[1] Munkañ warminak taypin munkañ warmi, ¿kawkirurak munasitamasti sarxisti? ¿Kawksa tuqirus sarawayi? ¡Jumamp chik thaqhir sarañäni!
[2] Munasitaxax panqar yapuparuw sari, suma q'apkir panqar yapuparu, uywa tamap awatiri, rosa panqaranak apthapiri.
[3] Nayax munasitaxanktwa, jupasti nayankarakiwa. Jupax uywa tamanakap rosa panqaranak taypin awatisi.
[4] Jumasti munasitaxay, wali munkañätawa; Tirsá markar uñtat wali sumätawa, Jerusalén markar uñtat jiwakïtawa, warawaranakar uñtat wali munkayätawa.
[5] ¡Janiy juk'ampi uñch'ukxistati, uñch'ukitamax nayarux chuymax lunthatitu! Ñik'utamax Galaad qullunakan ananaqtir cabritonakar uñtatawa.
[6] Laka ch'akhanakamax sumakamakiwa, t'awra yawiratäñatak jichha jariqat ovejanakaru uñtatawa.
[7] Ajanumasti velom qhipäxanxa, payar jaljata granada achur uñtatawa.
[8] Reinanakax paqallq tunkanïskaspawa, tawaqunakas kimsaqallq tunkat jiläskaspawa;
[9] ukampis palomaxax jan llamkt'ata mayni sapakiwa; taykapan wali munat phuchhapawa. Jupar uñjasasti, tawaqunakax jallallt'apxiwa; reina warminakasa, tawaqu reynanakasa, juparux jach'aruw aptapxi.
[10] ¿Khitirak akasti willjta qhanjam uñstanisti? Phaxsir uñtat wali jiwakiwa, intir uñtat sum k'ajkiriwa, ¡warawaranakar uñtat sumapuniwa!
[11] Nogal sat quqanak taypiruw saraqawayta, uma jalsu ch'uxñanak uñatatasiri; uva alinakan alsutap uñxatt'iri, granado alinakan panqaratap uñxatt'iri.
[12] Nayasti jan amuykatakiw, mä carro patxan uñjasta munasitaxan jak'apana.
[13] ¡Kutt'anxam, Sulamita, kutt'anxam! ¡Kutt'anxam, uñjañ munapxsma! ¿Kunatakirak Sulamitar uñjañ munapxtasti? ¡Campamentonjam thuqt'asir uñjañ munapxsma!