[1] Salomonan wali suma q'uchunakapa:
[2] ¡Laka ispillunakamamp jamp'att'ita! Munart'asiñamax vinot sipansa juk'amp sumawa,
[3] q'apkir qullaman q'aphipas mukt'atax wali sum q'apkatitu, sutimasti suma q'apkir qulla wartatjamaw q'aphiraki. ¡Ukat tawaqunakax wal munasipxtam!
[4] ¡Jank'akiy jumamp chik irpita! ¡Reyixay, utamar irpita! Jumampix wali k'uchikïñäniwa; munart'asiñamatsti vinot sipansa juk'amp amtasiñäni. ¡Ukat warminakax wal munasipxtam!
[5] Jerusalenankir warminaka, nayax ch'iyär janchinïtwa, ukampis munkañätwa; Quedar chiqankir chhujllanakjam ch'iyärätwa, Salomonan uta cortinanakapjam jiwakirarakïtwa.
[6] Janiy ch'iyär janchinïtaxa uñch'ukipxamti, lupiw janchixar ukham naksutu. Jilanakaxax nayatakix thithitäpxiwa, uva yapunak uñjayapxitu, ¡uva yapuxasti apanukutaw uñjasi!
[7] Munasitaxay sitaya, ¿kawkharurak jumasti uywanakam awatistasti?, ¿kawkharurak chika urusti samart'ayir anaktasti? ¿Kunatarak masinakaman uywanakap chik muyuykur uñtat sarnaqästi?
[8] Munkañ warminak taypinsa munkaya, janitix yatksta ukkhax uywanakan saräwip arktam; cabritonakamarusti, awatirinakan chhujllanakap jak'an awatim.
[9] Munasitaxay, jumax nayatakix faraonan carrop jiyt'ir suma caballopjamätawa.
[10] ¡Ajanumax aretenak taypin wali jiwakiwa! ¡Kunkamas perlanakat lurat wallqa taypin wali jiwakiwa!
[11] ¡Qullqimp k'achacht'at quri aretenak lurarapipxäma!
[12] Reyin mesan qunt'añapkamasti, q'apkir qullaxax suma q'aphitati.
[13] Munasitaxasti nayatakix mirra wayaqar uñtatawa, ukasti nayan ñuñunakax taypinkapuniwa.
[14] Munasitaxasti nayatakix En-gadi chiqan uva yapunak taypin utjir alheña sat alin panqarapjamawa.
[15] ¡Munasitaxay, kunja munkañätasa! ¡Sinti jiwitakïtawa! ¡Nayranakamax pä palomaru uñtatawa!
[16] ¡Munasitaxay, kunja munkañätasa, sinti munkañätawa! ¡Ch'uxña ch'ijinakaw jiwasan ikiñasaxa!
[17] utasan lawanakapas cedro lawanakawa, ciprés alinakampi utacht'atawa.