uca k’apquir aceitempejj Jesusan cayuparojj warjjatäna.
[39] Uc uñjasinsti, Jesusar jawsayir fariseo jakejj chuymapanjja sänwa: “Jupatejj chekpachan mä profetäspa ucajja amuyasispaw qhititï jupar llamct’asqui, uqhamarac cunjäm jan wali sarnaker warmïquitï ucjja” sasa.
[40] Ucatwa Jesusajj fariseo jakerojj saraqui: --Simón, may sañajjaw utjitu --sasa. --Fariseo jakesti saraquïnwa: --Sascaquita, Yatichiri --sasa.
[41] Jesusasti sänwa: --Pani jakew mä kollke mayt’ir jaker manüpjjäna. Maynejj pheska patac denario kollke mayt’asitayna, maynïristi pheska tuncaraqui.
[42] Jan uca manu phokherjamäjjapjjëpansti, kollke mayt’ir jakejj panpachaniruw perdonjjatayna. Jichhajj sita, ¿cawquïris jupanacatjj jil munpachajj uca kollke mayt’irirojja? --sasa.
[43] Simonasti juparojj sänwa: --Nayan amuyatajjatjja, jila manunïcäns ucaw jil munpachajja --sasa. Jesusasti saraquïnwa: --Walic sasctajja, uqhampunïsquiwa --sasa.
[44] Ucatwa Jesusajj warmir uñtasinjja Simonarojj saraqui: --¿Uñjtati aca warmiru? Nayajj utamaruw mantanta, ucatsti janiw nayarojj mä juc’a umsa churquistati cayunacajj jarekasiñataquejja; ucampis aca warmejj jachanacapampiw cayunacajja jareketu, ucatsti ñic’utapampiraquiw wañsuyaraquitu.
[45] Janiw jumajj jamp’at’quistati, ucampis aca warmejj janiw karjasquiti cayunacajj jamp’att’añjja mantancta ucqhatpacha.
[46] Jumajj janiw aceitempis p’ekejjatjja warjjat’quistati, ucampis aca warmejj suma k’apquir aceitempiw cayunacajjarojj warjjatt’itu.
[47] Ucatwa sismajja, walja juchanacapat perdonatäsinwa, walja munasiñapajj uñacht’ayasejja. Ucampis qhititejj juc’aqui perdonatäqui ucajj juc’a munasiñaniquiraquiwa.
[48] Ucatsti warmirojj sänwa: --Juchanacamatjja perdonatätawa --sasa.
[49] Jupamp chic kont’atäpcän uca jawsayatanacajj, jupanaccamaw parlasipjjäna: --¿Qhitïpachas aca jakejj, juchanacsa perdonañataquejja? --sasa.
[50] Ucampis Jesusajj warmirojj sänwa: --Iyawsatam laycuw khespiyatätajja, jichhajj cusisitaqui sarjjam --sasa.