[1] Mä cutejj Jesusajj Genesaret kota thiyancascänwa; ucarusti walipuniw jakejj tantthaptanïna wali ñekjjasiñcama Diosan arunacap ist’añataqui.
[2] Jesusasti uca kota thiyan pä ch’usa boteruw uñjaraquïna, chawlla caturinacasti mistunjjasinjja känanacap t’ajjsusisipcäna.
[3] Ucatwa Jesusajj mä boteru mantäna, uca botesti Simonancänwa. Botencjjasinjj mä juc’amp wañat mankhar jithintayañapataquiw mayïna. Kont’asisinsti uca botjjat jakenacarojj yatichäna.
[4] Parlañ tucuyjjasinsti Simonarojj sänwa: --Jichhajj aca botjja juc’amp mankharu apam, ucatsti känanacam jakontapjjam chawlla catsuñataqui --sasa.
[5] Simonasti ucjjaruw Jesusar säna: --Yatichiri, arum pakariw irnakapjjta ‘chawlla catsuñäni’ sasa, ucatsti janiraquiw cuns catupcti. Ucampis juman arsutamaruw kän jakontä --sasa.
[6] Jakontatatsti uca känarojj chawllajj phokt’änwa. Janiraquiw apsuñjamäcänti, känasti niya ch’iyjtascänwa.
[7] Ucatwa señampi jawsapjjäna yakha botencasquirinacarojja, ucanacamp yanapt’ayasiñataqui. Jupanacasti jutapjjaraquïnwa, ucatsti maya botempiruw phokt’apjjäna, ucampis botenacajj niyapuniw umarojj utjantäna.
[8] Uc uñjasinjja Simón Pedrojj Jesusan nayrakatapar quillt’asisinwa saraqui: --Saraket, Tata. Nayajj juchararätwa --sasa.
[9] Simonasti sustjatänwa, uqhamarac jupamp chicapcäns take ucanacasa chawll uqham wal catsupjjatapata.
[10] Zebedeon yokanacapa Jacobompi Juanampisa wali sustjatäpjjaraquïnwa, jupanacasti Pedromp chic irnakerinacänwa. Jesusasti Simón Pedrorojj siwa: --Jan ajjsaramti, jichhat ucsarojj jak catjjäta --sasa.
[11] Ucatsti kota thiyaru botenac jaytawayasinjja take cuna apanucusinwa Jesusampi sarjjapjjäna.
[12] Cunapachatï Jesusajj mä marcanccäna ucqhaw jupan ucarojj mä lepra usun jakejj purini. Jesusar uñcatasinjja orakcam ajanup alt’asaw achict’asïna: --Tata, munstajja, kollt’asitasmawa --sasa.
[13] Ucatwa Jesusajj juparojj amparapampi llamct’äna, aqham sasa: --Muntwa, c’umaräjjam --sasa. Uc arsquipanwa uca lepra usupajj chhaktawayjjäna.
[14] Jesusasti juparojj: --Janiw qhitirus acjj yatiyätati --sasaw ewjjt’i. Ucatsti saraquïnwa: --Jichhasti sacerdoter uñstir saram. C’umaraptatamatsti ofrenda churaraquim Moisesan arsutaparjama, jakenacasti usumat c’umaräjjatam yatjjañapataqui --sasa.
[15] Ucampis Jesusan take ucanac luratapajj juc’ampiw yatisïna, ucatsti walja jakeraquiw jupar ist’irejj jutapjjäna, uqhamarac usunacapat kollatäñataquisa.
[16] Ucampis Jesusajj wasar chekanacaruw sarjjäna, uca chekansti oración luräna.
[17] Mä urojj Jesusajj yatichascänwa. Ucanjja fariseonacamp, ley yatichirinacampiw kont’atäsipcäna; ucanacasti Galileata, Judeata, Jerusalenampita jutapjjatayna. Diosan ch’amapasti Jesusampïnwa usutanac c’umaraptayañataquejja.
[18] Ucatsti mä kawkha jakenacaw mä suchu jakeru callanipjjäna Jesusan ucaru. Jupanacasti uta mankher apantasinjja Jesusan nayrakataparuw puriyañ munapjjäna.
[19] Ucampis jaken wali q’iq’ïtapatjja jan cawqui cheka callantañjamïpanjja uta pataruw mistupjjäna. Ucat techo jartasinracwa suchu jakerojj warcuntanipjjäna Jesusan nayrakataparu.
[20] Jesusasti jupanacan iyawsañanïpjjatap yatisinjja suchu jakerojj sänwa: --Wawa, juchanacamajj perdonatawa --sasa.
[21] Ucapachasti ley yatichirinacampi, fariseonacampejj aqham sasaw lup’ipjjäna: “¿Qhitirac aca jakesti uqham parlañataquisti? Dios contraw jan wal arsu, janiw qhitisa juchanacjja perdoncaspati, jan ucasti Diosaquiw perdonaspajja” sasa.
[22] Ucampis cuntejj jupanacajj lup’isipcäna ucjja Jesusajj yatïnwa, ucat saraquïna: --¿Cunats jumanacajj uqham lup’isipjjta?
[23] ¿Cawquïris juc’amp jasaquejja: ‘Juchanacamajj perdonataw’ sañati, jan ucajj, ‘Sayt’asim ucat sarjjam’ sañacha?
[24] Waliquiw uqhamajja, jichhajja Jaken Yokapan acapachan juchanacat perdonañataqui ch’amanïtap jumanacarojj uñacht’ayapjjäma --sasa. Ucat uca suchu jakerojj säna: --Jumaruw sisma, sayt’asim, iquiñam apjjarusis utamar sarjjam --sasa.
[25] Ucspachaw jupanacan nayrakatapan uca suchu jakejj sarthapïna, iquiñap apjjarusisinsti Diosar yupaychasaw utapar sarjjäna.
[26] Takeniraquiw wali sustjatäpjjäna, Diosarusti yupaychapjjaraquïnwa, ucatsti wali ajjsart’asaraquiw sapjjäna: --Jichhürojj wali muspharañanacwa uñjtanjja --sasa.
[27] Aca pasatatsti Jesusajj mistuwayjjänwa, ucat mä impuesto cobrir Leví sat jakeruw uñjäna, impuesto cobrañäquis ucqhan kont’atäsquiri. Ucat Jesusajj: --Arquita --sasaw juparojj säna.
[28] Ucat jupajj sartasin, take cun apanucusaw Jesusamp chic sarawayjjäna.
[29] Ucjjarusti Leví chachajj utapanjj mä jach’a mank’añ Jesusatac waquiyi. Waljanipuniw impuesto cobririnacampi, yakha jakenacampi, take jupanacamp chica mesan mank’asiñatac kont’asipjjäna.
[30] Ucampis fariseonacampi, ley yatichirinacampejj jisc’achapjjänwa. Jesusan discipulonacaparojj sapjjaraquïnwa: --¿Cunats jumanacajj impuesto cobririnacampi, juchararanacampejj mank’apjjta, umapjjta? --sasa.
[31] Jesusasti jupanacarojj sänwa: --C’umaranacataquejj janiw kolliri munasquiti, jan ucasti usutanacataquiw kollirejja munasejja.
[32] Janiw asqui jakenacar jawsir jutcti, jan ucasti juchararanacar jawsiriw jutta, jupanacajj juchanacapat arrepientisipjjañapataqui --sasa.
[33] Ucapachaw jupanacajj Jesusar jisct’apjjäna: --¿Cunatarac Juanan arquirinacapampi, fariseonacan arquirinacapampisti wal ayunapjjesti uqhamarac oracionanacs lurapjjaraqui, ucampis discipulonacamajj mank’asipqui umasipqui uqhamaquiraquisä? --sasa.
[34] Jesusasti jupanacarojj saraquïnwa: --¿Jumanacasti casarasïwiru jawsatanacarusti ayunayapjjasmatisti, casarasir waynajj ucancquipanjja?
[35] Ucampis purininiw mä urojja, cunapachatï casarasir waynajj jan jupanacampïcjjani; ucqhaw ayunapjjani --sasa.
[36] Uqhamaraquiw aca amuyt’äwimp churi: --Janiw qhitis mä merk’e isirojj machak pañompejj remjjatcaspati, uqham lurani ucajj antisaquiw machak isirojj ch’iyjjani, ucampis jan wal uñnakayaspajja uqham mä merk’e isir mä machak pañompi remjjataspa ucqhajja.
[37] Janiraquiw qhiti jakes machak vinjja mä merk’e lip’ichit lurat vino wayakarojj warantcaspati. Uqham luraspa ucajja, chhuyu vinojj merk’e lip’ichit lurata wayakarojj phallayaspawa, ucatsti vinojj inamayaruw tucusispa.
[38] Ucatwa chhuyu vinojj machak lip’ichit lurat wayakar imañajj waquisi, paypach suma imatäñapataqui.
[39] Janiraquiw qhitis jayan vino umt’asa ucspachajj chhuyu vinjj muncaspati, jan ucasti siwa: ‘Jayan vinow juc’amp sumajja’ --sasa.